ފުވައްމުލައް ސިޓީގެ ގެޔެއްގައި ނުރައްކާތެރި އަލިފާނުގެ ހާދިސާއެއް ހިނގައިފި އެވެ.
މި ހާދިސާ ހިނގާފައިވަނީ ޝިވާ ނަމަކަށް ކިޔާ ގެޔެއްގެ އެނދެއްގައި އަޅާފައި އޮތް ގޮނދަޑިއެއްގައި ރޯވެގެން ކަމަށް މައުލޫމާތު ލިބިފައިވެ އެވެ.
އެމްއެންޑީއެފް އިން ވިދާޅުވީ، އެ ގޭގައި އަލިފާން ރޯވުމާއެކު އެމްއެންޑީއެފް ސަދަން އޭރިއާ ކޮމާންޑް، ފުވައްމުލަކު ފަޔަރ ސްޓޭޝަނުން ހަރަކާތްތެރިވެފައިވާ ކަަމަށެވެ.
ހާދިސާގެ ރިޕޯޓް ސިފައިންނަށް ލިބިފައިވަނީ ރޭ 22:00 ހާއިރު ކަމަށް ސިފައިން މައުލޫމާތު ދެއެވެ. އަދި ގާތްގަނޑަކަށް 40 މިނިޓް ތެރޭ އަލިފާންގަނޑު ކޮންޓްރޯލް ކުރެވިފައިވާ ކަމަށްވެސް އެ ފަރާތްތަކުން މައުލޫމާތު ދެއެވެ.
މި ހާދިސާ ހިނގި ވަގުތު ކޮޓަރީގައި ކުޑަ ދެކުދިން ތިބި ކަމަށް އެ ރަށުން މައުލޫމާތު ދެއެވެ.
މީގެ އިތުރުން، މި ހާދިސާގައި އެއްވެސް ފަރާތަކަށް އަނިޔާއެއް ލިބިފައިވާ ކަމަށް އެއްވެސް އިދާރާއަކުން ރިޕޯޓްކޮށްފައިނުވެ އެވެ.
