މާލޭގައި ހުންނަ ސިނަމާލޭ ސަރަހައްދުގައި ޕާކުކޮށްފައި އޮތް ކާރެއްގައި ރޯކޮށްލި މައްސަލާގައި ދެ މީހަކު ހައްޔަރުކޮށްފި އެވެ.

ބުރުޒުމަގު ސިނަމާލެ 1، ޕާކިން ޒޯންގައި ޕާކްކޮށްފައި އޮތް ކާރެއްގައި މިމަހުގެ 25 ވަނަ ދުވަހުގެ އިރުއޮއްސި 6:25 ހާއިރު އަލިފާން ރޯކޮށްލި މައްސަލައިގެ ތުހުމަތުގައި ހައްޔަރުކޮށްފައިވަނީ ދިވެހި ދެ ފިރިހެނުންނެވެ.

މިމައްސަލައާ ގުޅިގެން ހައްޔަރުކޮށްފައިވަނީ މާލެ، އަރާރަތްކުރި، ހާލިދު މަހުމޫދު (35އ) އާއި އދ. މާމިގިލި، ބްލޫވިންްޑް، ހަސަން ނަސީމް (31އ) އެވެ.

އާންމުވި ވީޑިއޯ އިން ފެންނަ ގޮތުގައި އަލިފާން ރޯކޮށްލީ ކާރުގެ ކުރީކޮޅުގަ އެވެ. އަދި ކާރުގެ އެހެން ހިސާބަށް އަލިފާންގަނޑު ފެތުރުމުގެ ކުރިން ފަޔާ އެންޑް ރެސްކިއު ޓީމުން ވަނީ އަލިފާން ނިއްވާލައިފަ އެވެ.

ފުލުހުން ބުނި ގޮތުގައި އެ ދެމީހުން މައްސަލައިގެ ތުހުމަތުގައި ހައްޔަރުކޮށްފައިވަނީ ކޯޓު އަމުރެއްގެ ދަށުންނެވެ.

ފުލުހުން ދަނީ އެ މައްސަލަ ތަހުގީގް ކުރަމުންނެވެ.