ކުރީގެ ޓުވިޓާ [އެކްސް] ގައި ކާކުކަން ނޭނގޭ ގޮތަށް ހިންގަމުން އަންނަ "ހަސަން ކުރުސީ" އެކްސް ހޭންޑަލް އިން ސަސްޕެންޑުކޮށްފި އެވެ.
މީގެ ކުރިންވެސް ދެ ފަހަރެއްގެ މަތިން މި އެކައުންޓް ވަނީ ސަސްޕެންޑްކޮށްފައެވެ.
މި އެކައުންޓަކީ ސަރުކާރާއި ސަރުކާރުގެ އިސްމަގާމުތަކުގައި ތިއްބަވާ ފަރާތްތަކަށް ވަރަށް ބޮޑަށް ފާޑު ކިޔަމުން އަންނަ އެކައުންޓެކެވެ. ސަރުކާރުގެ ކޮރަޕްޝަންތައް ކަމަށް ބުނެ ބައެއް ލިޔެކިޔުންތައްވެސް އާއްމުކުރަމުން އަންނަ މި އެކައުންޓުން އަންނަނީ ބައެއް މީހުންގެ ޒާތީ ދިރިއުޅުމާއި ބެހޭ މައުލޫމާތުތައްވެސް އާއްމުކުރަމުންނެވެ.
މި ފަހަރު މި އެކައުންޓް ސަސްޕެންޑްކުރި ކީއްވެ ކަމެއް ނޭގެއެވެ.
ހަސަން ކުރުސީގެ ނަމުގައި ހިންގާ އެކްސް ހޭންޑަލް ހޯދުމަށްޓަކައި މި ސަރުކާރުން އަދި ކުރީ ސަރުކާރުން ވެސް ވަނީ ވަރަށް މަސައްކަތްކޮށްފަ އެވެ.
އެ އެކައުންޓު އެންމެ ފުރަތަމަ ބޭނުން ކުރަން ފެށިއިރު ގިނަ ބަޔަކު ތުހުމަތު ކުރީ އެއީ، ނަޝީދު އަޑީގައި ހުންނަވައިގެން ހިންގަވާ އެކައުންޓެއް ކަމުގަ އެވެ. ނަމަވެސް ނަޝީދު ވަނީ ތަކުރާރުކޮށް އެ ތުހުމަތުތައް ދޮގުކުރައްވާފަ އެވެ.
