ރައީސް މުހައްމަދު މުއިއްޒަކީ ދިވެހިތާރީޚުގައި ވެރިކަމަށް ވަޑައިގެންނެވި އެންމެ ދެ އުޅިއެއްނުވާ ވެރިމީހާކަމަށް ކުރީގެ ނައިބު ރައީސް ޑރ . މުހައްމަދު ޖަމީލު އަހުމަދު ވިދާޅުވެއްޖެއެވެ.

ޑރ ޖަމީލު މިފަދައިން ވިދާޅުވެފައިވަނީ، ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރުކުރަން ޖެހޭނެ ކަމަށާއި އެކަން ބަދަލުނުކުރައްވާނެ ކަމަށް ރައީސް މުއިއްޒު ވިދާޅުވި ނަމަވެސް، އެކަން އިހުތިޔާރީކޮށް ސަރުކާރުން މިހާރު ވަނީ ބޭރު ފައިސާއާބެހޭ ބިލު މަޖިލީހަށް ފޮނުވާފައިވަނިކޮށް އެކްސްގައި ކުރެއްވި ޕޯސްޓެއްގައެވެ.

ޑރ ޖަމީލު ވިދާޅުވީ ރައީސް މުއިއްޒަށް ވެރިކަމަށް އާދެވުނީ ޗާންސަކުންކަމަށާ އެއީ ކޮންމެހެން ރައީސް މުއިއްޒުގެ ކިބައިގައި މާމޮޅުކަމެއް ހުރެގެން ލިބުނު ނަސީބެއް ނޫން ކަމަށެވެ. ވެރިކަމަށް އައުމަށް އިންތިހާބު ކާމިޔާބު ކުރުމަށް ވިއްކީ ރައީސް އަބްދުﷲ ޔާމީނުއާ އެމަނިކުފާނުގެ ހުސްގޮނޑިއާ އަދި ޕީޕީއެމް އިން ރައީސް ޔާމީންގެ މެނިފެސްޓޯގެ އިތުރުން އެފިކުރާ އެތަރައްގީ ކަމަށްވެސް ޑރ ޖަމީލު ވަނީ ފާހަގަކުރައްވާފައެވެ. އަދި ރައީސް މުއިއްޒު ވެރިކަމަށް އައުމަށް ދެން ވިއްކީ ރައީސް ޔާމީނަށް ސިޔާސީ ގޮތުން އިއްވި ހުކުމު ކަންވެސް ޑރ ޖަމީލު ވަނީ ފާހަގަކުރައްވާފައެވެ.

ރައީސް މުއިއްޒަކީ ޕީޕީއެމް ތެރޭ މޭޒު ދޮށުގައި އިސްޖަހައިގެން ހުންނެވި ބޭފުޅެއްކަމަށާ މޮޅު ޚިޔާލެއް، ވިސްނުމެއް، އަދި ވާހަކަތަކެއް ވެސް އޭރު ދެއްކަވާ މަސައްކަތެއް ވެސް ކުރި ފަރާތެއް ނޫން ކަމަށް ވިދާޅުވެ ޑރ ޖަމީލު ވަނީ ރައީސް މުއިއްޒަށް އޮތް ރެކޯޑުތަކުގެ ތެރޭގައި މީހުންނަށް ނުބައި މީހެއްގެ ރިކޯޑްއޮތް ކަމާ އޮތީ އެކަހެރިކޮށް އުޅޭ މީހެއްގެ ރިކޯޑްކަމާ އޮތީ ހުރި ކޮންމެ ތަނެއްގައި ކޮރަޕްޝަން ހިންގި ކަމުގެ ތުހުމަތުކަމަށްވެސް ވަނީ ވިދާޅުވެފައެވެ.

މީގެ އިތުރުން ރައީސް މުއިއްޒުގެ މައްޗަށް އޮތީ ހެޔޮކަމެއް ކޮށްދިން ކޮންމެ މީހަކަށް މަކަރު ހަދާ އަދި ދޯކާ ދޭކަމުގެ ރިކޯޑް ކަމަށާ އެމަނިކުފާނުގެ މައްޗަށް އޮތީ ތިމާ އިޙްސާންތެރިވާންޖެހޭ ފަދަ މީހުންނަށް ދުރާލާ ރާވައިގެން ލަނޑުދިންކަމުގެ ރިކޯޑް ކަމަށްވެސް ޑރ ޖަމީލު ވަނީ ވިދާޅުވެފައެވެ.

ރައީސް މުއިއްޒަކީ ގަވަރނަންސް ވެސް އިގްތިސާދު ވެސް ނޭނގޭ ލީޑަރޝިޕެއް ނެތް ބޭފުޅެއް ކަމަށާ ކޮންމެ ވާހަކަައެއް އުނބު ޓާރން ޖަހަމުން ދާއިރު އެއްވެސް ނިންމުމެއްގެ އިތުބާރެއް ނެތް ކަމަށްވެސް ޑރ ޖަމީލު ވަނީ ވިދާޅުވެފައެވެ.

ޑރ ޖަމީލު ވިދާޅުވީ އެފަދަ ކަންކަން ފެންނަނީ ރައީސް މުއިއްޒަކީ ލީޑަރަކަށް ނުވީމުން ކަމަށާ ވިސްނުން ކޮށިވެ ގަމާރުވުމުން ކަމަށްވެސް ވިދާޅުވިއެވެ. ރައީސް މުއިއްޒުގެ ވިސްނުން ހުންނަނީ ވައްކަން ކުރަން އެކަނި ކަމަށް ރައްޔިތުން ތުހުމަތު ކުރާ ކަމަށާ ގައުމަށް އައި އެންމެ ދެއުޅިއެއް ނުވާ، ގަމާރު، އަބަދު އުނބުޓާން ނަގާ ވެރިމީހާއަކީ ރައީސް މުއިއްޒު ކަމަށް ވެސް ޑރ ޖަމީލު ވިދާޅުވެފައިވެއެވެ.

އެހެންކަމުން ގައުމު ރައީސް މުއިއްޒުގެ ކިނބައިން ސަލާމަށް ކުރުން ނޫން އޮޕްޝަނެއް ރައްޔިތުންނަށް ނެތް ކަމަށްވެސް ޑރ ޖަމީލު ވިދާޅުވިއެވެ.