ގާނޫނު އަސާސީގެ ދިފާޢުގައި ރައްޔިތުން ތެދުވާތީ އައު ދޮގުތަކެއް ރައީސް މުހައްމަދު މުއިއްޒުވިހަން ފަށައިފިކަމަށް ކުރީގެ ނައިބު ރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

ޑރ ޖަމީލު މިފަދައިން ވިދާޅުވެފައިވަނީ، މަސްވެރިންނަށް ވީ ވައުދު ނުފުއްދާ މަސްވެރިންނާ މެދު އަނިޔާވެރިވާތާ އެއް އަހަރު ފަހުން އަނެއްކާވެސް މަސްވެރިންނާ ގުޅުވާ ރައީސް މުއިއްޒު އައު ވައުދެއް ވެވަޑައިގެންފައިވާތީ އެކްސްގައި އެކަމަށް ފާޑުވިދާޅުވެ ކުރެއްވި ޕޯސްޓެއްގައެވެ.

މާދަމާއިން ފެށިން ވީ ވައުދު ފުއްދެމުންދާނެކަމަށާ ބީއެމްއެލްގައި އެކައުންޓް އޮތް މަސްދޯންޏަކަށް ވިއްޔާ އެ ދޯންޏަކުން މަސްކިރާތާ 48 ގަޑީއިރު ތެރޭގައި އެ ދޯނީގެ އެކައުންޓަށް ފައިސާ ޖަމާވަމުންދާނެ ރައީސް މުއިއްޒު ވިދާޅުވެފައިވާތީ އެކަމަށް އިޝާރާތްކުރައްވާ ޑރ ޖަމީލު ވިދާޅުވީ، ދެން މާދަމާ ފާއިތުވީވުމުން ދައްކާނީ މުޅިން އާ ވާހަކައެއްކަމަށާ ބުއްދި ހަމަޖެހޭ މީހަކު ދައްކާ ޒާތު ވާހަކަތަކެއް ރައީސް މުއިއްޒު ނުދައްކަވާ ކަމަށެވެ.

އެގޮތުން ރައީސް މުއިއްޒު ކުރިން ވެވަޑައިގެންެވި ވަޢުދު ނުފުއްދާ އަނެއްކާ އަހަރެއް ފަހުން އިތުރު އާ ވާހަކަތަކެއް މިހާރުވީ ވަޢުދާ ގުޅޭގޮތުން ފަށާނެ ކަމަށާ ރައީސް މުއިއްޒަކީ އަމިއްލަ ދޮން މަންމައަށް ދޮގު ހަދާ އޮޅުވާލި ފަރާތެއް ކަމަށް ވެސް ޑރ ޖަމީލު ވަނީ ވިދާޅުވެފައެވެ.

ރައީސް މުއިއްޒަކީ ރައީސް އަބްދުﷲ ޔާމީނަށް ދުރާލާ ރާވައިގެން ދޮގުހަދާ އޮޅުވާލި މީހެއްކަމަށާ ރައީސް މުއިއްޒަކީ އަމިއްލަ ޕާޓީ، ޕީޕީއެމަށް އޮޅުވާލި މީހެއް ކަމަށްވެސް ޑރ ޖަމީލުގެ ޕޯސްޓުގައިވަނީ ވިދާޅުވެފައެވެ.

މީގެ އިތުރުން ރައީސް މުއިއްޒަކީ މިހާރު ކައިރީގައި ތިބި އެންމެންނަށް ވެސް ދޯކާ ދެމުންދާ މީހެއްގެ ގޮތުގައި ސިފަކުރައްވާ ޑރ ޖަމީލު ވިދާޅުވީ މިހާރު ރައްޔިތުން ބުނަނީ ރައީސް މުއިއްޒަކީ ދޮގުވެރި ކައްޒާބެއް ކަމަށާ އަޚްލާގު ގޯސް، ތަރުބިއްޔަތެއް ނެތް، ޝުކުރުވެރި ނުވާ، މައްކާރެއްގެ ގޮތުގައިވެސް ރައްޔިތުން ރައީސް މުއިއްޒު ސިފަކުރައްވަމުން ގެންދާ ކަމަށް ޑރ ޖަމީލު ވިދާޅުވެފައިވެއެވެ.