ދައުލަތުގެ ހަރަދު ކުޑަކުރުމަށްޓަކައި ސިޔާސީ މުވައްޒަފުން މަދުކުރަން ފަށާފައިވާ މަސައްކަތުގެ ދަށުން އެކި މިނިސްޓްރީތަކުން ވަކިކުރި ކަމަށް ސަރުކާރުން ބުނާ 248 ސިޔާސީ މުވައްޒަފުންގެ މައުލޫމާތަކީ ޒާތީ މައުލޫމާތުތަކެއް ކަމަށް ބުނެ، އެ މައުލޫމާތުތައް ހާމަނުކުރަން ނިންމައިފި އެވެ.

މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އަމިއްލަ ފަރާތަކުންވަނީ ސަރުކާރުގެ މާލީ އިސްލާހީ އެޖެންޑާގެ ތެރެއިން ސަރުކާރުން ސިޔާސީ ވަޒީފާތަކުން ވަކިކޮށްފައިވާ ފަރާތްތަކުގެ އަދަދާއި އެ ފަރާތްތައް މަސައްކަތްކުރި ވުޒާރާތަކުގެ ތަފުސީލު ހޯދުމަށް ހުށަހަޅާފަ އެވެ.

ރައީސް އޮފީހުން ދިން ޖަވާބުގައި ބުނެފައިވަނީ އޮކްޓޯބަރު 31 ވަނަ ދުވަހުގެ ނިޔަލަށް 228 ސިޔާސީ މުވައްޒަފަކު ވަޒީފާއިން ވަކިކުރެވިފައިވާ ކަމަށެވެ.

މި ސަރުކާރު ވެރިކަމަށް އައީ 700 އަށްވުރެ ސިޔާސީ މުވައްޒަފުންގެ އަދަދު ގިނަ ނުކުރާނެ ކަމުގެ ވައުދާއެކު އެވެ. ނަމަވެސް, އެ އަދަދު 4,000 އަށްވުރެ އިތުރުވާނެ ކަމަށް އެކި މަސްދަރުތަކުން ހޯދި މައުލޫމާތުތަކުން ވަނީ އެނގިފަ އެވެ.

ސިޔާސީ މުވައްޒަފުންގެ މުސާރައަކީ ޖުމްލަ ބަޖެޓުގެ އެއް ޕަސެންޓެވެ. އެހެންކަމުން ސިޔާސީ މުވައްޒަފުންގެ މުސާރައަށް އަހަރު ހޭދަކުރާނީ ގާތްގަނޑަކަށް 120 މިލިއަން ރުފިޔާ އެވެ. އެއީ ކޮންމެ މަހަކު ގާތްގަނޑަކަށް 10 މިލިއަން ރުފިޔާ އެވެ.