އިންޑިއާއިން ރާއްޖެއަށް ގަތް 70 ޓަނުގެ ހަކުރު ރާއްޖެ ނުގެނެސް، އެ ތަކެއްޗާ ހަވާލުވި ފަރާތްތަކުން ގަވާއިދާ ހިލާފަށް އެތަކެތި ސްރީލަންކާއަށް ގެންދިޔަ ދިއުމުގެ އަޑިގައި ހުރީ ސްޓޭޓު ޓްރޭޑިން އޯގަނައިޒޭޝަން (އެސްޓީއޯ)ގެ މެނޭޖިން ޑިރެކްޓަރ ޝީމާދު އިބްރާހިމު ކަމަށް މައުލޫމާތު ލިބިއްޖެއެވެ.

މި މައުލޫމާތު "ތޭރަ އޮންލައިން" އާ ހިއްސާކޮށްފައިވަނީ ޝިމާދު އެކަން ކުރިއިރު އެކަމުގެ ތެރޭގައި މެދުވެރިކުރުވި އެސްޓީއޯގެ ބައެއް އިސް ފަރާތްތަކުގެ ތެރެއިން މީހެކެވެ.

ނަން ހާމަނުކުރުމަށް އެދި އެމީހާ ކިޔައިދީފައިވާ ގޮތުގައި އިންޑިއާއިން ރާއްޖެއަށް ގަތް 70 ޓަނުގެ ހަކުރު ރާއްޖެ ނުގެނެސް، އެ ތަކެއްޗާ ހަވާލުވި ފަރާތްތަކުން ގަވާއިދާ ހިލާފަށް އެތަކެތި ސްރީލަންކާއަށް ގެންދިޔައީ ސީދާ ޝިމާދުގެ އެންގުމަށް ކަމަށާ އެކަން އެގޮތަށް ކުރީ ޝިމާދު އަޑީގައި ހުރެގެން އޭނާއަށްވެސް އެއިން ބައި އެޅޭ ގޮތަށް ކަމަށްވެއެވެ. އެގޮތުން ޝިމާދު ވަނީ ލަންކާގެ ބަޔަކަށް އެ ހަކުރު ވިއްކާލާފައިކަމަށްވެސް އެމީހާ ވަނީ ކިޔައިދީފައެވެ.

މިއީ، މިދިޔަ  އޭޕްރީލްގައި ރާއްޖެ އާއި އިންޑިއާ އިން ހެދި ހާއްސަ އެއްބަސްވުމެއްގެ ދަށުން ރާއްޖެއަށް ފޮނުވަން ނިންމާފައިވާ ޖުމްލަ 64،494.33 ޓަނުގެ ހަކުރުގެ ތެރޭގައި ހިމެނޭ 70 ޓަނުގެ ހަކުރެވެ. އިންޑިއާއާ އެކު މިހާރު ވެފައިވާ އެއްބަސްވުމުގެ ދަށުން ރާއްޖެ އަށް ބޭނުންވާ ޒަރޫރީ ނުވަ ބާވަތެއް ފަސޭހަކަމާއެކު އަދި ހާއްސަ އަގުތަކުގައި ރާއްޖެއަށް ގެނެވެ އެވެ. އޭގެ ތެރޭގައި ހަނޑޫ، ހަކުރު، ފުށް، އަލުވި، ބިސް، ފިޔާ، މުގު، ހިލަ އަދި ހިލަވެލި ހިމެނެއެވެ.

އެ ހަކުރު ޝިޕްމަންޓު ލައްކާ ބަނދަރަށް ވާސިލުވީ ކިހިނެއްތޯއާ އެ ގަތީ ކޮންބައެއްކަން ތަހުގީގުކުރަމުން ދާކަމަށް އިންޑިއާއިން ހާމަކޮށްފައިވެއެވެ. އިންޑިއާގެ ނޫސްތަކުން ބުނާ ގޮތުން އިންޑިއާގެ ޑައިރެކްޓަރަޓް ޖެނެރަލް އޮފް ފޮރިން ޑްރޭޑް (ޑީޖީއެފްޓީ) އަދި ލަންކާގެ ބައެއް އިދާރާތަކުން އޮކްޓޯބަރު 25 ގައި އެ މައްސަލަ ބަލަން ވަނީ ފަށާފައެވެ. ނަމަވެސް ދެ މަސް ދުވަސްވާން ކައިރިވެފައިވާއިރު އޭގެ ފަހުން އެކަމުގެ ހިލަމެއް ވެފައިނުވަނީ އިންޑިއާއިން ކުރި ތަހުގީގުުތަކުން އެކަން ކުރީ ސީދާ ރާއްޖޭގެ އެސްޓީއޯގެ އެމްޑީކަން ހާމަވެ އެކަން ދިވެހި ސަރުކާރާ ހިއްސާކުރުމުން އެކަން ސިއްރުކޮށްދޭން ރާއްޖެ ސަރުކާރުން އެދިގެން ކަމަށް ވެސްވެއެވެ.

އިންޑިއާގެ ނޫސްތަކުން ބުނާ ގޮތުން އޭގެ ތެރެއިން ބައެއް ލަންކާގެ ޕޯޓުން ވަނީ ފެނިފައެވެ. މި މައްސަލައާ ގުޅިގެން ރާއްޖެއަށް ހަކުރު އެެކްސްޕޯޓްކުުރުން ވެސް އިންޑިއާއިން މަޑު ޖައްސާލިއެވެ. މިކަމާ ގުޅިގެން ދިވެހި ސަރުކާރުގެ ބަހެއް މިހާތަނަށް ލިބިފައެއްނުވެއެވެ.

އެސްޓީއޯގެ އެމްޑީގެ މައްޗަށް މިފަދަ ބޮޑު ވައްކަމެއްގެ މައުލޫމާތު ތިލަ ވެފައިވާއިރު ހަމަ އެ އެމްޑީ އަޑީގައި ހުރެ އޭނާ ކުރިން މަސައްކަތްކުރި ކުންފުނި ވިލާއަށް ވެސް އޭނާއަށް ބައި އެޅޭ ގޮތަށް ކޮންމެ މަހަކު 2 ލައްކަ ޑިލަރުގެ ޑީލެއް ނިންމާކަމަށްވެސް އަޑުތައް ގަދަވެފައިވެއެވެ.

ރައީސް ޑރ މުހައްމަދު މުއިއްޒު އިންތިހާބުވެވަޑއިގެން ވިދާޅުވެފައިވަނި ރައްޔިތުންގެ ފައިސާއަށް ޚިޔާނާތްތެރިވާ ފަރާތްތައް މަގާމުގައި ނުބައިތިއްބާނެ ކަމަށާ އެ ގަތޫ އެމަނިކުފާނުގެ ކިބައިގައި ހުންނަވާނެކަމަށެވެ. ނަމަވެސް މި ސަރުކާރު އައިސް ބައެއް މީހުންނާ މެދު ފިޔަވަޅު އަޅާ އަނެއްބައި މީހުންނާ މެދު ފިޔަވަޅުނާޅާތީ ގިނަ ބަޔަކު ގެންދަނީ އެކަމާ ސުވާލު އުފައްދަމުންކަން ފާހަގަކޮށްލެވެއެވެ.