އިންޑިއާގެ ކޯސްޓްގާޑް އުޅަނދުތަކަކުން ރާއްޖޭގެ އިގްތިސާދީ ސަރަހައްދަށް ވެދެ، ދިވެހި މަސްދޯނިތަކަށް އެރި މައްސަލައިގެ ތަފްސީލު ހޯދުމަށް ދިވެހި ސަރުކާރުން އެދުނުތާ 4 ދުވަސް ފާއިތުވިއިރުވެސް އިންޑިއާއިން ޖަވާބުދާރީ ވެފައިނުވާކަން ހާމަވެއްޖެއެވެ.
މިދިޔަ ބުދަ ދުވަހު އިންޑިއާގެ ކޯސްޓްގާޑުގެ ދެ އުޅަނދަކުން ރާއްޖޭގެ ކަނޑުގެ ސަރަހައްދުގެ އެންމެ އުތުރުގައި މަސްވެރިކަން ކުރަމުދިޔަ ތިން މަސް ދޯންޏަކަށް ވަނީ ހަތިޔާރާ އެކު އެ އުޅަނދުތައް އަރައި، ބަލައި ފާސްކޮށްފަ އެވެ. އެއާ އެކު ޖެހިގެން އައި ދުވަހު ދިވެހި ސަރުކާރުން ވަނީ، އެ އަމަލު ހިންގަން ޖެހުނު ސަބަބު ބުނެދިނުމަށް އެދި އެ ގައުމުގެ ސަރުކާރުގައި އެދިފައެެވެ.
މިކަމާ ގުޅިގެން ހުކުރު ދުވަހު ދިފާއީ ވުޒާރާއިން ނެރުނު ބަޔާނުގައި ދިވެހި ތިން މަސްދޯނި ރާއްޖޭގެ އިގްތިސާދީ ސަރަހައްދުގައި ހަރަކާތްތެރިވަމުންދަނިކޮށް، މި ސަރަހައްދަށް އިންޑިއާގެ ދެ ކޯސްޓްގާޑް އުޅަނދަކުން ވަދެ، އެ ދޯނިތަކަށް އަރާފައި ވަނީ ސަރުކާރަށް އެންގުމެއްނެތި، ބައިނަލްއަގުވާމީ ގާނޫނާ ހިލާފަށް ކަމަށެވެ. އަދި އެކަން ކުރި ސަބަބު ހޯދުމަށް ރާއްޖޭގެ ފޮރިން މިނިސްޓްރީ މެދުވެރިކޮށް، އިންޑިއާ ސަރުކާރުގައި ރަސްމީކޮށް އެދިފައިވާ ކަމަށެވެ.
މިކަމާ ގުޅިގެން އިތުރު ތަފްސީލު ހޯދާލުމަށް ދިފާއީ ބާރުގެ މީޑިއާ ސުވާލުކޮށްލުމުން ޖަވާބުގައި ވިދާޅުވީ ތަފްސީލު އެނގޭނީ ޚާރިޖީ ވުޒާރާއަށް ކަމަށެވެ. ޚާރިޖީ ވުޒާރާއިން ހާމަކުރެއްވި ގޮތުގައި އަދިވެސް ޖަވާބެއް ދީފައިނުވެއެވެ.
އިންޑިއާއިން ރާއްޖޭގެ އިގްތިސާދީ ސަރަހައްދަށް ވަދެފައިވަނީ ރާއްޖޭގެ އެއްވެސް ހުއްދައެއް ހޯދުމަކާ ނުލައެވެ. އަދި ވަނީ މަސް ދޯނިތަކުގައި ތިބި މީހުންނަށް ހަތިޔާރާ އެކު ބިރު ދައްކާފައެވެ. ބެލެވޭ ގޮތުގައި މިއީ ސަރުކާރުން އިންޑިއާ ކުރިމަތީ ކުޑަ ކަކޫ ނުޖެހުމުން ރާއްޖޭގެ ވެރިންނަށް ބިރު ދެއްކުމުގެ ނިޔަތުގައި އިންޑިއާއިން ކުރަމުން ގެންދާ ކަމެކެވެ.
