ރައީސް މުހައްމަދު މުއިއްޒު މިހާރު އއ.އަތޮޅު އަދި އދ.އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގައި، އުސޫލުން ބޭރުން ކުންފުނިތަކެއްގެ މުވައްޒަފުންތަކެއް ގޮވައިގެން އުޅުއްވާކަން ހާމަވެއްޖެއެވެ.

އެގޮތުން ކުރީ ނައިބު ވަޒީރުންގެ ގޮތުގައި ތިބެ އަވައްޓެރި އިންޑިއާގެ ބޮޑު ވަޒީރަށް ކުޑައި މީސް ބަސް ރައްދުކޮށް ޓްވީޓުކުރުމުންވެސް މަގާމުތަކުގައި ބައިތިއްބައިގެން ރައީސް މުއިއްޒުގެ ސަރުކާރުން ރައްޔިތުންގެ ފައިސާއިން މުސާރަ ދިން މަލްޝާ ޝަރީފާ މަރިޔަމް ޝިއުނާ ދަނީ ރައީސް މުއިއްޒު މިހާރު އ.އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގައި ބައިވެރިވަމުންނެވެ.

ޝިއުނާ އާ މަލްޝާގެ ސޯޝަލް މީޑިޔާ އެކި ޕޯސްޓުތަކާ ފޮޓޯތަކުން މިކަން ވަނީ ހާމަވެފައެވެ.

ޝިއުނާއަކީ އެމްއޭސީއެލްއިން އޭނާއަށް ފަރުމާކޮށް އިއުލާންކުރި ވަޒީފާގައި 40000 ރުފިޔާގެ މުސާރައަށް މިހާރު ހުންނަ އެ ކުންފުނީގެ މުވައްޒަފެކެވެ. އަދި މަލްޝާއަކީ އޭނާއަށް ފަރުމާކޮށް އެޗްޑީސީއިން އިއުލާންކުރި 35000 ރުފިޔާގެ ވަޒީފާގައި ހުންނަ އެ ކުންފުނީގެ މުވައްޒަފެކެވެ.

ކުންފުނިތަކުގެ މުވައްޒަފުން އަމަލުކުރާ އާންމު އުސޫލުގައި ބަޔާންކޮށްފައިވާގޮތުން ކުންފުނީގެ ރަސްމީ ދަތުރެއް ފިޔަވައި އެހެން ދަތުރެއްގައި މާލެއިން ބޭރަށް ދެވޭނީ ޗުއްޓީ ނަގައިގެންނެވެ. ނަމަވެސް ތޭރަ އޮންލައިނަށް މައުލޫމާތު ލިބިފައިވާ ގޮތުގައި އާންމު ދުވަސްތަކުގައި ވެސް ރަސްމީ ގަޑީގައި ވަޒީފާއަށް ނުނިކުމެ އަމިއްލަ ކަންކަމުގައި ބޭރުތެރޭގައި އުޅޭ މަލްޝާއާ ޝިއުނާވެސް ވަޒީފާއިން ޗުއްޓީ ނަގާފައިނުވެއެވެ. އެހެންކަމުން އެ ދެމީހުންވެސް ރައީސް މުއިއްޒުގެ ދަތުރުފުޅުގައި ބައިވެރިކުރުވަމުން އެގެންދަވަނީ އުސޫލުތަކުން ބޭރުންނެވެ.

ނަމަވެސް ރައީސް މުއިއްޒު އިންތިހާބުވެވަޑައިގެން މީޑިޔާއަކަށް ދެއްވި އެންމެ ފުރަތަމަ ބަސްދީގަތުުމުގެ ގޮތުގައި "ޗެނަލް13"އަށް ދެއްވި ބަސްދީގަތުމުގައިވަނީ ގާނޫނާ ގަވާއިދަށް ކަމޭ ނުހިތާ މުވައްޒަފުންނާ މެދު ފިޔަވަޅުއަޅަން ފަސްނުޖެހޭނެ ކަމަށް ވިދާޅުވެފައެވެ. މިއަދު މިފެންނަމުންދަނީ ޚުދު ރައީސް މުއިއްޒުގެ ދަތުރުފުޅެއްގައި އުސޫލުތަކަށް ގޮން ޖަހާ މަންޒަރެވެ. މިފަދަ ބަހާ އަމަލާ ދިމާ ނުވާ މަންޒަރުތަކަކީ މިހާރު ރައީސް މުއިއްޒުގެ ކިބައިން ފެންނަ އާންމު ކަންކަމަށްވުމުން ރައްޔިތުން މިހާރު ބުނަމުން ގެންދަނީ އެމަނިކުފާނަކީ ބަހާ އަމަލާ ދިމާނުވާ ވެރިއެއް ކަމަށެވެ.

އެހެން މުވައްޒަފުންނާ މެދު އަމަލުނުކުރާ ހާއްސަ އުސޫލަކުން ވަކި މުވައްޒަފުންތަކަކާ މެދު އަމަލުކުރުމަކީ ވަޒީފާގެ މައިދާނުގައި ތަފާތުކުރުން ގެންގުޅުން ކަމަށްވެސް ގިނަ ބަޔަކު ގެންދަނީ ސިފަކުރަމުންނެވެ.