ބަޖެޓުގައި ނުހިމަނާ މަޝްރޫއުތައް ކުރިއަށް ގެންދިއުމަކީ ކުރވެވޭނެކަމެއް ނޫންކަމަށް މީގެ ކުރިންވެސް ގާނޫނު ދަންނަ ބޭފުޅުން ވިދާޅުވެފައިވަނިކޮށް، ބަޖެޓުގައި ނުހިމަނާ އަނެއްކާވެސް އިތުރު މަޝްރޫއެއް ކުރިއަށް ގެންދަވަން ރައީސް ޑރ. މުހައްމަދު މުއިއްޒު ނިންމަވައިފިއެވެ.

އެގޮތުން އެމަނިކުފާނުވަނީ ބަޖެޓުގައި ނުހިމެނިޔަސް ތ. އަތޮޅު ގުރައިދޫގައި އެއާޕޯޓު އަޅާނެކަން އިއުލާންކުރައްވާފައެވެ.

ރައީސް މުއިއްޒު މިފަދައިން ވިދާޅުވީ ތ. އަތޮޅަށް ކުރައްވަމުން ގެންދަވާ ތިން ދުވަހުގެ ރަސްމީ ދަުތުރފުޅުގައި އަންގާރަ ދުވަހުގެ ހެނދުނު އެ އަތޮޅު ގުރައިދޫއަށް ވަޑައިގެން ބޭއްވި ޖަލްސާގައި ވާހަކަފުޅުދައްކަވަމުންނެވެ.

ރައީސް ވިދާޅުވި ގޮތުގައި މި އަހަރަށް ލަފާކޮށް، އެމްޑީޕީގެ ސަރުކާރުން މަޖިލިހަށް ބަޖެޓު ފޮނުވިއިރު، އިންތިގާލީ މަރުހަލާގެ ތެރޭގައި ދިނީ ކުޑަ ވަގުތުކޮޅެކެވެ. އެ ވަގުތުކޮޅުގެ ތެރޭގައި ވެސް ސަރުކާރުން ބޭނުންވާ ހުރިހާ ކަމެއް ވީ ވަރަކުން ފޮނުއްވާފައިވާނެ ކަމަށް ވެސް ރައީސް މުއިއްޒު ވިދާޅުވިއެވެ.

އެގޮތުން ރައީސް މުއިއްޒު ވިދާޅުވީ ބަޖެޓުން އުނިކުރި ނަމަވެސް ކުރަން ހުރި މަޝްރޫޢުތައް ޤާނޫނީ އިމުގެ ތެރެއިން ކުރިޔަށް ގެންދާނެ ކަމަށެވެ.

ރައީސް މުއިއްޒު އިތުރަށް ވިދާޅުވީ ގުރައިދޫގެ މަގުތައް ހެދުމާއި ހޮސްޕިޓަލުގެ މަސައްކަތް ވެސް ކުރިއަށް ގެންދަވާނެ ކަމަށެވެ. ނަމަވެސް ގައުމުގެ އިގްތިޞާދީ ހާލަތު ވަރަށް ބޮޑަށް ދަށަށް ގޮސްފައިވާތީ، ކުރިއަށް ހުރި ކަންކަން ކުރެވޭނީ އެ ހާލާތަށް ވިސްނައިގެން ކަމަށް ރައީސް މުއިއްޒު ވިދާޅުވިއެވެ.