ސަރުކާރުގެ ތިން މިނިސްޓްރީއެއް ހިންގަމުން ދިޔަ އިމާރާތްތަކެއްގައި އަލިފާން ރޯވެ އަނދާ ހުލިވުމާ ގުޅިގެން އެ ހާދިސާ ތަހުގީގުކުރުމަށް ރާއްޖެއިން ބޭރުގެ އެހީތެރިކަން ހޯދަން ނިންމައިފި އެވެ.

އެ ހާދިސާއާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ކޮމިޝަނާ އޮފް ޕޮލިސް އަލީ ޝުޖާ ވިދާޅުވީ އަލިފާނުގެ ހާދިސާ ހިނގި ސަރަހައްދު މިހާރު ފުލުހުންނާ ހަވާލުކޮށްފައިވާ ކަމަށެވެ. އަދި ފުލުހުންގެ ފޮރެންސިކު ޓީމުތަކުން އެ ސަރަހައްދުގައި މިހާރު ހަރަކާތްތެރިވަމުން އަންނަ ކަމަށެވެ.

ސީޕީ އިތުރަށް ވިދާޅުވީ ތަހުގީގުގެ ތެރެއިން މިހާރު ކުރިއަށްދަނީ އެ ސަރަހައްދުގެ ސީސީޓީވީ ފުޓޭޖުތައް ހޯދައި އެނަލައިޒްކުރުމާއި، އެ ހާދިސާގެ މަންޒަރު ފުރަތަމަ ފެނުނު މީހުންގެ ބަޔާންތައް ނެގުން ކަމަށެވެ. އަދި އެތަނުގައި އެވަގުތު ތިބި މީހުންގެ އިތުރަށްވެސް ބައެއް މީހުންގެ ފަރާތުން މައުލޫމާތު ހޯދުމަށް ފުލުހުން މަސައްކަތް ކުރަމުންދާ ކަމަށް ޝުޖާ ވިދާޅުވި އެވެ.

މި ހާދިސާއަކީ ބޮޑު ހާދިސާއެއްކަން ފާހަގަކުރައްވައި ޝުޖާއު ވިދާޅުވީ ހާދިސާގެ ތަހުގީގު އެންމެ ރަނގަޅަށް ކުރިއަށްގެންދިއުމަށް ބޭރުގެ ފަރާތްތަކުގެ އެހީތެރިކަން ހޯދުމަށް ނިންމަވާފައިވާ ކަމަށެވެ. އިތުރަށް ޝުޖާ ވިދާޅުވީ ތަހުގީގު ކުރިއަށްދާ މިންވަރަކުން އެންމެ ފުރިހަމަ މައުލޫމާތު ރައްޔިތުންނަށް ފޯރުކޮށްދެއްވާނެ ކަމުގަ އެވެ.

މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި އަނދާ އަޅިއަށްވީ ކޮންސްޓްރަކްޝަން އަދި އިންފްރާސްޓްރަކްޗާ މިނިސްޓްރީ އާއި ހައުސިން މިނިސްޓްރީ ހުންނަ އިމާރާތާއި އެންވަޔަރަމެންޓު މިނިސްޓްރީ ހުންނަ ގްރީން ބިލްޑިން އެވެ.

އަލިފާނުގެ ހާދިސާއާ ގުޅިގެން އެ ސަރަހައްދުގައި ހުރި ބައެއް ގެތަކަށް ވެސް ދުމުގެ އަސަރުކޮށްފައިވެ އެވެ. އެގޮތުން 7 ގެއަކުން 29 މީހަކު ވަގުތީ ހިޔާއަށް ވަނީ ބަދަލުކޮށްފަ އެވެ.