އެޖެންޑާކުރާނެ މަސައްކަތެއް ނެތުމުން ރައްޔިތުންގެ މަޖިލީހުގެ މިއަދުގެ ޖަލްސާ ކެންސަލްކޮށްފި އެވެ.

ރައްޔިތުންގެ މަޖިލީހުގެ ރަސްމީ މީޑިއާ ގްރޫޕުގައި ޖަލްސާ ނުބާއްވަނީތޯ ނޫސްވެރިޔަކު ސުވާލުކުރުމުން، ދިން ޖަވާބުގައި މަޖިލީހުގެ އޮފިޝަލަކު ވިދާޅުވީ ދެން ޖަލްސާއެއް އޮންނާނީ އަންނަ ހަފުތާގެ ހޯމަ ދުވަހު ކަމަށެވެ. އެއާ ގުޅޭ އިތުރު ތަފުސީލެއް ނުދެ އެވެ.

މަޖިލީހުގެ ޖަލްސާ ނުބާއްވަން ނިންމިއިރު، މަޖިލީހުގެ ސުޕަ މެޖޯރިޓީ އޮތް ޕީއެންސީން މި ދައުރު މި މަހުގެ 15 އާ ހަމައަށް ދަންމާލީ ކުރަން ހުރި ބައެއް މަސައްކަތްތައް ނިންމާލަން ކަމަށް ބުނެ އެވެ. މިކަން މަޖިލީހުގެ ތަޅުމަށް ހުށަހެޅުއްވީ މަޖިލީހުގެ ރައީސް، އަބްދުއްރަހީމް އަބްދުﷲ އެވެ.

މަޖިލީހުގެ މި ވަގުތު މަސައްކަތް ކުރިއަށްދާ ބިލުތަކުގެ ތެރޭގައި ސަހްޔޫނީންގެ ޕާސްޓޯޓް މަނާކުރުމުގެ ބިލުގެ މަސައްކަތާއި މަސްތުވާތަކެއްޗާ ބެހޭ ގާނޫނަށް އިސްލާހު ގެނައުމުގެ ބިލާއި ބަންޑާރަނައިބުގެ އޮފީހުގެ ބިލާއި ދިވެހިރާއްޖޭގެ ކުޅިވަރުގެ ގާނޫނަށް އިސްލާހުގެ ގެނައުމުގެ ބިލު ހިމެނެ އެވެ. އަދި ކޮމިޓީތަކުގައި ވެސް މުހިންމު މައްސަލަތަކެއް ބަލަމުން އެބަދެ އެވެ.

އިއްޔެގެ ޖަލްސާ ނިންމަވައިލައްވަމުން އޭރު ރިޔާސަތުގައި އިންނެވި މަޖިލީހުގެ ނައިބު ރައީސް އަހުމަދު ނާޒިމް ވެސް މިއަދު ޖަލްސާއެއް އޮންނާނެކަން އިއުލާނުކުރި އެވެ.