ރައީސް ޑރ. މުހައްމަދު މުއިއްޒުގެ ސިޔާސީ މަސައްކަތަށް އުނދަގޫވާތީ ޕީޕީއެމް އުވައިލަން އެ ޕާޓީގެ ސެނެޓުން ދާދި ދެންމެ ފާސްކޮށްފި އެވެ.

ޕީޕީއެމް އަކީ ކުރިން ޑީއާރުޕީގެ އެތެރޭގައި އުފެދުނު ހިޔާލު ތަފާތުވުންތަކުގެ ތެރެއިން، ކުރީގެ ރައީސް މައުމޫން އަބްދުއް ގައްޔޫމާއި އެ މަނިކުފާނުގެ ސަޕޯޓަރުން ޑީއާރުޕީން ވަކިވެގެން އުފެއްދި ޕާޓީ އެވެ.

ޕީޕީއެމް ރަޖިސްޓްރީ ކުރީ 27 އޮކްޓޯބަރު 2011ގަ އެވެ. އެހެން ނަމަވެސް ފަހުން ރައީސް ޔާމީންގެ ވެރިކަމުގައި އެމަނިކުފާނުގެ ބޭބޭފުޅު ރައީސް މައުމޫނާ ދެ ބޭފުޅުންގެ ދެމެދު އުފެދުނު ހިޔާލު ތަފާތުވުންތަކުގައި މައުމޫން ވަނީ އެޕާޓީން ވަކިކޮށްފަ އެވެ.

އޭގެ ފަހުން މިދިޔަ ރިޔާސީ އިންތިހާބާ ހަމައަށް އެޕާޓީގެ ލީޑަރެއްގެ ގޮތުގައި ހުންނެވީ ރައީސް ޔާމީންނެވެ.  

ޕާޓީ އުވާލުމަށް ޕީޕީއެމްގެ ލީޑަޝިޕުން ހުށަހެޅި ގަރާރު ފާސްވީ ބައްދަލުވުމުގައި ބައިވެރިވި 42 ސެނެޓަރުންގެ އިއްތިފާގުންނެވެ.

މިގޮތަށް ފާސްކުރި ބައްދަލުވުމުގެ ރިޔާސަތުގައި އިންނެވީ އެ ޕާޓީގެ ނައިބު ރައީސުން ކަމަށްވާ ފިޝަރީޒް މިނިސްޓަރު އަހުމަދު ޝިޔާމު އާ ޣައްސާން މައުމޫނުގެ އިތުރުން ޑރ އަބްދުﷲ ޚަލީލުއެވެ. ބައްދަލުވުން ބޭއްވީ ޕީއެންސީގެ އޮފީހުގަ އެވެ.

މި އަހަރުގެ ސެޕްޓެމްބަރު 19 އާ ހަމައަށް ވެސް އެ ޕާޓީގައި 34،694 މެންބަރުން ތިބި ކަމަށް އިލެކްޝަންސް ކޮމިޝަން (އީސީ)ގެ ވެބްސައިޓުން ދައްކައެވެ.

ރައީސް މުއިއްޒު ވެރިކަމަށް ވަޑައިގެންނެވި ފަހުން ޕީޕީއެމްގެ ހަރަކާތްތައް އޮތީ ހުއްޓިފަ އެވެ. އޭގެ ބަދަލުގައި ކުޑަ ޕާޓީއެއްގެ ގޮތުގައި އޮތް ޕީއެންސީ ވަރުގަދަ ކުރުމުގެ މަސައްކަތް ފެށި އެވެ. މި އަހަރު ބޭއްވި ރައްޔިތުންގެ މަޖިލީހުގެ އިންތިހާބަށް ވެސް ހުރިހާ ކެންޑިޑޭޓުން ނެރުނީ ޕީއެންސީގެ ނަމުގަ އެވެ.

ރައީސް ޔާމީން ޕީޕީއެމް އިސްތިއުފާ ދެއްވީ ޖަލުން ގެކޮޅަށް ބަދަލު ކުރެއްވި ފަހުން ރައީސް މުއިއްޒު ވެރިކަމުގެ ހުވާ ކުރެއްވުމުގެ ކުރިންނެވެ.

ޕީއެންސީ އުވާލުމަށް މަސައްކަތް ފެށުމާއެކު އުވާލުމަށް ނިންމާ ސިޔާސީ ޕާޓީތަކުގެ ކުލަޔާއި ނަމާއި ނިޝާން، އެ ޕާޓީއެއް އުވާލާތާ ފަސް އަހަރު ވަންދެން ބޭނުން ނުކުރެވޭ ގޮތަށް ގާނޫނު ބަދަލުކޮށްފަ އެވެ. ސަރުކާރުން ހުށަހެޅި މި ބިލު ވެރިކަންކުރާ ޕީއެންސީގެ މަޖިލީހުން ފާސްކޮށް މިހާރު ވަނީ ތަސްދީގުވެސްކޮށްފަ އެވެ.

އެހެންކަމުން ޕީޕީއެމް އުވާލުމާއެކު އެ ޕާޓީގެ ކުލަޔާއި، ނަމާއި، ނިޝާނާއި، ލޯގޯ، އަދި އެހެންވެސް ޕާޓީ ރަމްޒު ކޮށްދޭ އެއްޗެއް ކުރިއަށް އޮތް ފަސް އަހަރު ތެރޭ ސިޔާސީ ޕާޓީއަކަށް ބޭނުމެއް ނުކުރެވޭނެ އެވެ.

މިދިޔަ ރިޔާސީ އިންތިހާބުގައި ޕީޕީއެމް/ޕީއެންސީގެ ރިޔާސީ ޓިކެޓު ފުރަތަމަ ހަވާލުކުރީ ރައީސް ޔާމީނަށެވެ. ނަމަވެސް ރައީސް ޔާމީން އޭރު 11 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާތީ އެމަނިކުފާނަށް އިންތިހާބުގައި ވާދަނުކުރެވޭނެ ކަމަށް ސުޕްރީމް ކޯޓުން ކަނޑައެޅި އެވެ.

ރައީސް ޔާމީނަށް އިންތިހާބުގައި ވާދަނުކުރެއްވޭނެ ހާލަތެއްގައި ޕީއެންސީން ކެންޑިޑޭޓަކު ނެރެން ނިންމި އެވެ. ޕީއެންސީގެ ކެންޑިޑޭޓަކަށް އިންތިހާބުވި، ރައީސް މުއިއްޒަށް ތާއީދުކުރަން ޕީޕީއެމްގެ ސެނެޓުން ނިންމީ އިންތިހާބު ބޮއިކޮޓް ކުރުމާ މެދު ގޮތެއް ނިންމަން ރައީސް ޔާމީން ހުށަހަޅުއްވާފައި ވަނިކޮށެވެ.

ރައީސް މުއިއްޒު ރިޔާސީ އިންތިހާބު ކާމިޔާބުކުރެއްވި އިރު ޕީއެންސީގައި ތިބީ 3،000އެއްހާ މެންބަރުންނެވެ. ނަމަވެސް ޑރ. މުއިއްޒު ވެރިކަމުގެ ހުވާ ކުރެއްވުމަށް ފަހު ސަރުކާރުގެ ނުފޫޒާއި ބާރު ބޭނުން ކުރައްވާ އަންނަނީ ޕީއެންސީ ވަރުގަދަ ކުރެއްވުމަށް މަސައްކަތް ކުރައްވަމުން ނެވެ. އަދި ޕީއެންސީ އަށް މެންބަރުން އިތުރުކުރަން ގިނަ މަސައްކަތްތަކެއް ކުރަމުން އަންނަ އިރު ޕީޕީއެމުން ވެސް ޕީއެންސީއަށް މެންބަރުން ބަދަލުކުރާ ކަމަށް އަޑު ފެތުރިފައިވެ އެވެ.