މިއަދު ރާއްޖޭގައިވެސް ސަރުކާރާއި މުޅި ގައުމުގެ މަސައްކަތުގެ ފެންވަރު، ޕަރފޯމަންސު އަދި ކޮލިޓީ ދައްވަމުގެ މައިގަނޑު ސަބަބަކީ ފޭކް ސެޓްފިކެޓު ނުވަތަ ސައްހަނޫން ތައުލީމީ ސެޓްފިކެޓުތައް ހުރި މީހުން ދައުލަތުގެ މަތީ މަގާމުތަކުގައި ގިނަވުން ކަމަށް ރާއްޖޭގެ ކުރީގެ ނައިބު ރައީސް، ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

ލަންކާގެ ރައްޔިތުން، އެގައުމުގެ މަޖިލިސް ރައީސް، އަސޯކާ ރަންވާލަގެ ތައުލީމީ ފެންވަރާ މެދު ސުވާލު އުފައްދާ އޭނާގެ ޑޮކްޓަރޭޓު ސެޓްފިކެޓަކީ ފޭކު އެއްޗެއްކަމަށް ބުނެ ފާޑުކިޔުން އަމާޒުކުރަން ފެށުމުން އޭނާވަނީ އިސްތިއުފާދީފައެވެ.

މިކަމަށް އިޝާރާތްކުރައްވާ ޑރ ޖަމީލު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް މުހައްމަދު މުއިއްޒުގެ ސަރުކާރުގެ ވަޒީރުން ފެށިގެން އެމްބަސީތަކުގައި ގިނަ އަދަދަކަށް ސެޓްފިކެޓް ގަނެގެން ތިބި އެތައް ބަޔަކު އެބަތިބި ކަމަށެވެ.

ނިސްބަތުން މުޅިދުނިޔެއިންވެސް މިއަދު ރާއްޖޭގައި ފޭކު ސެޓިފިކެޓާއި ކޮލިފިކޭޝަންތައް ގިނަކަން ފާހަގަކުރައްވާ ޑރ ޖަމީލު ވަނީ ލަންކާއިން މިގޮތަށް ދިވެހިންގެ ގިނަ ބަޔަކު ފޭކް ސެޓްފިކެޓް ހޯދާފައިވާކަމަށް ތުހުމަތު ކުރައްވާފައެވެ.

އިނގިރޭސި އަދި އަރަބި ބަސް ދުނިޔޭގެ ޔުނިވަރސިޓީއެއްގެ އެންޓެރެންސް އެގްޒާމް ފެންވަރަށް ނޭނގޭ އެތައް ބަޔަކު ރާއްޖޭގައި ބޮޑަތި މަގާމުތަކުގައި ތިބީ ފޭކް ސެޓްފިކެޓުންކަމަށާ ނުވަތަ އެއްވެސް ތަޢްލީމެއް ނެތިކަމަށް ވެސް ބުނެވިދާނެ ކަމަށް ޑރ ޖަމީލު ހާމަކުރައްވާފައިވެއެވެ.

ރާއްޖޭގައި މިއަދު ބޮޑަތި މަގާމުތަކުގައި ތިބި ނާގާބިލް އެތައް ބަޔަކު ޖޯކަރުންގޮތަށް ވެފައިވަނީ ވެސް އެހެންވެކަމަށް ޑރ ޖަމީލު ވިދާޅުވެފައިވެއެވެ.