މީޑީޔާތަކުގެ ބްލެކް ލިސްޓެއް ނޯންނާނެކަމަށް ވިދާޅުވެ، ރައީސް ޑރ.މުހައްމަދު މުއިއްޒު އިތުރުފުޅު ހައްދަވައިފިއެވެ.
ރައްޔިތުން މަޖިލީހުގައި އެމަނިކުފާނު އިއްވި އެންމެ ފުރަތަމަ ރިޔާސީ ބަޔާނުގައި ވަނީ މީޑިޔާތައް ބްލެކްލިސްޓް ކުރުން މި ސަރުކާރުގައި ނޯންނާނެކަމަށް ވިދާޅުވެފައެވެ.
ނަމަވެސް މި ސަރުކާރުން ވަނީ ދެ ނޫސް ވެބްސައިޓެއް ބްލޮކް ކޮށްފައެވެ.
22 ޑިސެމްބަރު 2023 ވަނަ ދުވަހު ވަނީ ސަރުކާރާ ދެކޮޅަށް ޝާއިއު ކުރާ "ދިޔަވަރު" އަދި "ކުރުސީ" މި ދެ ނޫސް ވެބްސައިޓް ބްލޮކްކޮްށްލާފައެވެ.
އެކަމާ ގުޅިގެން ވަރަށް ގިނަ ފަރާތްތަކުން ވަނީ ސަރުކާރަށް ފާޑުވެސް އަމާޒުކުރައްވާފައެވެ. އެގޮތުން ނޫސްތައް ބްލޮކް ކުރުމަކީ އެތައް އަަހަރެއް ފަހަތައް ސޮއްސާލުންކަމަށް ވެސް ގިނަ ފަރާތްތަކުން ވަނީ ބުނެފައެވެ.
ނޫސްތައް ބްލޮކް ކުރުމުން މޯލްޑިވްސް ޖާނަލިސްޓް އެސޯސިއޭޝަން، ޓްރާންސްޕޭރަންސީ އެމްވީ، އަދި އޭގެއިތުރުން މޯލްޑިވްސް މީޑިޔާ ކައުންސިލްވެސް ވަނީ ސަރުކާރުގެ އެ އަމަލު ކުށްވެރިކޮށް ފާޑުކިޔާފައެވެ.
މޯލްޑިވްސް މީޑީޔާ ކައުންސިލުން ވަނީ ނޫސް ބަޔާން ނެރެ ރެޖިސްޓާރ ނުކުރާ ވެބްސައިޓަކީ ވެސް މީޑިޔާ ކައުންސިލްގެ ގަވައިދުގައި ނޫހެއްކަމަށް ބުނެފައެވެ.
ސަރުކާރުން އެއްވެސް މީޑިޔާއެއް ބްލެކްލިސްޓް ނުކުރާނެކަމަށް ބުނުމުން އެއީ ހެއްދެވި ބޮޑު އިތުރުފުޅެއްކަމަށް ގިނަ ފަރާތްތަކުން އަންނަނީ ބުނަމުންނެވެ.
