ގައުމީ ގޮތުން ފާހަގަކުރަ މަސްވެރިންގެ ދުވަހާއި ގުޅިގެން މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ފައިސާގެ އިނާމު ލިބޭ ކެއްކުމުގެ މުބާރާތެއް ބޭއްވުމަށް ނިންމެވުމާއި ގުޅިގެން ބޮޑެތި ފާޑުކިޔުންތައް އެ ވުޒާރާއަށް އަމާޒުވެއްޖެ އެވެ.

މިގޮތުން މި ވެރިކަމުގައި އެންމެ ބޮޑަށް ނިކަމެތިކޮށްލި އެއް ދާއިރާއަކީ މަސްވެރިކަމުގެ ދާއިރާއަށް ވާއިރު މަސްވެރިން ބާނާ މަހަށް ހަމަ އަގު ނުލިބޭ ވާހަކައަކީ ފާއިތުވި އެއް އަހަރު އެންމެ ގިނައިން ދެކެވުނު އެއް ވާހަކައެވެ.

މަސްވެރިން ބާނާ މަސް ކިރާތާ 48 ގަޑި އިރު ތެރޭ މަސްވެރިންނަށް ފައިސާ ލިބިގެންދާނެ ކަމަށް ރައީސް މުއިއްޒު ވައުދުވެވަޑައިގެންވީ ނަމަވެސް ފާއިތުވި އެއް އަހަރު ތެރޭގައި މަސްވެރިންނަށް ފައިސާކޮޅު ލިބިފައިވަނީ އެތަކެއް އިހުތިޖާޖެއް ރާއްޖޭގެ އެކި ސަރަހައްދުތަކުގައި ކުރުމުން ކަން ވަނީ ފެނިގެން ގޮސްފައެވެ.

އެހެންކަމުން ސަރުކާރުން މިހާ ޒިންމާދާރުކަން ކުޑަކޮށް މަސްވެރިންނާއި މެދު ކަންތައް ކޮށްފައިވާއިރު މަސްވެރިންގެ ދުވަހުގެ ނަމުގައި ދުވަހެއް ފާހަގަކުރާ އިރު އެމީހުންގެ އަގު ވަޒަން ކުރަންޖެހޭ ވަރަށް ނުކޮށް މިފަދަ ހަރަކާތްތައް ކުރިއަށް ގެންދިޔުމަކީ މަސްވެރިންގެ އަގު އިތުރަށް ވައްޓާލުން ކަމުގައި ގިނަ ފަރާތްތަކުން އަންނަނީ ބުނަމުންނެވެ.

މިނިސްޓްރީން ކުރިއަށް ގެންދާ މި މުބާރާތުން އެއް ވަނަ ދާ ފަރާތަކަށް 10،000ރ. ދެވަނައަށް ދާ ފަރާތަކަށް 7،000ރ. އަދި ތިން ވަަނައަށް ދާ ފަރާތަކަށް 5،000ރ.ގެ އިނާމެއް ދޭ ގޮތަށް ވަނީ ހަމަޖެހިފައެވެ. މަސްވެރިންގެ ދުވަހުގައި އެމީހުންނަށް ހައްގު މިންވަރަކީ މިއީތޯ މަސްވެރިން އަންނަނީ ސަރުކާރަށް ސުވާލު އުފައްދަމުންނެވެ.

އަދި މަސްވެރިންގެ ވޯޓު ކޮޅު ލިބިގެން ވެރިކަމަށް އިންތިޚާބުވެ މަސްވެރިންގެ އަގު ވަޒަން މިއަށް ވުރެ ރަނގަޅަށް ކުރަންޖެހޭނެ ކަމަށްވެސް އެ ފަރާތްތަކުން އަންނަނީ ބުނަމުންނެވެ.