މައި ވައިގެ ބަނދަރު ހިންގާ ކުންފުނި، އެމްއޭސީއެލްއަށް ގައުމީ އެއާލައިން، މޯލްޑިވިއަން އިން 1.2 ބިލިއަން ރުފިޔާ ދޭން ޖެހޭކަން ހާމަ ވެއްޖެއެވެ.

ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީގައި އެމްއޭސީއެލްގެ މާލީ ހާލަތާ ގުޅޭގޮތުން ވާހަކަދައްކަވަމުން އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފު ވިދާޅުވީ، އެސްއޯއީ ކުންފުނިތަކުން އެ ކުންފުންނަށް ދައްކަންޖެހޭ ވަރަށް ގިނަ ފައިސާ އަދިވެސް ނުދައްކާ އެބަހުރި ކަމަށެވެ.

ހާއްސަކޮށް އައިލެންޑް އޭވިއޭޝަނުން 1.12 ބިލިއަން ރުފިޔާ ނުދައްކާ އެބަހުރި ކަމަށް އޭނާ ވިދާޅުވިއެވެ.

ޝަރީފު ވަނީ އެމްއޭސީއެލް އިން މިދިޔަ އަހަރު އައިލެންޑް އޭވިއޭޝަނަށް ދިން ޑިސްކައުންޓުތަކުގެ ތަފުސީލުވެސް ހިއްސާކޮށްފައެވެ.

އޭގެ ތެރޭގައި ހިމެނެނީ ތެލުން ދިން 38.77 މިލިއަނުގެ ޑިސްކައުންޓާއި ޑޮމެސްޓިކް ގްރައުންޑް ހޭންޑްލިން އިން ދިން 12.73 މިލިއަނުގެ ޑިސްކައުންޓު، އަދި ގްރައުންޑު ޕަވާ ޔުނިޓުން ދިން 11.39 މިލިއަނުގެ ޑިސްކައުންޓުގެ އިތުރުން ޕާކް ކުރުމަށް ދިން 9.7 މިލިއަން ރުފިޔާގެ ޑިސްކައުންޓެވެ.

މީގެއިތުރުން އަމިއްލަ އެއާލައިންތަކަށް ނުދޭ އަގުތަކެއްގައި ރެންޓް ޑިސްކައުންޓްތަކެއްވެސް އައިއޭއެސް އަށް އެމްއޭސީއެލް އިން ހަމަޖައްސައިދީފައިވެ އެވެ. އައިއޭއެސް އިން ދައްކަންޖެހޭ ފައިސާ ދެއްކުމަށް މަސައްކަތް ނުކުރާނަމަ އެމްއޭސީއެލް އަށް ދިމާވާ ދަތިތައް އިތުރުވާނެ ކަމަށްވެސް ވިދާޅުވި އެވެ.

އައިލެންޑް އޭވިއޭޝަނުން ސަރުކާރު ކުންފުނިތަކަށާއި ބޭރުގެ އިންވެސްޓަރުންނަށް ދައްކަންޖެހޭ ފައިސާ ނުދެއްކި ކުންފުޏި ބަގްރޫޓް ވާން ގާތް ވުމުން މިފަހުން ވަނީ މޯލްޑިވިއަން އިން ބޭނުންކުރާ ޑޭޝް 8-300 މަތިންދާ ބޯޓެއް ބަޔަކަށް ނުއަގުގައި ވިއްކާ ލައިފަ އެވެ.

އޮސްޓްރޭލިއާ ބަޔަކަށް މޯލްޑިވިއަން ވިއްކާލި ބޯޓުގެ ރަޖިސްޓަރީވެސް އޮސްޓްރޭލިއާގެ ރަޖިސްޓްރީއަށް މިހާރު ވަނީ ބަދަލުކުރެވިފައިއެވެ.

ސުވާލަކީ މިވަރުން ރައީސް މުއިއްޒުގެ ބެލުމުގެ ދަށުން މޯލްޑިވިއަންގެ ދަތުރުތައް ޔޫރަޕަށް ފަށާނީ ކިހިނެތް ހެއްޔެވެ. އަދި ވައިޑް ބޮޑީ އެއާކްރާފްޓް ގެނެސް އަންނަ ޖެނުއަރީ މަހުގެ ކުރީކޮޅު ދަތުރުތައް ފަށާނެ ގޮތެއް ހަމަ ބުއްދި އަށް މިއުޅެނީ ނުވިސްނި ގެންނެވެ.

ގައުމީ އެއާލައިން މޯލްޑިވިއަން ހިންގާ، އައިލެންޑް އޭވިއޭޝަނަށް މިދިޔަ އަހަރު ވަނީ 71 މިލިއަން ރުފިޔާގެ ގެއްލުންވެފަ އެވެ. މިދިޔަ އަހަރު ނިމުނުއިރު އެކުންފުނީގެ ދަރަނި ހުރީ 515 މިލިއަން ރުފިޔާގަ އެވެ.

އައިލެންޑް އޭވިއޭޝަންގެ މާލީ ހާލަތު ރަނގަޅު ކުރުމަށް ރާވާފައިވާ ކަންތައްތަކާއި އެ ކުންފުނީގެ ލޯނުތަކުގެ މައުލޫމާތު ހިއްސާކުރަން ބޭއްވި ރައްޔިތުންގެ މަޖިލީހުގެ އެސްއޯއީ ކޮމެޓީގެ ސަބް ކޮމިޓީގެ ބައްދަލުވުން މިފަހުން ވަނީ ނޫސްވެރިން ނެރެ ކޮމިޓީ ސިއްރުކޮށްފައެވެ.

މި ވަގުތު މޯލްޑިވިއަންގެ ފްލީޓުގައި 13 ބޯޓު އެބަ އޮތެވެ. އޭގެ ތެރޭގައި އެއާބަސް އޭ320 މަރުކާގެ އެއް ބޯޓާއި އޭޓީއާރްގެ ހަތަރު ބޯޓު ވެސް ހިމެނެ އެވެ. ބާކީ ހުރީ ޑޭޝް މަރުކާގެ ބޯޓުތަކެވެ. ބޭރު ދަތުރުތައް ކުރުމުގައި ގެންގުޅެނީ އެއާބަސް އޭ320 މަރުކާގެ ބޯޓު އެކަންޏެވެ.

މޯލްޑިވިއަން އިން މި ވަގުތު ދަތުރުކުރަނީ ރާއްޖޭގެ 16 މަންޒިލަކާއި އިންޑިއާގެ ތިން ސަރަހައްދަކާއި ލަންކާ އަދި ބަންގްލަދޭޝަށެވެ.