ބުރާސްފަތި ދުވަހުން ފެށިގެން ރާއްޖޭގެ މޫސުން އިތުރަށް ގޯސްވާނެ ކަމަށް މޫސުމާ ބެހޭ ގައުމީ އިދާރާއިން ހާމަކޮށްފިއެވެ.
މެޓު އޮފީހުން ހާމަކުރާ ގޮތުގައި މިދުވަސްވަރަކީ ރާއްޖެ ސަރަހައްދަށް ހުޅަނގު މޫސުން ނިމި، އިރުވައި މޫސުން ފެށޭ ދުވަސްވަރުކަމުން މިދުވަސްވަރު ކޮޅިގަނޑު އުފެދުމުގެ ފުރުސަތު ބޮޑެވެ.
މިއާއެކު، މިހާރުކުރަމުންދާ ވިއްސާރައިގާ ކުރިއަށް އޮތް ހަތަރު ދުވަހު މެދުރާއްޖެތެރެއާއި ދެކުނަށް މޫސުން ވަރަށް ބޮޑަށް ގޯސްވާނެ ކަމަށާއި މިދުވަސްތަކުގައި ވައިގަދަވެ، ކަނޑުގަދަވާނެކަމަށް މޫސުމާބެހޭ ގައުމީ އިދާރާއިން ބުނެއެވެ.
މިދުވަސްވަރު ކަނޑުގަދަވުމުގެ ސަބަބުން ބައެއް ރަށްތަކަށް އުދައިގެ އަސަރު ކުރުން އެކަށީގެންވާކަމަށާއި ދެކުނާއި މެދުރާއްޖެތެރޭގެ އިތުރުން އުތުރުގެ ރަށްތަކަށްވެސް މޫސުން ކޮންމެވެސް ވަރަކަށް ގޯސްވާނެކަމަށް އެއިދާރާއިން ބުނެފައިވެއެވެ. ކަނޑުދަތުރުކުރާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށް އެއިދާރާއިން އިލްތިމާސްކުރެއެވެ.
މިހާރު ކުރަމުންދާ ވިއްސާރަ އަލިވާނެކަމަށް ލަފާކުރެވެނީ އަންނަ ހަފްތާގެ ހޯމަ ދުވަހުން ފެށިގެން ކަމަށް އެއިދާރާއިން ބުނެއެވެ.
