މި މަހުގެ އަށް ވަނަ ދުވަހު އެކްސް ހެންޑްލްގައި "ޗާލީ ތުއްތު"ގެ ނަމުގައި ހިންގާ އެކައުންޓުން ކުރި ޕޯސްޓަކާ ގުޅިގެން އެމްޑީޕީގެ ސޯޝަލް މީޑިއާ އެކްޓިވިސްޓު ހުސެއިން ޝާފިއު (ތުއްތު)އަށް ކުރަނީ ތިން ތުހުމަތެއްކަން ހާމަވެއްޖެއެވެ.

އެގޮތުން މިއަދު ހެންވޭރު ޕޮލިސް ސްޓޭޝަނަށް ޝާފިއު ހާޒިރުކޮށް ބަޔާން ނަގާފައިވެއެވެ. އޭނާ ދިން ބަޔާނުގައި ބުނެފައިވަނީ އެކްސްގައި ނޮވެމްބަރު 28 ވަނަ ދުވަހުގެ 1:14ގައި ކުރި ޕޯސްޓުގައި ދައްކާފައިވާ ވާހަކައަކީ ވަކި މީހަކަށް ނިސްބަތްކޮށް ދައްކާފައިވާ ވާހަކަތަކެއް ނޫން ކަމަށާ އެ ޓްވީޓުގައި "ހަޑި ހުތުރު" ބަސްވެސް ބޭނުންކޮށްފައި ނުވާނެ ކަމަށެވެ.

އެ ޕޯސްޓުގައި ހުރި އިބާރާތުގެ ސަބަބުން މީހެއްގެ ހިތުގައި ބިރުވެރިކަން އުފެދިފައިވާ ނަމަ އެމީހަކަށް އަވަސް ޝިފާއަކަށް އެދޭ ކަމަށާ މީހެއްގެ ހިތުގައި ބިރުވެރިކަން އުފެދިދާނެ ފަދަ އެއްވެސް ވާހަކައެއް އެ ޕޯސްޓުގައި ނުވާނެ ކަމަށްވެސް ޝާފިއުގެ ބަޔާނުގައިވެއެވެ.

ހަމައެހެންމެ އޭނާގެ ޕޯސްޓަށް ރާގެއް ދީގެން އުޅެނީ ދިވެހި ފުލުހުންގެ އިދާރާއިން ކަމަށާ "ކައްޒާބަކީ" ވެސް ވަކި މީހަކުކަމަށް ނިސްބަތްކުރީވެސް ފުލުހުންކަމަށް ތުއްތުގެ ބަޔާނުގައިވެއެވެ.

ޗާލީ ތުއްތުއަކީ އޭނާ އެކްސްގައި ބޭނުންކުރާ ހެންޑްލްއެއް ކަމަށާ އިތުރަށް އެކަމުގައި ދައްކާނެ ވާހަކައެއް ނެތުމުން ހަނު ހުންނަނީ ކަމަށްވެސް ބަޔާނުގައިވެއެވެ.

ގާތްގަނޑަކަށް ގަޑިއެއްހާއިރު ހެންވޭރު ޕޮލިސް ސްޓޭޝަނުގައި ފުލުހުންގެ ސުވާލުތަކަށް ޖަވާބުދާރީވުމަށް މަޑުކުރުމަށް ފަހު ޝާފިއު ނުކުތުމުން އޭނާގެ ވަކީލުން މީޑިއާއަށް ބުނީ ފުލުހުން އޭނާގެ މައްޗަށް، ރާއްޖޭގެ ގާނޫނުލްއުގޫބާތުގެ ދަށުން ތަފާތު ތިން ތުހުމަތެއް ކުރާ ކަމަށެވެ.

އެއީ، އަނިޔާއެއް ދީފާނެކަމުގެ ބިރު ދެއްކުމުގެ ކުށާއި މީހަކު މަރުވެދާނެ ނުވަތަ އޭނާގެ ހަށިގަނޑަށް ބޮޑު އަނިޔާއެއް ލިބިދާނެ ކަމެއްގެ ބިރެއް ކުރިމަތި ކުރުވުމުގެ ކުށް އަދި ހަޑިހުތުރު އެއްޗެއް ހިމެނޭ ވަސީލަތެއް ޝާއިއު ކުރުމާއި އާންމުކޮށް ހުޅުވާލައިގެން ދެއްކުމާއި އެފަދަ އެއްޗެއް ފޯރުކޮށްދިނުމުގެ ކުށުގެ ތުހުމަތެވެ.

އޭނާ ފުލުހަށް ހާޒިރުކުރާތީ އެމްޑީޕީގެ ބައެއް އިސްވެރިންނާއި ގިނަ އަދަދެއްގެ ސަޕޯޓަރުން ވެސް މިއަދު ވަނީ ފުލުހުންގެ އިދާރާ ކައިިރިއަށް އެއްވެ، ނުރުހުން ފާޅުކޮށްފައެވެ.

ޝާފިއުގެ އިތުރުން ރައީސް ޑރ. މުހައްމަދު މުއިއްޒު އާއި ސަރުކާރުގެ އިސްވެރިންގެ "އަބުރުފުޅަށް" އެރި ކަމަށް ބުނެ ކައުންސިލަރުންނަށް ވެސް ފިޔަވަޅު އަޅަން ފަށާފައިވާ ކަމަށް ފައްޔާޒް ވިދާޅުވި އެވެ. އޭނާ ފާހަގަކުރެއްވީ ރައީސްގެ އަބުރަށް އަރައިގަތް ކަމަށް ބުނެ ގދ. ގައްދޫ ކައުންސިލްގެ ރައީސްގެ މައްސަލަ ބެލުމަށް އެލްޖީއޭ އިން އެންގި މައްސަލަ އަށެވެ.

މީގެ އިތުރުން، ރައީސް މުއިއްޒު އޯގަސްޓު، 2024، ސިންގަޕޫރުގެ ޝޮޕިން މޯލެއްގައި އުޅުއްވަނިކޮށް ފޮޓޯއެއް ނެގި މައްސަލަ ވެސް ފުލުހުން އަންނަނީ ތަހުގީގު ކުރަމުން ނެވެ.

ހިޔާލުފާޅުކުރުމާއި އެއްވެ އުޅުމުގެ މިނިވަން ކަމަށް ރައީސް މުއިއްޒު ސަރުކާރުން އަންނަނީ ވަރަށް ބޮޑަށް ހުރަސް އަޅަމުން ނެވެ