ރާއްޖޭގެ އެކި ހިސާބުތަކަށް މިއަދު ވެސް ވިއްސާރަ ކުރާނެ ކަމަށް ބެލެވޭ އިރު، ބައެއް ރަށްތަކަށް ގުގުރުން އެކަށީގެންވާ ކަމަށް މޫސުމާ ބެހޭ ގައުމީ އިދާރާ (މެޓް) އިން ލަފާކޮށްފިއެވެ.

މެޓުން ހާމަކޮށްފައިވާ ގޮތުގައި ރާއްޖޭގެ އެކި ހިސާބުތަކަށް ވިއްސާރަ ކުރާނެ ކަމަށް ލަފާ ކުރެވޭ ކަމަށެވެ. އެގޮތުން ދެކުނުގެ އަތޮޅުތަކަށް ގަޑިއަކު 15 މޭލާ 25 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާ ކުރެވޭ ކަމަށް މެޓުން ހާމަކޮށްފައިވެއެވެ.

ރާއްޖޭގެ އެހެން ހިސާބުތަކަށް ގަޑިއަކު ގާތްގަނޑަކަށް 13 މޭލާއި 23 މޭލުގެ ބާރުމިނުގައި ވައި ގަދަވާނެ ކަމަށް ލަފާކުރެވޭއިރު ވިލާގަނޑުގައި ގާތްގަނޑަކަށް 45 މޭލު ބާރުމިނުގައި ވައިގަދަވުން އެކަށީގެންވާ ކަމަށްވެސް މެޓް އޮފީހުން ހާމަކޮށްފައިވެއެވެ.

ރާއްޖޭގެ ކަނޑުތައް އާދައިގެ ވަރަކަށް ގަދަވާނެ ކަމަށް ބެލެވޭއިރު، ދެކުނުގެ އަތޮޅުތަކުގައި ރާޅުގެ އުސްމިން ގާތްގަނޑަކަށް 5 ފޫޓާއި 8 ފޫޓާއި ދެމެދުގައި ހުންނާނެ ކަމަށް ބެލެވެއެވެ.. އަދި އުތުރާއި މެދުރާއްޖެ ތެރޭގައި ގާތްގަޑަކަށް ހަތަރު ފޫޓާއި ހަތް ފޫޓާ ދޭތެރޭގައި ކަނޑުގެ ރާޅުތައް ބޮޑުވާނެ ކަމަށްވެސް މެޓް އޮފީހުން ލަފާކޮށްފައިވެއެވެ.

ރާއްޖޭގެ ބައެއް ސަރަހައްދުތަކަށް މިހާރު މޫސުން ގޯސްވެފައިވާއިރު، މޫސުމަށް ހާއްސަ ސަމާލުކަމެއް ހުރިހާ ފަރާތްތަކުން ޚާއްސަކޮށް ކަނޑު ދަތުރުފަތުރު ކުރާ ފަރާތްތަކުން ދިނުމަށް ކަމާބެހޭ އިދާރާތަކުން އިލްތިމާސް ކުރެއެވެ.