މާލޭގެ އެންމެ ބާރު ބޮޑު އެއް މަގު ކަމަށްވާ އަމީނީ މަގުގެ ތާރުގަނޑަށް ބޮޑެތި ގެއްލުންތަކެއްވެ އެ ކަމުގެ ސަބަބުން ހިނގާބިނގާވެ އުޅޭ މީހުންނަށާއި ދުއްވާ މީހުންނަށް ބޮޑު ނުރައްކަލަކަށް ވެއްޖެ އެވެ. ނަމަވެސް ސަރުކާރަކަށް މި ކަން އިނގޭ ކަމަކަށް ނެހެދި އެވެ.

އަމީނީ މަގަކީ ވެރިރަށް މާލޭގެ މުހިންމު ސަރަހައްދުތައް ގުޅާލާ މައި ރޫޓަކަށް ވީ ނަމަވެސް، މަގުގެ ހާލަތު ވަރަށް ބޮޑަށް ގޯސްވަމުންދާތީ، އަމީނީ މަގުގެ ހާލަތު ހައްލު ނުކުރެވި، ދުއްވާ މީހުންގެ މެދުގައި ވަނީ މާޔޫސްކަމާއި ކަންބޮޑުން އުފެދިފަ އެވެ. މީގެ ގެއްލުން އެތައް ވެހިކަލް ތަކަކަށް ވަނީ ކޮށްފައެވެ.

އުމްރާނީ ތަރައްގީގެ އުއްމީދީ މަޝްރޫއެއްގެ ގޮތުގައި ދިވެހިން ދެކެމުން އައި މި މަޝްރޫއު މިހާރު ވަނީ ރައްޔިތުންނަށް ނުރައްކަލާއި ދަތިތައް ކުރިމަތިވާ ކަމަކަށް ވެފަ އެވެ. އަމީނީ މަގުން މައިބަދަ ބިދުން ނޫން "އަރާމެއް" ނުލިބެ އެވެ.

އަމީނީ މަގު ހަދާ ތާރު އެޅުމުގެ މަޝްރޫއު އަކީ ކުރީގެ ރައީސް ސޯލިހްގެ ވެރިކަމުގައި ރައްޔިތުންނަށް ލުއި ފަސޭހަ، ރައްކާތެރި ދަތުރުފަތުރުގެ މަގު ފަހިކޮށްދިނުމުގެ ބޭނުމުގައި ފެއްޓެވި ކަމެކެވެ. ނަމަވެސް މި މަޝްރޫއު ކުރިއަށް ދިޔަ ސްލޯ ސްޕީޑްގެ ސަބަބުން މަސައްކަތް ނުނިމި އެއްކޮށް ނިންމާލެވުނީ މިހާރުގެ ސަރުކާރު ހުވާ ކުރެއްވި ފަހުންނެވެ.

އެހެން ނަމަވެސް، މި މަޝްރޫއު އެއްކޮށް ނިމުނުތާ މާގިނަ ދުވަސްތަކެއް ނުވަނީސް ވަނީ ބޮޑެތި މައްސަލަތައް ފެންމަތިވާން ފަށާފައެވެ. ތާރުއަޅައިގެން އަމީނީ މަގު މަރާމާތުކުރަން ދައުލަތުގެ ބަޖެޓުން 84 މިލިއަން ރުފިޔާ ބޭކާރުކޮށްލީ އެވެ. މީ ފައިސާގައި ޖެހި މަސައްކަތަށް ފަރުވާ ކުޑަ ކުރުމުގެ ނަތީޖާ އެވެ.

ތާރުގަނޑު "މެލްޓް" ވެ، އެކި ހިސާބުތަކުން ތާރުގަނޑު އުފުލި ނުރައްކާތެރި ޑްރައިވިން މާހައުލަކަށް ވަނީ ބަދަލުވެފައެވެ.

މީގެ އިތުރުން، މަގުގެ އެކި ސަރަހައްދުތަކުގައި ބޮޑެތި ވަޅުގަނޑުތައް އުފެދި އުޅަނދުތަކަށް ލިބެމުންދާ ގެއްލުންތައްވެސް އިތުރުވެގެން ގޮސްފައިވެއެވެ. މަގު ހެދުމުގެ ކުރިންވެސް ރައްޔިތުން ކުރަމުންދިޔަ ޝަކުވާތައް އަނެއްކާވެސް އިއާދަވީ އެވެ. މި މަގުގެ މަރާމާތުކުރުން ފަދަ މުނިސިޕަލް މަސައްކަތްތައް ކުރަން ހަވާލުކޮށްފައި އޮންނަ ސިޓީސް، ލޯކަލް ގަވަމެންޓް އެންޑް ޕަބްލިކް ވޯކްސް މިނިސްޓްރީ އަދި ސިޓީ ކައުންސިލާ އެވެ. މިވެރިން ތިއްބެވީ ފިނި ކޮޓަރިކޮޅުގައި މަޖާ ނަގާށެވެ. ކަހާތަން ހިރުވާ ވެސް ނުލަ އެވެ.

އުޅަނދުތަކުގެ ޓަޔަރުތައް ބްލޯއައުޓްވުމާއި އިތުރު އެކި އެކި ގެއްލުންތައް ދިމާވުން އަނެއްކާވެސް އިތުރުވީ އެވެ. އިތުރު ތަކްލީ ފެއް ރައްޔިތުންނަށް ޖެހުނީ އެވެ. މިކަމުގެ ސަބަބުން އުޅަނދުތަކުން ގަރާޖްތައް ފުރި، ރައްޔިތުންގެ ޖީބަށް އަނެއްކާވެސް ބާރު ބޮޑުވެގެން ދިޔައެވެ. މިނިސްޓަރުން ދައުލަތުގެ އުޅަދުގައި ބޭރުމަގުގައި ވައިބުރު ތަޅަނީ އެވެ.

އިގްތިސާދީ ގޮތުން ގައުމު ހީނަރުވެ ރައްޔިތުންގެ ޒަރޫރީ ބޭނުންތައް ފުއްދުމަށް ނުކުޅެދިފައިވާ މި ދުވަސްވަރުގައި، ރައްޔިތުން ކުރަންޖެހޭ ހަރަދު އިތުރުވެގެން ގޮސް ބޮޑު ތަކުލީފަކަށް ވަނީ ވެގެން ގޮސްފައެވެ. ވެރިންގެ ފުށުން ފަސޭހައެއް ރައްޔިތުންނަށް ނުލިބި އަމީނީ މަގުގައި ހުރި ހިޔާ ބޮޑު ގަސްތައް ވެސް ގެއްލުނީ އެވެ.

އަމީނީ މަގުގެ ހާލަތު މިހާ ބޮޑަށް ގޯސްވެގެން ދިޔައީ އިއްޔެ މިއަދަކު ނޫނެވެ. މި މައްސަލައަށް އެތައް މަހެއް ވެގެން ގޮސްފައިވާއިރު އަދުގެ ސަރުކާރުން މި މަންޒަރެއް ފެންނަ ކަމަކަށް ނުވެ އެވެ. ފަހަރުގައި ސަރުކާރު ވެރިން ގެ ކޮޅަށް ދިއުމަށް އަމީނީ މަގު ބޭނުން ނުކުރަނީ ތޯއްޗެކެވެ. ނޫނީ ނުފެން ކަމަށް ހެދިގެން ތިބީ ކަމަށްވެސް ވެދާނެ އެވެ. ނޫނީ ކުރީ ސަރުކާރުން ފެއްޓެވި މަޝްރޫއަކަށް ވުމުން ކަމުން ރެކެން "ކުރީ ސަރުކާރު" ކިޔާލަ ކިޔާލަ ތިބީ ކަމަށްވެސް ހަމަ ވެދާނެ އެވެ.

އިންފްރާސްޓްރަކްޗަރ ވުޒާރާއިންވެސް މި ކަމަށް އެއްވެސް ވަރަކަށް ސަމާލުކަމެއް ދީފައި ނުވަތީ ރައްޔިތުން އަންނަނީ ނުރުހުން ފާޅުކޮށް ސަރުކާރުގެ ޒިންމާދާރުކުޑަކަމަށް ގޮވާލަމުންނެވެ.

މި މަގަކީ އިމްޕްރޫވްމަންޓަކަށް ވާނެ ކަމަށް ހީކުރި ނަމަވެސް މިހާރު މިއީ މުޅިން އެހެން ލެވެލްއެއްގެ ކާރިސާއެއް ކަމަށް ގިނަ ބަޔަކު އަންނަނީ ސިފަކުރަމުންނެވެ. ސަރުކާރުން ރައްޔިތުންނާއި މެދު ނުވިސްނާކަން މިކަމުންވެސް ހާމަވެގެންދާ ކަމަށް މި ފަރާތްތަކުން އަންނަނީ ބުނަމުންނެވެ. އެ ގައުމެއްގެ ރައްޔިތުން ނުރައްކާ އަކަށް ކޮންމެ ދުވަހަކު ހުށަހަޅާފައި ބަހައްޓާނީ ހަމަގައިމުވެސް ރައްޔިތުންގެ ފަޅީގައި ހުރި ވެރިއެއް ނޫން ކަން ގައިމެވެ. ވެރި މީހާއަށް އެ ހުރެވެނީ ފައިސާގެ ފަޅީގައި އެވެ.

އަމީނީ މަގުގެ ހާލަތު މިހާ ބޮޑަށް ދަށަށް ގޮސްފައިވުމުން މަގުމަތީގެ އެކްސިޑެންޓްތައް އިތުރުވުމުގެ ފުރުސަތު ފަހިވެގެންދާނެތީ އާންމުން އަންނަނީ އެކަމާ ކަންބޮޑުވުން ފާޅުކުރަމުންނެވެ. ސަރުކާރު ހޭލާނީ ބޮޑު އެކްސިޑެންޓެއް ދިމާވެ ބަޔެއްގެ ފުރާނަ ގެއްލިގެން ދިޔުމުންތޯ އާންމުން އަންނަނީ ސުވާލުކުރަމުންނެވެ. ނަމަވެސް މި ސުވާލަށް ސަރުކާރުގެ ޖަވާބެއް ނެތެވެ. އެވެރިން އުޅެނީ ސަރުކާރު ވެއްޓިދާނެ ތީ ހޭބޯ ނާރައިގެން ނެވެ.

އަމީނީ މަގުގައި އިސްކަންދަރު ކޮއްޓާ ހިސާބުން ސްޓޭޑިއަމް ފަޅީގެ ބޮޑުބައެއްގެ ތާރުގަނޑު އޮތީ އަޑިގުޑަންވެފަ އެވެ. ތާރުގަނޑުގެ ބައެއް ހިސާބުތަކުން ވަރަށް ބޮޑަށް އަޑިވެ، ވަޅުގަނޑުތައް ހެދިފައި ހުރި އިރު މަގުގެ މެދަށް ވުރެ އެއް ފަރާތުގެ ތާރުގަނޑު މާބޮޑަށް އޮތީ އަޑިވެފަ އެވެ.

މި ފަދަ އުމްރާނީ މަސައްކަތުގައި ދައުލަތުގެ ވެރިންގެ ކޮލިޓީ އާއި ސަރުކާރު ޖަވާބުދާރީ ކުރުމާ ބެހޭ ގޮތުން ބަހުސްތައް ވަނީ އުފެދިފަ އެވެ. ފާޑުކިޔާ ފަރާތްތަކުން ބުނަނީ އިންފްރާސްޓްރަކްޗާ ތަރައްގީއާ ގުޅޭ ގޮތުން ކުރީގެ ސަރުކަރާއި މިހާރުގެ ޑރ މުއިއްޒުގެ ސަރުކާރުން ވެސް ވެފައިވާ ވައުދުތައް ފުއްދުމުގައި ފެއިލްވެފައިވާ ކަމަށެވެ. އާބަން ޕްލޭނިންއާއި މަގުމަތީގެ މަސައްކަތްތަކަށް އެތައް މިލިއަން ރުފިޔާއެއް ކަނޑައެޅިނަމަވެސް، މި މަޝްރޫއުތައް މަތީ ފެންވަރެއްގައި ނިންމައި، ޒަމާނާ އެއްގޮތަށް ބެލެހެއްޓުމުގެ ކަންކަން ކުރިއަށް ގެންދިއުމުގައި ވަރަށް ކުޑަ ސަމާލުކަމެއް ދޭތަން ފެންނަމުންދަ ކަމަށެވެ.

އަމީނީ މަގަށް މިހާރު އިހުމާލުވެފައިވާކަމީ މާލޭގެ އިންފްރާސްޓްރަކްޗާއަށް ކުރިމަތިވެފައިވާ ބޮޑު މައްސަލައެކެވެ. މިމައްސަލަ ހައްލުކުރުމަށް ސަރުކާރުން އަވަސް ފިޔަވަޅުތަކެއް ނާޅައިފިނަމަ ސިޓީގެ މަގުތަކަށް ލިބޭ ގެއްލުން އިތުރަށް ގޯސްވެ، އެއަށްވުރެ ބޮޑު ހަރަދުތަކަކާއި ނުރައްކާތައް ކުރިމަތިވެދާނެ ކަމުގެ އިންޒާރު ރައްޔިތުންނާއި ތަޖުރިބާކާރުން ވަނީ ދީފައެވެ.

އަމީނީ މަގުގެ ހާލަތު ގޯސްވަމުން ދިއުމަކީ ކޮންމެ ދުވަހަކު ވެސް އެމަގަށް ބަރޯސާވާ ރައްޔިތުންނަށާއި ވެހިކަލްތަކަށް އޮތް ނުރައްކަލެކެވެ. އެންމެންގެ ހިތުގައި އުފެދޭ ސުވާލަކީ މަގު ރަނގަޅުކޮށް އެކްސިޑެންޓްތައް ހުއްޓުވުމަށް ސަރުކާރުން އަޅަންޖެހޭ ފިޔަވަޅުތައް އެޅުމަށް މަސައްކަތެއް ކުރާނެތޯ ނުވަތަ ކުރިއަށް އޮތް މަސްތަކުގައިވެސް، ނުވަތަ ކުރިއަށް އޮތް 4 އަހަރު ވަންދެން ވެސް މި ބޮޑު މައްސަލައަށް އިހުމާލުވަމުން ދާނެތޯ އެވެ.

އަމީނީމަގު ވީހާލެއްގައި ވާން ދޫކޮށްނުލާށެވެ. ކޮންމެ އިހުމާލަކީ އަނިޔާ އެކެވެ.