އެޖެންސީ ހިންގަން އިމާރާތެއް ކުއްޔަށް ހިފި ގޮތާ ގުޅޭގޮތުން ތުހުމަތުކޮށް ފަތުރަމުންދާ ވާހަަކަތަކާ ގުޅޭ މިނިވަން ތަހުގީގެއް ކޮށްދިނުމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން އެދިފައިވާ މައްސަލަ ބަލަން ފަށައިފިއެވެ.

އެންޓި ކޮރަޮޕްޝަން ކޮމިޝަނުން މިކަމާ ގުޅިގެން ހާމަކުރި މައުލޫމާތުގައިވާ ގޮތުގައި މައްސަލަ ރެޖިސްޓްރީކޮށް މިހާރު ތަހުގީގު ވެސް ވަނީ ފަށާފައެވެ.

ސޯޝަލް މީޑިއާގައި ދައުރުވަމުން އަންނަ ލިޔެކިޔުތަކުން އެނގޭ ގޮތުގައި އެންސްޕާ އާއި އެމްއެމް ޓީވީ ހިންގާ ކުންފުނި މޯލްޑިވްސް މީޑިއާ ހައުސްއާ ދެމެދު 34.8 މިލިއަން ރުފިޔާގެ އެއްބަސްވުމެއް ހަދާފައިވެއެވެ. ބަލާ ހޯދާލުމުން ހާމަވެގެން ދިޔައީ އެއީ އެންސްޕާ ހިންގުމަށް ފަސް އަހަރު ދުވަހު މއ. ސީރާޒީގެ ދެ ފަންގިފިލާ ކުއްޔަށް ހިފުމާ ގުޅޭ އެއްބަސްވުމެއްކަމެވެ.

ތަފްސީލަށް ބަލާލާއިރު، އެ ގެއިން ދެ ފަންގިފިލާ ހިފާފައިވަނީ މަހަކު 580،000ރ އެންސްޕާއިން ކުއްޔަށް ހިފާފައިވެއެވެ. އަދި މިނިސްޓްރީ އޮފް ފިނޭންސްއިން ހިންގާ ޓެންޑާ ބޯޑް މެދުވެރިކޮށް ހަދާފައިވާ މި އެއްބަސްވުމުގެ ދަށުން، މީޑިއާ ހައުސްއިން ހަމަ އެ އިމާރާތުން 4 ފަންގިފިލާ ކުއްޔަށް ހިފާފައިވާކަން ހާމަވެފައިވެއެވެ.

އޭގެ ތެރެއިން 2 ފަންގިފިލާ އެންސްޕާ އަށް ދޫކޮށްފައިވާއިރު، އަނެއް 2 ފަންގިފިލާ ބޭނުންކުރަނީ ރައީސް މުއިއްޒުގެ ޓީވީ ސްޓޭޝަންގެ މަސައްކަތްތަކަށެވެ.

އެނގިފައިވާ ގޮތުގައި އެ ހަތަރު ފިލާއަށް ޖުމްލަ ދައްކަން ޖެހެނީ 580،000ރ އެވެ. އެހެންކަމުން އެންސްޕާ މެދުވެރިކޮށް އެމްއެމް ޓީވީ ހިންގާ ދެ ފަންގިފިލާގެ ކުލި ވެސް ހަމަޖައްސާފައިވެއެވެ.

އެހެންކަމުން މިއީ ބޮޑު އަގުގައި ރައީސް މުއިއްޒުގެ ޓީވީ ހިންގާ ކުންފުންޏަށް މަންފާވާ ގޮތަށް ވަނީ ރައްޔިތުންގެ އާސަންދަ ފައިސާ އިސްރާފުކޮށް ކޮށްފައިވާ ވައްކަމެއްގެ ގޮތުގައި ގިނަ ބަޔަކު ސިފަކުރެއެވެ.