ރައީސް ޑރ. މުއިއްޒުގެ ސަރުކާރު ޖަވާބުދާރީ ކުރުވާ ސަރުކާރުގެ ސިއްރު ހާމަކުރަން މުލިއާގެ ދޮށަށް އެއްވާނެ ކަމަށް ދަ ޑިމޮކްރެޓްސްގެ ނައިބު ރައީސް މުހައްމަދު ޝިފާޒު ވިދާޅުވެއްޖެ އެވެ.

ޑިމޮކްރެޓްސް އިން ރޭ ބޭއްވި ކަންމަތީ ޖަލްސާގައި ވާހަކަދައްކަމުން ޝިފާޒު ވިދާޅުވީ މިއަހަރަށް ފާސްކުރި ބަޖެޓަށް ހެދިގޮތް މި ސަރުކާރުން ބުނެދޭންޖެހޭ ކަމަށާއި ރައްޔިތުން މިއަދު ހަރަދުކުރާ ކޮންމެ 100 ރުފިޔާ އަކުން 30 ރުފިޔާ ސަރުކާރަށް ދެމުން އަންނައިރު، ރައީސް ޑރ. މުހައްމަދު މުއިއްޒު ވެރިކަމުގައި ހުންނަވަން ޖެހޭނީ އެ ފައިސާ އަށް ވީގޮތެއް ބުނެދިނުމަށްފަހު ކަމަށެވެ.

އަންނަ އަހަރަށް ސަރުކާރުން ބޮޑު ބަޖެޓެއް ހުށަހަޅައި މަޖިލީހުން އެ ބަޖެޓް ފާސްކުރިއިރު، އެ ބަޖެޓުގައި ވެސް ބައެއް ކަންކަން ހުރީ ސިއްރުކޮށްފައި ކަމަށާއި މިހާ ހިސާބަށް ކަންކަން ދިޔުމުން ރައްޔިތުން ކަށިމަތި ނާޅަންވީ އެއްވެސް ސަބަބެއް ނެތް ކަމަށް ޝިފާޒު ވިދާޅުވި އެވެ.

މި ސަރުކާރު ވެރިކަމަށް އައުމުގައި ޑިމޮކްރެޓްސް އަކީ މެދުވެރިއެއް ކަމަށް ވެދާނެ ކަމަށާއި ނަމަވެސް ސަރުކާރެއް އެކުލަވާލުމުގެ ކުރިން ދައްކާ ވާހަކަ އާއި މެނިފެސްޓޯއާ އެ ސަރުކާރަކުން ހިލާފުވާނަމަ ނޫނެނޭ ބުނާނެ ހިތްވަރު ޑިމޮކްރެޓްސްގައި ހުންނާނެ ކަމަށްވެސް ޝިފާޒު ވިދާޅުވި އެވެ.

ޝިފާޒް އިތުރަށް ވިދާޅުވީ، ރައްޔިތުންގެ މަޖިލީހުގެ ބަޖެޓް ދިރާސާ ކުރާ ކޮމިޓީ ވެސް ސިއްރު ކަމަށާއި، އޭގަ އޮތް އެއްޗެއް ވެސް ސިއްރު ކަމަށެވެ. އެހެންކަމުން ރާއްޖެ ސަލާމަތް ކުރުމަށް، ކަށިމަތި ނާޅަންވީ ސަބަބެއް ނެތް ކަމަށެވެ.

ޝިފާޒް ވިދާޅުވީ، ރައްޔިތުން ބުރަ އާއި ވޭނާ ތަކުލީފް އުފުލައިގެން ހޯދި ގާނޫނު އަސާސީ "ވެއްޔާ މޮޑެވިއްޖެ" ކަމަށެވެ. އެ އަސާސީ ހައްގުތައް ނިގުޅައިގެންފި ކަމަށާއި، އެ ހައްގުތަށް އަލުން އަނބުރާ ހޯދުމަށްޓަކައި ނިކުންނަވާހަކަ ދައްކަން ޖެހުނީ އެ ސަބަބާާ ހެދި ކަމަށް ޝިފާޒް ވިދާޅުވިއެވެ.