ރާއްޖެއަށް މިހާރު ކުރަމުންދާ ވިއްސާރައިގައި އައްޑޫސިޓީގެ ފަސް ގެއެއްގެ ފުރާޅު އެއްލައިލާ 13 މީހުންނަށް ވަގުތީ ބޯހިޔާވަހިކަން ފޯރުކޮށްދީފި އެވެ.

އެމްއެންޑީއެފުން ބުނީ ރޭ އައްޑޫ އަށް ކުރި ވިއްސާރައާއެކު އައި ގަދަ ކޮޅިގަނޑުގައި، މަރަދޫގެ ގެޔަކާއި، މަރަދޫފޭދޫގެ ގެއެއްގެ އިތުރުން، ފޭދޫގެ ދެ ގެއެއް، އަދި ހުޅުދޫގެ ގެއެއްގެ ފުރާޅު ވަޔާ އެކު މަގުމައްޗަށް އެއްލާލާފައިވާ ކަމަށެވެ.

އެމްއެންޑީއެފްއިން ބުނީ އެ ފަސް ގޭގެ ފުރާޅު ހަދަން އެހީތެރިކަން ދީފައިވާ ކަމަށެވެ. އަދި މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާކަންވެސް އެމްއެންޑީއެފްއިން ވަނީ ފާހަގަކޮށްފަ އެވެ.

ރާއްޖެއަށް މޫސުން ގޯސްވެފައިވަނީ ރާއްޖޭގެ އިރުން ބޭ އޮފް ބެންގަލްގައި އުފެދިފައިވާ ކޮޅިގަނޑާއި ރާއްޖެއާ ދުރުން، ރާއްޖޭގެ އިރުދެކުނުގައި ވެސް ކޮޅިގަނޑުގެ ސަބަބުން ކަމަށް މެޓުން މީގެ ކުރިން ވަނީ ބުނެފަ އެވެ.

ބޭ އޮފް ބެންގަލް ކައިރީގައި އުފެދުނު ކޮޅިގަނޑުގެ ބާރުގަދަވެ، މިހާރު ވަނީ ތޫފާނެއްގެ ދަރަޖައަށް ބާރު ގަދަވެފަ އެވެ.

މޫސުމާ ބެހޭ ގައުމީ އިދާރާ، މެޓުން ނެރުނު އެލާޓްގައި ވަނީ މިއަދު އިރު އޮއްސުމާ ހަމައަށް ގަޑިއަކު 19 މޭލާއި 24 ދެމެދު އަދި ވިލާގަނޑުގައި ގަޑިއަކު 40 މޭލަށް ވައި ޖެހޭނެ ކަމަށް ލަފާކޮށްފަ އެވެ.

އަދި، ކަނޑުތައް ގަދަވާނެ ކަމަށް ލަފާކޮށް، ކަނޑު ދަތުރުކުރުމުގައި ސަމާލުވުމަށް ވެސް މެޓުން ވަނީ އިލްތިމާސްކޮށްފަ އެވެ.