މިއަދު ހެނދުނުގެ ވަގުތެއްގައި ހައުސިން މިނިސްޓްރީ ހިމެނޭ އިމާރާތުގެ އަލިފާން ރޯވުމުން އެ އިމާރާތުގައި ހުރި މާލެ ސިޓީގެ ވައިޓަލް އާ ބެހޭ ބައިގައި ހުރި މުހިއްމު ލިޔެކިޔުން ގެއްލިދާނެކަމުގެ ބިރު އެބައޮތް ކަމަށް މާލޭގެ ޑެޕިއުޓީ މޭޔަރ އަހުމަދު ނަރީޝް ވިދާޅުވެއްޖެއެވެ.

ހައުސިން މިނިސްޓްރީގެ އެ އިމާރާތުގައި ހުންނަ މާލޭ ސިޓީ ކައުންސިލްގެ ވައިޓަލް ރެޖިސްޓްރޭޝަންގެ އޮފީހުގައި ހުރި ލިޔެކިޔުންތައް ސަލާމަތްކުރެވޭތޯ އަލިފާން ހިފާފައި އޮތް ގަޑީގައި އެމްއެންޑީއެފް އަދި ސިޓީ ކައުންސިލްގެ މުވައްޒަފުންވެސް ގެންދިޔައީ ކުރަމުންނެވެ. އެވަގުތު އެ ސަރަހައްދުގައި ހުންނަވާ ނަރީޝް ބައެއް މީޑިޔާތަކަށް ވިދާޅުވީ، މި ހާދިސާއާ ގުޅިގެން މާލޭ ރަށްވެހިންގެ މުހިންމު މައުލޫމާތުތަކެއް ގެއްލިފައިވުން އެކަށީގެންވާ ކަމަށެވެ.

ނަރީޝް ވިދާޅުވީ ހުރިހާ ގެދޮރުގެ ރަޖިސްޓްރީތަކާއި، އުފަންވުމާއި މަރުވުމުގެ ރެކޯޑްތަކާއި، އާއިލީ ތާރީޚާއި، މާލޭގެ މާޒީގެ މުޅި އަރުޝީފު، އަދި ތަރައްގީގެ މަޝްރޫއުތަކުގެ ރެކޯޑްތަކާއި، ތާރީޚާ ގުޅިފައިވާ ހުރިހާ އެއްޗެއް އަބަދަށްޓަކައި ގެއްލިދާނެކަމުގެ ވަރަށް ހަގީގީ ފުރުސަތު އެބައޮތް ކަމަށެވެ.

ވިދާޅުވީ މި ކުރިމަތިވި އަލިފާނުގެ ހާދިސާއަކީ މިއީ ހަގީގަތުގައި ވެސް ވަރަށް ބޮޑު ހިތާމައެއް ކަމަށެވެ.

ރޯވި އިމާރާތުގައި ހުރި މާލެ ސިޓި ކައުންސިލްގެ ބަޔަކީ އުފަންވާ ކުދިން ރަޖިސްޓްރީކުރުމާއި އާބާދީއާ ބެހޭ މައުލޫމާތު ބަލަހައްޓާ އޮފީސް ބަޔެވެ. އަލިފާނުގެ ހާދިސާގައި މާލެ ސިޓީ ކައުންސިލުގެ ލޭންޑް އެންޑް ބިލްޑިން އަދި ވައިޓަލް ރެޖިސްޓްރޭޝަން ޑިޕާޓްމެންޓުގައި ހުރި ލިޔެކިޔުންތަކެއް ހަލާކުވެފައި ވާތީ، ރައްޔިތުންނަށް ދޭ މުހިންމު ހިދުމަތްތަކެއް ހުއްޓުމަކަށްވަނީ އައިސްފައެވެ.

ރޯވި އިމާރާތުގެ އަލިފާންގަނޑު ހަތަރު ވަރަކަށް ގަޑިއިރު ފަހުން ކޮންޓްރޯލު ކުރެވުނު ނަމަވެސް އަދިވެސް އެއްކޮށް ނިއްވާނުލެވޭ ކަމަށް އެމްއެންޑީއެފުން ހާމަކޮށްފައިވެއެވެ.