އާޓިފިޝަލް ބީޗު ކައިރިއަށް މަގުމައްޗަށް ވެއްޓިގެން ހޮސްޕިޓަލަށް ގެންގޮސް ފަރުވާދެމުން ދަނިކޮށް މީހަކު މިއަދު މަރުވެއްޖެ އެވެ.

ފުލުހުން ބުނީ މިއަދު ހެނދުނު 8:56 ހާއިރު އާޓިފިޝަލް ބީޗު ކައިރިން މަގުމައްޗަށް ވެއްޓުނު މީހަކަށް ފުލުހުން އެޓެންޑުވެ އެ މީހާ އޭޑީކޭ ހޮސްޕިޓަލަށް ގެންގޮސްފައިވާ ކަމަށެވެ.

އޭޑީކޭގައި ފަރުވާ ދެމުން ދިޔައީ އައްޑޫ ހިތަދޫ، ސޯސަންގޭ އަހުމަދު ޝަރީފް، 53، ކަމަށް ފުލުހުން ބުންޏެވެ.

އޭނާއަށް އޭޑީކޭގައި ފަރުވާ ދެމުން އަންނަނިކޮށް 10:03 ހާއިރު، އެ މީހާ މަރުވެފައިވާ ކަމަށް ހޮސްޕިޓަލާ ހަވާލާދީ ފުލުހުން ބުނެފައިވެ އެވެ.

މި ހާދިސާއާ ގުޅިގެން ބަލަން ޖެހޭ ކަންކަން ބަލަމުންދާ ކަމަށް ވެސް ފުލުހުން ބުންޏެވެ.