މޯލްޑީވްސް ވޯތަރ އެންޑް ސެވެރޭޖު ކޮމްޕެނީ (އެމްޑަބްލިޔުއެސްސީ)ގެ މުވައްޒަފުންނަށް ދޭން ޖެހޭ ބޯނަސް އަދިވެސް ނުލިބޭކަމަށް މައުލޫމާތު ލިބިއްޖެއެވެ.
ނަން ހާމަނުކުރުމަށް އެދި އެ ކުންފުނީގައި މަސައްކަތްކުރާ މުވައްޒަފަކު "ތޭރަ އޮންލައިން"އަށް މައުލޫމާތު ދީފައިވާ ގޮތުގައި އެ ކުންފުނީގެ މުވައްޒަފުންގެ އަހަރީ ބޯނަސް އަކީ އެޕްރިލް މަހު ލިބެން ޖެހޭ އެލަވަންސެއް ނަމަވެސް އަހަރުގެ ފަހު ކުއާޓަރ އާ ހަމައަށް އާދެވުނު އިރުވެސް ލިބިފައިނުވާ ކަމަށެވެ.
މިކަމާ ގުޅިގެން މުވައްޒަފުން ކަމާ ގުޅުން ހުރި ޑިޕާޓުތަކުގެ ވެރިންނާ ވާހަކަ ދެއްކުމުން ކުއާޓާރއަކަށް ފަހު ކުއާޓަރއެއް ދެމުން އައިސް އެންމެ ފަހުން ބުނެފައިވަނި ފަހު ކުއާޓަރގައި ދޭނެ ކަމަށް ކަންވެސް އެ މުވައްޒަފު ވަނީ ކިޔައިދީފައެވެ. އަދި މިހާރު ގުނަމުން މިދަނީ ފަހު ކުއާޓަރގެ ދުވަސްތައް ކަމަށްވެސް ވެއެވެ.
ފަހު ކުއާޓަރ ޑިސެމްބަރު މަހާ އެކު ނިމިގެންދާނެއިރު މުވަޒަފުންގެ ކަންބޮޑުވުމަކީ މުވައްޒަފުންނަށް ދޭންވާ ފައިސާ ނުދީ ހިފަހައްޓާއިރު ކުންފުނިން ބޭނުންވާ އެހެން ކަންކަން ބަރާބަރަށް ކުރަމުން ފައިސާ ކަރަދުކުރަމުން ގެންދާދިއުމެވެ.
އަހަރީ ބޯނަސް ނުދީ ލަސްކުރާ ސަބަބެއް ކުންފުނީގެ މެނޭޖުމަންޓުން ހާމަކޮށްދީައި ނުވާ ކަމަށްވެސް މައުލޫމާތު ލިބިފައިވެއެވެ.
މިކަމާ ގުޅިގެން އެމްޑަބްލިޔުއެސްސީގެ މީދިޔާ ކޯޑިނޭތަރ މުއާވިޔަތު މުހައްމަދަށް ގުޅާލުމުން ފޯނަށް ޖަވާބު ނުދެއްވާތީ ވަނީ ސާފުވާ ގޮތްނުވެފައެވެ.
