އިންޖީނު ފެއިލްވެ މޯލްޑިވިއަންގެ އުމްރާ ފްލައިޓެއް ގްރައުންޑްވުމުގެ ސަބަބުން އުމްރާވެރިން ފްލައިޓްގައި އެއް ގަޑި އިރަށްވުރެ ގިނަ ވަގުތު ނުފުރި ފްލައިޓް ވަނީ ޑިލޭ ވެފައެވެ.
ފްލައިޓް ނަންބަރު Q2 6360 މިއަދު ރާއްޖެ ގަޑިން 15:00 ގައި ފުރަން ހަމަޖެހިފައިވަނިކޮށް ފްލައިޓްގައި މައްސަލައެއް އުޅޭކަން އެގިފައިވަނީ އުމްރާވެރިން ބޯޑިންގވެސް ވީ ފަހުން ކަމަށް މައުލޫމާތު ލިބެއެވެ.
މިފަދަ ސީރިއަސް މައްސަލައެއް މިއަދު ދިމާވެފައިވާއިރު މޯލްޑިވިއަން އިން މިކަމާއި ގުޅިގެން އެއްވެސް މައުލޫމާތެއް ނުވަތަ "ޕަބްލިކް ސްޓޭޓްމަންޓް" އެއް ދީފައި ނުވެއެވެ.
މީގެ އިތުރުން، މައުލޫމާތު ލިބިފައިވާ ގޮތުގައި ފްލައިޓްގެ އިންޖީނަށް މައްސަލައެއް ދިމާވެގެން އުޅޭ ކަމުގެ މައުލޫމާތު އުމްރާވެރިންނަށްވެސް ދީފައިވަނީ އެތަކެއް ވަގުތެއް ފާއިތުވެފައިވަނިކޮށް ކަމަށްވެއެވެ.
މީގެ ކުރިންވެސް މޯލްޑިވިއަންގެ ފްލައިޓްތަކުގައި މައްސަލަ ޖެހިގެން ފްލައިޓް ޑިލޭ ވުމުގެ ހާދިސާތަކުގައި މޯލްޑިވިއަންއިން އެކަށީގެންވާ ޕްރޮޓޮކޯލްތަކާއި އެއްގޮތަށް އަމަލު ނުކުރާކަން ފާހަގަކުރެވެއެވެ.
ޖިއްދާއިން މާލެއަށް ކުރާ ދަތުރަކީ ދިގު ދަތުރަކަށްވާއިރު މިފަދަ ޓެކްނިކަލް މައްސަލަތައް ދިމާވުމުން ދަތުރުވެރިންނަށް އަންގާ އެންގުންތައް ލަސްކޮށް، ދަތުރުވެރިންނަށް އިތުރަށް ބުރަވާ ގޮތަށް އަމަލުކުރުމަކީ މޯލްޑިވިއަންއަށް ދިވެހިން ކުރާ އިތުބާރު ގެއްލިގެންދާނެ ކަމެކެވެ.
