ވެރިކަން ކުރާ ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ)ގެ މިސާލަކީ ގެރިމަރުވަންދެން ގެރިން ކިރު ފެލުމުގެ އުސޫލު ގެންގުޅޭ މީހުންގެ މިސާލުކަމަށް ރާއްޖޭގެ ކުރީގެ ނައިބު ރައީސް، ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

ޑރ ޖަމީލު މިފަދައިން ވިދާޅުވީ ފެނަކަ ދަރަނިވެރިވެ މުވައްޒަފުންނަށް މުސާރަ ދެވޭނެ ފަދަވެސް ނެތުމުން އެކަމަށް އިޝާރާތްކުރައްވާ އެކްސްގައި ކުރެއްވި ޕޯސްޓެއްގައެވެ.

ޑރ ޖަމީލު ވިދާޅުވީ މަޖިލިސް އިންތިހާބާ ދިމާކޮށް ރިޝްވަތުގެ ގޮތުގައި ފައިސާގެ އިތުރުން ވަޒީފާތައްވެސް ބެހި ކަމަށާ އިގްތިސޯދު އިނދަޖެހުމުގެ އެއް އަސްލަކީ އެއީ ކަމަށެވެ. އެގޮތުން ވަޒީފާތައް ބަހާލީ ސުމާރެއް ނުބަލާކަމަށްވީއިރު އެ ޚަރަދު ކުރަން ޖެހެނީ ދައުލަތުގެ ބަޖެޓުން ކަމަށްވެފައި އެ ބުރަ އުފުލަން ޖެހޭނީ ސަރުކާރަށް ކަމަށާ ދިމްޔާތުން އެ ބުރަ އުފުލަން ޖެހޭ ނަމަ ސިޔާސީ މަގާމުތަކުގެ އަދަދުވެސް އަދި ދައުލަތުގެ ޚަރަދުވެސް ބޮޑުނުކުރާނެ ކަން ޔަގީން ވެވަޑއިގަންނަވާ ކަމަށެވެ. އެހެނީ އެއީ ސީދާ ރައީސް މުއިއްޒުގެ އަމިއްލަ ޖީބުން ކުރަން ޖެހޭ ޚަރަދަކަށްވުމުން ކަަމަށް ވެއެވެ.

ފެނަކަ މުވައްޒަފުންނަށް މުސާރަ ދެވޭނެ ގޮތެއްވެސް ނެތުމުން އެކަމަށް އިޝާރާތްކުރައްވާ ޑރ ޖަމީލު ވިދޅާުވީ ކުންފުނިތަކުގެ ވާހަކައަކީ އައު ވާހަކައެއް ނޫން ކަމަށާ ބުރަ އޮތީ ރައްޔިތުންނަށް ކަމަށްވާތީ ރައީސް މުއިއްޒުގެ އެއްވެސް ފަރުވާލެއް އެކަމުގައި ނެތްކަމަށެވެ.

ޑރ ޖަމީލު މިފަދައިން ވިދާޅުވެފައިވާއިރު، ފެނަކައިގެ ހަރަދުތައް ކުޑަކޮށްގެން އެކަނި ކުންފުނި ސަލާމަތްކުރެވޭކަށް ނެތް ކަމަށް ކުންފުނީގެ އެމްޑީ މުއާޒު މުހައްމަދު ރަޝީދުވަނީ ވިދާޅުވެފައެވެ. އަދި ދައުލަތުގެ އާމްދަނީއަށް ލިބޭ އެއްޗެއް މަދު ނަމަވެސް، ސަރުކާރުގެ ހަރަދުތައް ކުޑަ ނުކުރާތީ ބޭރުގެ އިދާރާތަކުން ވެސް އެކަންކަން ފާހަގަކުރެއެވެ.