މިއަދުގެ ހަވީރު ރައްޔިތުންގެ މަޖިލީހުގެ އިދާރާގައި ކުރިއަށް ގެންދިޔަ ޕީއެންސީ ޕީޖީ ގްރޫޕުގެ ބައްދަލުވުމުގައި ރައީސް އޮފީހުގެ ދެ މިނިސްޓަރުން ބައިވެރިވެފައިވާއިރު އެ ދެ މިނިސްޓަރުން މެދުވެރިކޮށް ޕީއެންސީގެ މަޖިލިސް މެމްބަރުންތަކެއް ގިނަ ޑިމާންޑްތަކެއް ކޮށްފައިވާ ކަމަށް މައުލޫމާތު ލިބިއްޖެއެވެ.

ނަން ހާމަނުކުރުމަށް އެދި "ތޭރަ އޮންލައިން"އަށް މައުލޫމާތު ދިން މަޖިލިސް ޕީއެންސީގެ މެމްބަރަކު ހާމަކުރި ގޮތުގައި ރައީސް އޮފީހުގެ ދެ މިނިސްޓަރުން، އަލީ އާރިފް އާއި އަބްދުﷲ ނާސިރު ބައިވެރިވެވަޑައިގެންނެވި ޕީއެންސީގެ ޕީޖީ ގުރޫޕު ބައްދަލުވުމުގައި ދައުލަތުގެ ތިން މިނިސްޓަރަކު ވަކިކުރުމަށާއި ޕާޓީ ހިންގުމުގެ ބާރު މަޖިލީހުގެ ރައީސް، އަބްދުއްރަހީމް އަބްދުﷲއަށް ދިނުން ހިމެނޭހެން ގިނަ ޑިމާންޑުތަކެއްކޮށްފައިވެއެވެ.

އެގޮތުން ގިނަ މެންބަރުން ޑިމާންޑު ކުރީ ހޯމް މިނިސްޓަރު އިހުސާން އާއި އެޑިއުކޭޝަން މިނިސްޓަރާއި އޭޖީ ވަކި ކުރަން އަދި ސިޔާސީ ބާރުތަކާއި ޕާޓީ ހިންގުމުގެ ބާރުތައް އަދުރޭއަށްދީ އަދުރޭއާ މަޝްވަރާ ކޮށްގެން ކަންކަން ކުރިއަށް ގެންދަންކަމަށް އެ މެމްބަރު ކިޔައިދީފައިވެއެވެ. އަދި އެހެން އެކަން ނުކޮށްފި ނަމަ އެ މެމްބަރުން ޕީއެންސީއިން ވަކިވާނެކަމުގެ އިންޒާރު ދީފައިވާ ކަމަށް ވެސް ވަނީ މައުލޫމާތު ލިބިފައެވެ.

މަޖިލީހުގައި އޮތް ޕީއެންސީގެ ޕީޖީ ބައްދަލުވުމެއްގައި ރައީސް އޮފީހުގެ ދެ މިނިސްޓަރުން ބައިވެރިވެވަޑައިގެންނެވިއިރު، ޕީއެންސީގެ މަޖިލިސް މެންބަރުންގެ މައްޗަށް ރައީސުލްޖުމްހޫރިއްޔާ ނުފޫޒުފޯރުވާ ކޮންޓްރޯލުކުރުމަށް ބޮޑެތި އަދަދުތަކުން ފައިސާ ބަހާކަމުގެ އަޑުގަދަވެފައި މީގެކުރިން ވެއެވެ.