ސްޓޭޓު ޓްރޭޑީން އޯގަނައިޒޭޝަން (އެސްޓީއޯ) އިން 2 ލައްކަ ޑޮލަރުގެ ވައްކަމެއް ކޮންމެ މަހަކު ކުރަމުންދާ ކަން ހާމަވެއްޖެއެވެ.

"ތޭރަ އިންލައިނަށް"އަށް ވަރަށް މުއުތުރަބަރުކޮށް މައުލޫމާތު ލިބިފައިވާ ގޮތުގައި އެސްޓީއޯއިން ގެންދަނީ ވިލާ ކުންފުންޏަށް ކޮންމެ މަހަކު 2 ލައްކަ ޑޮލަރުގެ ޕޭމަންޓެއް ހަދަމުންނެވެ. އަދި ޕޭމަންޓު ހަދަމުން ދަނީ ހުސް ޓޭންކުތަކަކަށް ކަންވެސް މައުލޫމާތު ލިބިފައިވެއެވެ.

އެގޮތުން ތެޔޮ ފުނަދޫ ހުސްކުރަން ޖެހިފައި އޮތުމުން ތިލަފުށީގައި ތެޔޮ ރައްކާކުރުމުގެ ނަމުގައި އެސްޓީއޯއިން ވަނީ އެތަނުގައި ހުރި ވިލާ ކުންފުނީގެ ހުސް ހަތަރު ޓޭންކަކަށް ފައިސާ ދައްކަން ފަށާފައެވެ. މިކަމެއް ހިނގާތާ މިހާރު ހަތަރު ވަރަކަށް މަސްވެފައިވާއިރު މި ވައްކަމުގެ ތެރެއިން، ވިލާގެ ކުރީގެ ފައިނޭޝިއަލް ކޮންޓްރޯލާ އަދި އެސްޓީއޯގެ މިހާރުގެ އެމްޑީ ޝިމާދު އިބްރާހިމަށް ވެސް ބައި އެޅޭކަމަށް މައުލޫމާތު ވަނީ ލިބިފައެވެ.

މައުލޫމާތު ލިބިފައިވާ ގޮތުގައި ޝިމާދު ދާދި ފަހުން އިސްތިއުފާގެ ސިޓީ ހުށަހެޅީ ވެސް އެ މައްސަލަ ތިލަވެ މައްސަލަ ބަލަން ބޯޑަށް ރައީސް މުހައްމަދު މުއިއްޒު އެންގެވުމުންނެވެ. ނަމަވެސް ޝިމާދުގެ ބާރު ހިނގާ ބޯޑު މެމްބަރުންގެ މެޖޯރިޓީ އޮތް އެސްޓީއޯ ބޯޑުން ވަނީ ފަހުން އެކަން ހިންދާލާފައިކަމަށް އެ މީހާ ވަނީ ކިޔައިދީފައެވެ. އަދި ޝިމާދުގެ އިސްތިއުފާ ގަބޫލުކުރެވެން ނެތްކަމަށްވެސް ނިންމާވާފައިވާ ކަމަށް ވެސް މައުލޫމާތު ދީފައިވެއެވެ.

އެސްޓީއޯގެ ތެރެއިން މިހާ ބޮޑު ވައްކަމެއް ހިންގަމުންދާއިރު އެ ކުންފުނީގެ ދަށުން ހިނގަމުންދާ ސަރުާރުގެ ތެޔޮ ކުންފުނި، ފިއުލް ސަޕްލައި މޯލްޑިވްސްއަށް ވެސް ޝިމާދު ނުފޫޒު ފޯރުވާ ވަކި ބަޔަކަށް މަންފާވާ ގޮތަށް ކަންކަންކުރަމުން އަންނަ ކަމަށްވެސް އެމީހާ ވަނީ ކިޔައިދީފައެވެ.

އެގޮތުން ޝިމާދުއަކީ އެމްޑީޕީ ސަރުކާރުގައިވެސް އެސްޓީއޯ ބޯޑުގައި ހުރި މީހަކަށްވެފައި ޝިމާދުއާ އެމްޑީޕީ ޑޮމިނޭޓުކުރާ އެފްއެސްއެމްގެ ގިނަ އެޗްއޯޑީއިންނާ ގުޅިގެންވެސް ކޮރަޕްޝަނަށް މަގު ފަހިވާ ގޮތަށް ކަންކަން ކުރަމުންދާ ކަމަށްވެސް މައުލޫމާތު ލިބިފައިވެއެވެ.

މައުލޫމާތު ލިބިފައިވާ ގޮތުގައި ދާދި ފަހުން އެފްއެސްއެމުގެ ތެރެއިން ތިލަވެގެން އުޅޭ ތެލުގެ ވައްކަމުގެ ވެސް ހަގީގީ މޭސްތިރިއަކީ އެސްޓިއޯ އެމްޑީ ޝިމާދުއެވެ.