ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލްގެ ދީލަތިކަމުގެ ދުމުގައި ނުޖެހޭ ވެރިޔަކު މިހާރު ވެރިކަން ކުރާ ޕީއެންސީގައި ނުހުންނާނެ ކަމަށް ރައީސް އަބްދުﷲ ޔާމީން ވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވީ ރޭ ޕީޕަލްސް ނޭޝަނަލް ފްރަންޓް (ޕީއެންއެފް) އިން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ މަޖިލީހުގެ ކޮމިޓީތަކުން ވައްކަންތަކެއް ބަލަން މަސައްކަތް ކުރި ކަމަށާއި ނަމަވެސް އޭގެއިން ކޮމިޓީއަކަށް އެމްޑީޕީ ސަރުކާރުގެ އެއްވެސް މީހަކު ގެންދިޔަތަން ފެނިފައި ނުވާއިރު، މަޖިލީހުގެ ކޮމިޓީތަކަށް މުޅިން ވެސް ގެންދިޔައީ މި ސަރުކާރުގައި ތިބި ޕީއެންސީގެ ފަރާތްތައް ކަމަށެވެ.

ކުރީ ސަރުކާރުގެ ސެޓެލްމެންޓް ކަންތައްތަކުގައި އެންމެ އިސްކޮށް އުޅުއްވީ ފައްޔާޒު ކަމަށާއި އޭނާގެ ދީލަތިކަމުގެ ދުމުގައި ނުޖެހޭ ވެރިޔަކު ޕީއެންސީގައި ނުހުންނާނެ ކަމަށް ރައީސް ޔާމީން ވިދާޅުވި އެވެ.

ރައީސް ޔާމީން އިތުރަށް ވިދާޅުވީ މި ސަރުކާރަކަށް އެމްޑީޕީގެ ވެރިކަމުގައި ހިންގާފައި ހުރި ކޮރަޕްޝަންގެ އަމަލުތައް ކަމަށް މި މީހުން މި ސިފަކުރާ، ހަމަ އެއްވެސް ކަމެއް ބަލާކަށް ނުކެރޭނެ ކަމުގެ ޔަގީންކަން އެމަނިކުފާނަށް އެބައޮތް ކަމަށެވެ.

ރައީސް ޔާމީން މިފަދައިން ވިދާޅުވިއިރު ނިމުނު ރައީސް ސޯލިހުގެ ސަރުކާރުގައި 2019 ވަނަ އަހަރާއި 2023 ވަނަ އަހަރުގެ ނިޔަލަށް އެކި ގޮތްގޮތުން ގިނަ އަދަދެއްގެ ބަޔަކަށް ބަދަލުގެ ގޮތުގައި އެތައް ބިލިއަން ރުފިޔާއެއްގެ ފައިސާއާއި ހަރު މުދާ ދިނުމަށް ނިންމާފައިވާ މައްސަލާގައި ކުރީގެ ރައީސް އިބްރާހީމް މުހައްމަދު ސޯލިހާއި އެއިރުގެ އިގުތިސާދީ ވަޒީރު އަދި އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއީލުގެ މައްޗަށް ޖިނާއީ ތަހުގީގެއް ހިންގަން އެންގުމަށް ރައްޔިތުންގެ މަޖިލީހުން އިއްޔެ ވަނީ ފާސްކޮށްފަ އެވެ.

މާލިއްޔަތު ކޮމެޓީ ރިޕޯޓުގައި ބުނެފައި ވަނީ ގާނޫނުއަސާސީއާއި ގާނޫނުތަކުން އެ ބޭފުޅުންނާ މަތިކޮށްފައިވާ ޒިންމާއާ ހިލާފަށް ދައުލަަތުގެ މަތީ މަގާމުތަކުގައި ތިއްބަވައިގެން، ދައުލަތުގެ މުދަލާއި ފައިސާ އޭގެ ހައްގުވެރިން ނޫން ބަޔަކަށް ހޯދައިދިނުމަށް އެބޭފުޅުން މަސައްކަތްކުރެއްވިކަމަށް ތުހުމަތުވާ ކަމަށެވެ.

ސެޓްލްމަންޓް ކޮމިޓީ މެދުވެރިކޮށް ކުރީގެ ސަރުކާރުގައި 2018 ވަނަ އަހަރުން ފެށިގެން 2023 ވަނަ އަހަރާ ދެމެދުގައި ވަނީ 36 ރަށަކާއި ހަ ފަޅެއް އަދި ދެ ބިލިއަން ރުފިޔާ އަށް ވުރެ ބޮޑު އަދަދެއް އެކި ފަރާތްތަކަށް ވަނީ ދީފަ އެވެ. އެ މުއްދަތުގެ ތެރޭގައި ލެ ޓްރިވެނި ޖޭވީ އާއި ދީބާޖާ އިންވެސްޓްމަންޓް ޕްރައިވެޓް ލިމިޑެޓަށް އިތުރު 61.2 މިލިއަން ރުފިޔާ ދިނުމަށް ފިނޭންސް މިނިސްޓްރީގެ ސިސްޓަމަށް އަޅާފައި ވަނިކޮށް، މި އަހަރުގެ ފެބްރުއަރީ މަހު އެ ފައިސާ ދޫކުރުން އޭޖީ އޮފީހުގެ އެންގުމަކަށް ވަނީ މަޑުޖައްސާލައިފަ އެވެ.