ހަތަރު މަހުގެ ތުއްތު ކުއްޖަކު ގޮތް ނޭނގޭ މަރަކުން ނިޔާވެފައި އޮއްވާ ރާއްޖޭގައި ފެނިއްޖެއެވެ.

މިކަން ފުލުހުންވެސް ވަނީ ކަށަވަރުކޮށްދީފައެވެ.

އާންމުގެ މީހަކު ފޭސްބުކުގައި ކުރި ޕޯސްޓެއްގައި ބުނެފައިވަނީ، ރޭ މެންދަމުން އަލިވެ 2:00 އާ 3:00 އާ އެދޭތެރޭގެ ވަގުތެއްގައި ކ. ގުރައިދޫ ގައި 4 މަހުގެ ތުއްތުކުއްޖަކު ނިޔާވެފައި އޮއްވާ ފެނިފައިވާ ކަމަށެވެ.

ނިޔާވެފައި އޮތް އިރު ތުއްތުކުއްޖާގެ ނޭފަތުން ލޭ އައިސްފައި ވާކަމަށް މައުލޫމާތު ލިބޭ ކަމަށާ އަދި މިހާރު އެކުއްޖާ ފެނުނުގެ އާއި އެ ސަރަހައްދު ވަނީ ޕޮލިހުން ތަހްގީގަށް ބަންދުކޮށްފައި ކަމަށް އެމީހާ ލިޔެފައިވެއެވެ.

ޝައްކު އުފެދޭ ކަމެއް ކުއްޖާގެ ހުރުމުން މާލެ ގެންގޮސް ޓެސްޓްތައް ހެދުމަށްފަހު މިހާރު އޮތީ މޯޗަރީގައި ކަމަށްވެސް އެ ޕޯސްޓުގައިވެއެވެ. އަދި މިކަން ސިއްރު ނުކުރުމަށް ފުލުހުންނަށް ގޮވާލާފައިވެއެވެ.

މި މައުލޫމާތު މިސްމީޑިޔާއާ ތިލަ ވުމާ ހަމައަށް ފުލުހުން މިކަން މީޑިޔާއަށް ހާމަކޮށްފައިނުވެއެވެ. ނަމަވެސް މި ޕޯސްޓާ އެކު ނޫސްވެރިއަކު ސުވާލަށް ޖަވާބު ދެމުން ފުލުހުންގެ މީޑިޔާ ގްރޫޕުގައި ފުލުހުން ބުނީ، ކ. ގުރައިދޫގައި 4 މަހުގެ ތުއްތު ކުއްޖަކު ނިޔާވި މައްސަލައެއް 14 ޑިސެމްބަރު 2024 ވަނަ ދުވަހު ފުލުހުންނަށް ރިޕޯޓުކޮށްފައިވާ ކަމަށާ ކުއްޖާގެ ހަށިގަނޑު އޮޓޮޕްސީ ހެދުމަށްތަކައި ރާއްޖެއިން ބޭރަށް ފޮނުވުމަށް ހަމަޖެހިފައިވާ ކަމަށެވެ. އަދި މައްސަލަ ފުލުހުން ތަހުގީގުކުރަމުންދާ ކަމަށްވެސް ބުނެފައިވެއެވެ.

ފުލުހުން މިހެން ހާމަކޮށްފައިވީ ނަމަވެސް ގޮތް ނޭނގޭ މަރުތަކެއް ދާދިފަހުން ރާއްޖޭގެ އެކި ހިސާބުތަކުގައި ހިނގާފައިވާއިރު އެ މައްސަލަތަކުގައިވެސް މައުލޫމާތު ފޯރުކޮށްދީފައިވަނީ އާންމުން ނުކުމެ އެތައް ޕްރެޝަރެއްކޮށްގެންކަން ފާހަގަކުރެވެއެވެ.