ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) ތެރެއަށް ފުލުހުން ވަދެއްޖެ ކަމުގެ މައުލޫމާތު ލިބިއްޖެއެވެ.

މައުލޫމާތު ލިިބިފައިވާ ގޮތުގައި، އެޗްޑީސީގެ ތެރެއަށް ފުލުހުން ވަދެފައިވަނީ، ރައީސް އިބްރާހިމު މުހައްމަދު ސޯލިހުގެ ސަރުކާރުން، ބިންވެރިޔާ ސްކީމުގެ ދަށުން ދޫކުރި ބިންތައް ލިބުނު މީހުންގެ ލިސްޓުގެ ބޭރުން ހުޅާމާލެއިން ގޯތިތަކެއް ދޫކުރި މައްސަލައިގައެވެ.

އެޮތުން އެސިސްޓަންޓު ކޮމިޝަނާ އޮފް ޕޮލިސް އަހުމަދު ޝިފާން އާ ހަވާލާދީ ބައެއް މީޑިޔާތަކުގައި ރިޕޯޓުކޮށްފައިވާ ގޮތުގައި، އެޗްޑީސީގެ ލިޔެކިޔުންތަކެއް ފޯޖުކުރި މައްސަލައެއް ފުލުހުން ތަހުގީގު ކުރަން ފަށާފައިވާ ކަމަށެވެ. އަދި އެ މައްސަލާގައި ފުލުހުން އެޗްޑީސީއަށް ވަދެފައިވާ ކަމަށް އޭނާ ވިދާޅުވިއެވެ.

އެގޮތުން އެޗްޑީސީގެ މުވައްޒަފަކު ނަން ހާމަނުކުރުމަށް އެދި "ތޭރަ އޮންލައިން" އަށް މައުލޫމާތު ދެމުން ބުނެފައިވަނީ 50 ގޯއްޗެއް ވިއްކާ 406 މިލިއަންގެ ފައިދާއެއް އެމްޑީ ފަޒުލް ރަޝީދުވެސް ހިމެނޭހެން އެޗްޑީސީގެ ވެރިންނަށާއި މިކަމުގައި ޝާމިލުވާ ހައުސިންގ މިނިސްޓްރީގެ އިސްވެރިންނަށް ލިބިފައިވާ ކަމަށެވެ.

މައުލޫމާތު ލިބިފައިވާ ގޮތުންނާ އަދި މީސް މީޑިޔާގައި ދައުރުވަމުންދާ ބައެއް ލިޔެކިޔުންތަކުން ހާމަވާގޮތުގައި، ޝަރުތު ހަމަނުވިޔަސް ގޯތި ދޫކުރި މީހުންގެ ތެރޭގައި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ކޮއްކޮ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނެ އެވެ.

ބިންވެރިޔާ ސްކީމުގެ ދަށުން ގޯއްޗަކަށް އެދި ހުށަހެޅި މީހުންގެ ތެރޭގައި ފަޒުލްގެ ކޮއްކޮ ފަޒީލް ހިމެނެނު ނަމަވެސް އުސޫލުގެ ދަށުން އޭނާގެ ޝަރުތުހަމަނުވާ ކަމަށް އޮތީ ކަނޑައަޅާފައެވެ. އޭނާއަށް ގޯތި ނުލިބުނީ ސަރުކާރުން ކުރިން ހިންގި ބޯހިޔާވަހިކަމުގެ ސްކީމެއްގެ ދަށުން ބޯހިޔާވަހިކަމެއް ލިބިފައިވާ މީހަކަށް ވާތީއެވެ.

މީސް މީޑިއާގައި އާންމުވެފައި ހުރި ލިޔެކިޔުންތަކުން ދައްކާ ގޮތުގައި މި ގޮތަށް އެޗްޑީސީން ދިން ގޯތިތަކެއްގެ ވެރިފަރާތް ސާފުކުރަން ހައުސިން މިނިސްޓްރީއަށް ހުށަހެޅި އެވެ. މިނިސްޓްރީން ދިން ޖަވާބުގައި ބުނީ އެ ގޯތިތަކަކީ އެއްވެސް ބަޔަކާ އެ މިނިސްޓްރީން ހިންގި ސްކީމުގެ ދަށުން ހަވާލުކޮށްފައި ހުރި ގޯތިތަކެއް ނޫން ކަމަށެވެ.