ޓެކްސީ ޑްރައިވަރުންގެ މައްސަލަތަކަށް ސަރުކާރުން ހައްލެއް ހޯދުމަށް މަސައްކަތް ނުކުރާ ކަމަށް ބުނެ، ޑްރައިވަރުންގެ ފާޑުކިޔުން ސަރުކާރަށް އަމާޒުކޮށްފި އެވެ.

ޓެކްސީ ޑްރައިވަރުންގެ އެސޯސިއޭޝަނުން ބޭއްވި ނޫސްވެރިންގެ ބައްދަލުވުގައި ވާހަކަދައްކަމުން ޑްރައިވަރުން ބުނެފައިވަނީ ޓްރާންސްޕޯޓް މިނިސްޓަރ އަމީން އެކި ޕްލެޓްފޯމްތަކުގައި އެކި ގޮތަށް ވާހަކަދައްކަވަމުންދާތީ ޑްރައިވަރުންގެ އިތުބާރު ގެއްލިފައިވާ ކަމަށެވެ.

އަދި ޑްރައިވަރުންގެ ޑިމާންޑަކީ މިނިސްޓަރު އަމީން އިސްތިއުފާ ދެއްވުން ކަމަށްވެސް ޑްރައިވަރުން ވަނީ ބުނެފަ އެވެ.

މީގެ އިތުރުން، ޑްރައިވަރުންގެ ކަންބޮޑުވުންތައް ރައީސް އާއި ހިއްސާ ކުރެއްވުމަށް ބައްދަލުވުމެއް މިއަދު ހަމަޖައްސަވާފައިވީ ނަމަވެސް "ބިޒީ" ކަމަށް ބުނެ ރައީސް އޮފީހުން ވަނީ ބައްދަލުވުން ކެންސަލް ކޮށްފަ އެވެ.

އެހެންކަމުން، ސަރުކާރު ޖަވާބުދާރީ ކުރުވުމަށް ސީދާ ހަރަކާތަށް ނުކުންނަން ނިންމާފައިވާ ކަމަށާއި އަދި އެ ހަރަކާތް ބާއްވާނެ ދުވަހަކާއި ތަނެއް ފައިނަލް ކުރުމަށްފަހު އިއުލާން ކުރާނެ ކަމަށްވެސް މި ނޫސްވެރިންގެ ބައްދަލުވުމުގައި ޑްރައިވަރުން ބުނެފައިވެ އެވެ.

ރައްޔިތުންގެ ޝަކުވާތަކާއި ކަންބޮޑުވުންތައް އަޑު ނޭހޭ ވެރިއެއް ރައްޔިތުން ބޭނުން ނޫން ކަމަށާއި ރައްޔިތުންނަށް ހެޔޮ ގޮތްތައް އެދިލައްވާނެ ވެރިއެއް ރައީސް މުއިއްޒު ކަންތައް ކުރައްވާހެން ކަންތަައްތައް ނުކުރައްވާނެ ކަމަށްވެސް ޑްރައިވަރުން ވަނީ ފާހަގަކޮށްފަ އެވެ.

އެސްއެމްއީ ލޯނުތަކަށް ގެނެސްފައިވާ ކާރުތަކާއި އަދި މިހާރުވެސް މާލެ އެތެރެކުރެވިފައިވާ ކާރުތައް ރީ ރަޖިސްޓްރީ ނުކޮށް އިތުރު ކާރުތައް ގެނެސް ރަޖިސްޓްރީ ކުރަމުންދާ މައްސަލައިގެ ކަންބޮޑުވުންވެސް ޑްރައިވަރުން ވަނީ މިއަދުގެ ނޫސްވެރިންގެ ބައްދަލުވުމުގައި ފާހަގަކޮށްފަ އެވެ.

މިސަރުކާރުން ވަނީ ޓެކްސީ ޑްރައިވަރުން މަގުމަތިކޮށްލާފައި ކަމަށާއި މިއީ ސަރުކާރުގެ ކުންފުންޏަކުން ނުވަތަ އިދާރާއަކުން ހިންގި "ސްކޭމް" އެކޭ ބުނެވިދާނެ ކަމަށާއި، ކާރުތައް ބޭނުން ނުކުރެވި ފައިސާދައްކަންޏާ އެއީ ހަމަ ސްކޭމެއް ކަމަށް ވާނެ ކަމަށް ޑްރައިވަރުން ވަނީ ބުނެފަ އެވެ.