ޗާގޯސް ޖަޒީރާ ނުވަތަ ފޯޅަވަހީގެ މައްސަލައިގައި އިނގިރޭސި ސަރުކާރަށް ފޮނުވި ކަމަށް ބުނާ ސިޓީ ދިވެހި ދައުލަތުން ސިއްރުކޮށްފިއެވެ.

ފޯޅަވަހީގެ ސިޔާދަތީ ބާރު ރާއްޖެއަށް ލިބުން މާ ހައްގު ކަމަށް ވިދާޅުވެ، އިނގިރޭސިވިލާތުގެ ސަރުކާރަށް ރައީސް ޑރ. މުހައްމަދު މުއިއްޒު ފޮނުއްވި ކަމަށް ބުނާ ސިޓީ، މައުލޫމާތު ހޯދައިލިބިގަތުމުގެ ގާނޫނުގެ ދަށުން ހޯދަން އެދިފައިވަނީ އޮންލައިން ނޫސް "އަދަދު"އިންނެވެ.

މި ސަރުކާރަށް އެއް އަހަރު ފުރުމާ ގުޅިގެން ނޮވެމްބަރު 10 ވަނަ ދުވަހުގެރޭ ޒުވާނުންގެ މަރުކަޒުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް މުއިއްޒު ވަނީ ޗާގޯސް މައްސަލައިގައި އިނގިރޭސިވިލާތަށް ސިޓީއެއް ފޮނުއްވި ކަމަށާ އަދި އެ ސިޓީއާއެކު ތާރީހީ ލިޔެކިޔުންތަކެއް ފޮނުއްވި ކަމަށްވެސް ވިދާޅުވެފައެވެ.

އެއާއެކު އެ ސިޓީގައި މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން އެ ސިޓީގެ ކޮޕީ، އަދި ފޮނުވި ލިޔެކިޔުންތަކާއި، އެ ސިޓީއަށް ޔޫކޭ ސަރުކާރުން ޖަވާބެއް ލިބިފައިވާނަމަ އެ ޖަވާބުގެ ކޮޕީ ހޯދަން އަދަދު ނޫހުން އެދިފައިވަނީ ނޮވެމްބަރު މަހުގެ 12 ދުވަހު މަހޯލި ޕޯޓަލް މެދުވެރިކޮށެވެ.

ނަމަވެސް ގާނޫނުގައި ޖަވާބުދޭން ބުނެފައި އިންނަ 21 ދުވަސް ހަމަވިއިރުވެސް ޖަވާބުނުދި ތިބުމަށްފަހު މުއްދަތު އިތުރުކޮށް، ޑިސެމްބަރު މަހުގެ 5 ވަނަ ދުވަހު ވަނީ އެ މައުލޫމާތު ދެވެން ނެތް ކަމަށް އަދަދު ނޫހަށް އަންގާފައެވެ.

އެގޮތުން މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ 31 ވަނަ މާއްދާއާ ހަވާލާދީ ވަނީ އެ މައުލޫމާތު ސިއްރުކޮށްފައެވެ. ހަވާލާދީފައިވާ މާއްދާއަކީ ސަރުކާރުގެ ސިޔާސަތު އެކުލަވާލުމަށް ހުރަސް އެޅިދާނެ ހާލަތެއްގައި މައުލޫމާތު ސިއްރުކުރުމުގެ ބާރު ލިބިދޭ ކަމަށް ބުނެފައިވާ މާއްދާއެވެ.

އެހެންކަމުން އާންމުންގެ މަސްލަހަތު ބޮޑު މައްސަލައެއްކަމުން މިކަން މުރާޖައާ ކޮށްދިނުމަށް އެދި "އަދަދު" ނޫހުން މިހާރު ވަނީ އެދިފައެވެ.