ކުންފުނިތައް ހަދާފައި ހުންނަނީ ރައްޔިތުން ފެލައިގެން ފައިދާ ނެރެން ނޫންކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ ޕީއެންއެފުން ބުރާސްފަތި ދުވަހުގެރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ގެންދަވަނީ މިފަހަކަށް އައިސް، ކަރަންޓު ބިލަށް އަރާ ފައިސާގެ މިންވަރު މަތިވަމުން ދާތީ އެކަމުގެ ކަންބޮޑުވުން ފާޅުކުރައްވަމުންނެވެ. އެގޮތުން ބުރާސްފަތި ދުވަހުގެރޭގެ ޖަލްސާގައިވެސް އެމަނިކުފާނު ވަނި އެކަމުގެ ކަންބޮޑުވުން ފާޅުކުރައްވާފައެވެ. އަދި ސްޓެލްކޯއިން ފައިދާ ނެރުނު ކަމަށް އެ ކުންފުނީގެ އެމްޑީ ފަހުމީ ވިދާޅުވެފައިވާތީ އެކަމަށް ވެސް ރައްދު ދެއްވާފައެވެ.

ރައީސް ޔާމީން ވިދާޅުވީ، ރައްޔިތުން ފެލައިގެން 120 މިލިއަން ނެރެ އޭގެން ޑިވިޑެންޓު ދައްކައިގެން ފައިދާ ނެރުމަކީ ރައޔްިތުންނަށް ޚިދުމަތް ދިނުން ނޫން ކަމަށާ އަދި ކުދި ވިޔަފާރިތަކަށް ނުކުރެވޭ ވިޔަފާރި ދައުލަތުން ކުރުމުގެ މަގްސަދުވެސް އޭގެން ހާސިލްނުވާ ކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީން ވަނީ ކުރި ސަރކާރުގެ ކޮރަޕްޝަންގެ ވާހަކަ ދައްކާއިރު މި ސަރުކާރުގެ ވެރިން ޒިންމާދާރުކުރުވަން ސުވާލުކުރަން މަޖިލީހަށް ހާޒިރުކުރަން، ހިތަދޫ މެދު ދާއިރާގެ މެމްބަރު އަހުމަދު އަޒާނަށް ގޮވާލާފައެވެ.