ސިޓީ ކައުންސިލް މޭޔަރުންގެ މައްޗަށް ކުރެވޭ ކޮރަޕްޝަންގެ ތުހުމަތުތައް ގިނަ ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.

އެންމެ ފަހުން ބޭއްވި ޕީޕަލްސް ނޭޝަނަލް ފްރަންޓް (ޕީއެންއެފް) ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ މިފަހުން މާލޭގައި ހިނގި އަލިފާނުގެ ހާދިސާގައި އަދާ ހުލިވި އިމާރާތްތަކުގައި މާލޭ ސިޓީ ކައުންސިލްގެ ލިޔެކިޔުންތައް ވާނެ ކަމަށެވެ.

ރައީސް ޔާމީން ވިދާޅުވީ ސިޓީ ކައުންސިލްގައި ތިއްބެވި މޭޔަރުންގެ ކޮރަޕްޝަންގެ ބޮޑެތި މައްސަލަތައް އެ ލިޔެކިޔުންތަކުގައި ވާނެ ކަމަށެވެ.

ރައީސް ޔާމީން ވިދާޅުވީ މި ހުރިހާ ލިޔެކިޔުމެއް އަލިފާނުގެ ސަބަބުން އަދާ ހުލިވީ ކަމަށެވެ. އަދި މިކަން ރައްޔިތުންނަށް އިތުރަށް ސާފުކޮށްދޭން ޖެހޭ ކަމަށާއި ސިޓީކައުންސިލްގެ މޭޔަރުންގެ ވާހަކަ ޕީއެންއެފް ޕޯޑިއަމްގައި އަބަދު ވެސް ދައްކަމުން އަންނަ ކަމަށެވެ.

ރައީސް ޔާމީން ވިދާޅުވީ ބޮޑު ބަޖެޓަކުން ހިންގާ ތަނަކަށް ސިޓީ ކައުންސިލް ވާއިރު އެއް ވެސް ޒަމާނެއްގައި ސިޓީ ކައުންސިލް އޮޓިޑް ކުރުމަށް އޮޑިޓަރ ޖެނެރަލް އެތަނަށް ވަދެފައި ނުވާކަމަށެވެ. ރައީސް ޔާމީން ވިދާޅުވީ އެތަނުގެ އޮޓިޑްތައް ވެސް ރައްޔިތުންނަށް ލިބެން ޖެހޭ ކަމަށާއި އެއީ ރައްޔިތުންގެ ހައްގެއް ކަމަށެވެ.

އަދި ވިދާޅުވީ އެއްވެސް ފަރާތަކަށް ގެއްލިގެން މިއުޅެނީ ކޮން ލިޔުމެއްތޯ ނުވަތަ ގެއްލިގެން އުޅޭ އެއްޗެއް ބުނެ ނުދެވޭ ކަމަށެވެ. މިއީ ރައްޔިތުންވެސް ވަރަށް ބޮޑަށް ސުވާލު އުފައްދަމުން ގެންދާ މައްސަލައެއް ކަމަށް ރައީސް ޔާމީން ފާހަގަކުރެއްވި އެވެ.

ރައީސް ޔާމީން އިތުރަށް ވިދާޅުވީ މިހާތަނަށް އަލިފާން ހިނގަން މެދުވެރިވި ސަބަބު ގުޅުންހުރި އިދާރާތަކުން ސާފުކޮށްދެވެންޖެހޭނެ ކަމަށާއި ހާއްސަކޮށް އެވަރުގެ އަލިފާނުގެ ހާދިސާއެއް ހިނގައިފިކަމަށް ވާނަމަ ފުލުހުންނާއި ސިފައިންނަށް މިހާރު އެއީ ކިހިނެއް ހިނގި އަލިފާނެއްކަން ބުނެދޭން އެނގެންވާނެ ކަމަށް އެމަނިކުފާނު ވިދާޅުވި އެވެ.

އަލިފާނުގެ ހާދިސާއާ ގުޅިގެން ސިޓީ ކައުންސިލުން ބުނީ، އެ ކައުންސިލްގެ ލޭންޑް ޑިޕާޓްމަންޓުގެ 90 އިންސައްތަ ލިޔެކިޔުން ސަލާމަތް ކުރެވުނު ކަމަށެވެ. އަދި ބޯހިޔާވަހިކަމާއި ގެދޮރުވެރިކަމާ ގުޅުންހުރި އެއްވެސް ލިޔެކިޔުމެއް ނުގެއްލޭކަމަށް އިންފްރާންސްޓްރަކްޗާ މިނިސްޓަރު، ޑރ. އަބްދުﷲ މުއްތަލިބު ވަނީ ވިދާޅުވެފައެވެ. ނަމަވެސް ރަށްރަށުގެ ލޭންޑް ޔޫސް ޕްލޭނާ ގުޅުން ހުރި ބައެއް ލިޔެކިޔުންތައް ގެއްލިފައިވާ ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވި އެވެ.