"ވާނުވާ" ބަންދާމެދު ރައީސް ޔާމީން ކަންބޮޑުވުން ފާޅުކުރައްވައިފި އެވެ. ޝަރީއަތް ނިމެންދެން ބަންދުކުރުމަށް ފަހު މައްސަލަ ނުނިމި އެތައް ދުވަހެއް ވަންދެން "ވާނުވާ" ގައި ތިބެން ޖެހޭ ކަމުގެ ޝަކުވާ މެދުކެނޑުމެއް ނެތި އިވޭތާ އެތައް އަހަރެކެވެ.

ރައީސް ޔާމީން މިކަންބޮޑުވުން ފާޅުކުރެއްވީ މިރޭ ޕީއެންއެފް އޮފީހުގައި ބޭއްވި ޖަލްސާގައި އެވެ.

ރައީސް ޔާމީން ވިދާޅުވީ، އެމަނިކުފާނު ޖަލުން މިނިވަން ވިފަހުން އެންމެ ބާރަށް ދެއްކި އެއް ވާހަކައަކީ ވާނުވާ ބަންދުގެ ވާހަކަ ކަމަށެވެ. ރައީސް ޔާމީން ވިދާޅުވީ އިހައްދުވަހު އަވަސް އަރުވާލައިގެން ގާނޫނޫ އަސާސީ ބަދަލުކޮށްލިއިރު ވާނުވާ ބަންދުގެ މައްސަލައަށް ވެސް އަވަސް ހައްލެއް ލިބެން ޖެހޭ ކަމަށެވެ.

ރައީސް ޔާމީން ވިދާޅުވީ ގިނަފަހަރަށް ވާނުވާ އަށް މީހާ ޖަހާއިރު އަދި ޝަރީއަތަށް މައްސަލަވެސް ނުުވަންނަ ކަމަށެވެ.

މި ސަރުކާރުގެ ހޯމް މިނިސްޓަރު އަލީ އިހުސާނަކީ ވެރިކަމުގެ ކުރީކޮޅު ވަރަށް ގަދަޔަށް ވާނުވާ ބަންދުގެ ވާހަކަ ދެއްކެވި ބޭފުޅެއް ކަމަށް ރައީސް ޔާމީން ވިދާޅުވި އެވެ. އެކަމަކު، މިހާރު އެ ވާހަކަ ނުދައްކަވާ ކަމަށް އެ މަނިކުފާނު ވިދާޅުވި އެވެ.

ރައީސް ޔާމީން ވިދާޅުވީ ވާނުވާ އަށް ހައްލު ހޯދުމަކީ މިނިސްޓަރު އިހްސާން އަށް ވަރަށް ފަސޭހައިން ވާނެ ކަމެއް ކަމަށާއި އެގޮތުން ތަހުގީގު ނިންމުމަށް ވާނުވާ މުއްދަތެއް ޖެހިދާނެ ކަމަށެވެ. ނަމަވެސް އޭގެ ފަހުން އެމީހަކު ދާންވާނީ ޝަރީއަތުގެ ތެރެއިން ކަމަށެވެ.

ރައީސް ޔާމީން ވިދާޅުވީ މީހުން ވާނުވާގައި އާއިލާއަށް ފޮރުވައިގެން ނުބޭތިއްބޭ ސަބަބަކީ ވާނުވާ ބަންދުން މީހާ ވީއްލޭއިރު އެމީހާއަށް ކުށްސާބިތުނުވާ ހާލުގައި ގާނުނޫނުގެ ތެރެއިން ބަދަލު ހޯދޭނެ ގޮތެއް ނެތުން ކަމަށެވެ.

ރައީސް ޔާމީން އިތުރަށް ވިދާޅުވީ ވާނުވާއަށް މި ސަރުކާރުން ހައްލު ހޯދައި ނުދޭ އެއް ސަބަބަކީ ރައްޔިތުންގެ ދަރުބާރުގައި ރައްޔިތުންގެ ތާއީދު މުއިއްޒުއަށް ނެތުން ކަމަށެވެ. އެހެން ކަމުން އެއްވުންތަކާއި މުޒާހަރާތަކުން ސަރުކާރުން ބޭނުންވާބަޔަކު ނަގައިގެން ޖަލުގައި "ވާނުވާ" ޖަހާ ބަންދުކުރުން ކަމަށެވެ.

ގޭންގު ކުށްތަކާ ދެކޮޅުކަމާއި އަދި އެކަން ހުއްޓުވަން ޖެހޭކަން ފާހަގަކުރައްވައި އެ މަނިކުފާނު ވިދާޅުވީ، ވަކި ގޮތަކަށް ހެދުން އަޅައި ނުވަތަ ވަކި ނިޝާންތަކެއް ބޭނުންކުރާ ބަޔަކީ ގޭންގުގެ ގޮތުގައި ދެކުން ވެސް ގޯސް ކަމަށެވެ.

ތުހުމަތުކުރެވޭ މީހާ ޝަރީއަތް ނިމެންދެން ބަންދު ކުރަން ނެރޭ އަމުރަކީ ކޯޓުން ބަންދަށް ލުޔެއް ނުދޭހާ ހިނދަކު، އެ މައްސަލައެއް މުޅިން ނިމެންދެން ދެމި އޮންނަ އެއްޗެކެވެ. މި އިޖްރާއާތު މިހާރު މަޝްހޫރު ވެފައިވަނީ "ވާނުވާ" ގެ ނަމުންނެވެ. "ވާނުވާ" މި ބަސް އުފެއްދީ އެކި މައްސަލަތަކުގައި މިގޮތަށް ޝަރީއަތް ނިމެންދެން ޖަލުގައި ބަންދު ކޮށްފައި ތިބި މީހުން ކަމަށް ބުނެ އުޅެ އެވެ.

ވާނުވާގެ މައްސަލައަކީ ޖުޑީޝަރީގެ ތެރެއިން އެންމެ ޝަކުވާ ބޮޑު އަދި އެކަމެއް ހައްލުކުރަން އެންމެ ގިނަ މަސައްކަތް ކުރެވޭ އެއް މައްސަލަ އެވެ. އެހެން ނަމަވެސް އެކި ފޯމިއުލާތައް ބޭނުން ކޮށްގެން ވެސް ފާއިތުވި ސަރުކާރުތަކަށް ނަތީޖާއެއް ނެރެވިފައެއް ނެތެވެ.