ގައުމުގެ ހުންގާނު ރައީސް ޑރ. މުހައްމަދު މުއިއްޒުއާ ރައްޔިތުން ހަވާލުކުރީ ރައީސް އަބްދުﷲ ޔާމީނަށް ކުރައްވާ އިތުބާރެއްގެ ބޮޑުކަމުން ކަމަށާ އެހެންކަމުން ވަކި މީހެއްގެ ދަލުގައި ޖެހިގެން ގައުމުގެ ނައު ފަރަށް އަރުވާނުލުމަށް، ރައީސް ޔާމީންގެ އިސް ގާނޫނީ ވަކީލު ޑރ. މުހައްމަދު ޖަމީލު އަހުމަދު ރައީސް މުއިއްޒަށް ގޮވާލައްވައިފިއެވެ.

ރައީސް މުއިއްޒު އެމަނިކުފާނުގެ އަލަތު ރިޔާސީ ބަޔާން އިއްވެވިއިރު ރައީސް ޔާމީން ތަހައްމަލު ކުރައްވަމުން ގެންދަވާ ނާއިންސާފުވެރިކަމާ ގުޅިގެން ބަސްފުޅެއް ވިދާޅުވެފައި ނުވުމާ ޖުޑީޝީއަރީ އޮތީ މިނިވަންވެފައިކަމަށް ވިދާޅުވި ވިދާޅުވުމާ ގުޅިގެން ކަންބޮޑުވުން ފާޅުކުރައްވާ ޑރ. ޖަމީލު ޗެނަލް13އަށް ދެއްވި ބަސްދީގަތުމެއް ވިދާޅުވީ، ރައީސް މުއިއްޒަށް ވެރިކަމުގެ ތަޚުތާ ހަމައަށް އާދެވުނީ ރައީސް ޔާމީނަށް ރައްޔިތުން ކުރާ އިތުބާރެއްގެ ބޮޑުކަމުން ކަމަށާ އެހެންކަމުން އެމަނިކުފާނަށް ރައްޔިތުން ކުރާ އިތުބާރު ދެމެއްޓެވުމަކީ ރައީސް މުއިއްޒުގެ ޒިންމާއެއް ކަމަށެވެ.

އެގޮތުން ރައީސް ޔާމީން ޕީއެންއެފްގެ ޖަލްސާތަކުގައި ފާޅުކުރައްވަމުން ގެންދަވާ ޚިޔާލާ ދައްކަވާ ވާހަކަފުޅުތައް އައްސަވާ ސަރުކާރުން އެކަންކަމާ އެއް ގޮތަށް އަމަލުތައް ބައްޓަން ކުރައްވަމުން ގެންދަވާ މަންޒަރު ފެންނާތީ އުފާ ކުރާ ކަމަށްވެސް ޑރ. ޖަމީލު ވިދާޅުވިއެވެ.

ޑރ. ޖަމީލު ވިދާޅުވީ ޕީޕިއެމް/ޕީއެންސީގެ އާންމު މެމްބަރުން ބޭނުންވާ ގޮތަށް ގައުމު ހިންގޭނީ ރައީސް ޔާމީންގެ ބަސްފުޅާ ޚިޔާލުފުޅާ އެއްގޮތަށް ކުރިއަށް ގެންދިއުމުން ކަމަށާ އެއީ އެމަނިކުފާނުގެ އެ ޚިޔާލާތުފުޅަކީ އެއް ދުވަހެއް ދެ ދުވަހެއްގެ ތަޖުރިބާގެ ބަދަލު ގިނަ ދުވަސްތަކެއް އިލްމާ ހިލްމާ ތަޖުރިބާއަށް ވުމުން ކަމަށް ވެސް ޑރ. ޖަމީލު ފާހަގަކުރެއްވިއެވެ.

ޑރ. ޖަމީލު އިތުރަށް ވިދާޅުވީ، އަބްދުއްރަހީމުގެ ކިބައިގައި އެ ތަޖުރިބާ ނުހުންނާނެ ކަމަށާ އެހެންކަމުން ސަލާމަތުގެ އައްސޭރިއަށް ގައުމު ވާސިލްކުރަން ބޭނުންފުޅު ނަމަ ރައީސް މުއިއްޒު، ރައީސް ޔާމީންގެ އެހީތެރިކަމާ ހިޔާލު ހޯއްދަވަން ޖެހިވަޑައިގަންނަވާ ކަމަށްވެސް ތަކުރާރުކޮށް ޑރ. ޖަމީލު ވިދާޅުވިއެވެ.

ޑރ. ޖަމީލު ވިދާޅުވީ ފުރަތަމަ ރިޔާސީ ބަޔާނެއް ރައީސަކު އިއްވިއިރު ހުސް ގޮނޑިތަކެއް މަޖިލިސް ތެރޭގައި ހުރުމުން ދޭހަވަނީ ރައްޔިތުންގެ ގިނަ ބަޔަކު ރައީސް މުއިއްޒު ބޮއިކޮޓުކޮށްފައިވާ ކަން ކަމަށާ މިއީ ދިވެހި ތާރީޚުގައި މިފަދަ ކަމެއް ހިނގި ފުރަތަމަ ފަހަރުކަން ވެސް ޑރ. ޖަމީލު ފާހަގަކުރެއްވިއެވެ.

ޑރ. ޖަމީލު ވިދާޅުވީ، ރައީސް މުއިއްޒުގެ ރިޔާސީ ބަޔާނަކީ ވިޝަނަރީ ބަޔާނެއްކަމަށް ބުނެ ޕްރޮމޯޓުކުރަމުން ގެންދާއިރު، އެ ބަޔާނަކީ ސަރުކާރުން ކުރިން އިއުލާންކޮށްފައިވާ ހުރި މަޝްރޫއުތަކުގެ ރިޕީޓެޑް ލިސްޓެއް ކަމަށާ ރިޔާސީ ބަޔާން ވާން ޖެހޭނީ ކުރިއަށް އޮތް އަހަރަށް ރައީސް ގެންގުޅުއްވާ ސިޔާސަތު ހާމަކުރާ ބަޔާނަކަށް ކަމަށާ އަދި ވިދާޅުވި ކަންކަމުގެ ވެސް ތަފްސީލު ހިއްސާކުރައްވާފައިނުވާކަން ވެސް ޑރ. ޖަމީލު ފާހަގަކުރެއްވިއެވެ. އަދި މުޅި ރިޔާސީ ބަޔާން އިއްވާ ނިމުނުއިރުވެސް ރައީސް ޔާމީންގެ މައްސަލަ ހުއްޓުފައި އޮތް އޮތުމަށް ހައްލެއް ގެނެސްދިނުމާ އަދި އެކަމާ ގުޅިގެން އެއްވެސް ވާހަކައެއް ދައްކާފައިނުވާތީ ހިތާމަ ކުރައްވާ ކަމަށެވެ.