ރާއްޖެއިން ތައިލެންޑަށް ކަނޑައަޅާ ސަފީރު ކަމަށް އިލެކްޝަންސް ކޮމިޝަން (އީސީ)ގެ ކުރީގެ ރައީސް ފުއާދު ތައުފީގު އައްޔަންކުރަން ރައްޔިތުންގެ މަޖިލީހުން ރުހުންދީފި އެވެ.

އީސީގައި ފުއާދުގެ ދައުރު ހަމަވެފައިވަނީ މިދިޔަ ނޮވެމްބަރު މަހުގެ 23 ވަނަ ދުވަހަށެވެ.އެއަށްފަހު ސަރުކާރުން ވަނީ ކިންގްޑަމް އޮފް ތައިލެންޑްގެ ސަފީރުކަމަށް ފުއާދުގެ ނަން މަޖިލީހަށް ހުށަހަޅުއްވާފަ އެވެ. އެއާއެކު ނޮވެމްބަރު 25 ވަނަ ދުވަހު އޮތް ޖަލްސާގައި އެ މައްސަލަ ދިރާސާކުރަން ޚާރިޖީ ގުޅުންތަކުގެ ކޮމިޓީއަށް ފޮނުވި އެވެ.

މަޖިލީހުން ފުއާދުއަށް ރުހުން ދީފައިވަނީ މިއަދު މަޖިލީހުގެ ޖަލްސާގައި މިކަމަށް ނެގި ވޯޓުގަ އެވެ. ފުއާދުއަށް ރުހުން ދީފައިވަނީ ވޯޓުގައި ބައިވެރިވި 58 މެންބަރުންގެ އިއްތިފާގުންނެވެ.