ޝަހާދަތުގެ ދެކަލިމައިގެ މައްޗަށް ބިނާވެފައިވާ ޝަރީއަތާއި ބަޔަކު ފެއަށް ޖެހުމުގެ ސަބަބުން ޖެހިފައިވާ މުސީބާތް، މެންދުރުގެ އިރުފަދައިން އަޅުގަނޑުމެންނަށް މިއޮތީ ފެންނާށެވެ. މުޖުތަމައުގައި އަމާންކަމެއް ނެތެވެ. އުފާވެރިކަމެއް ނެތެވެ. ޝޯޝަލް ކޮންޓްރެކްޓްއެއް ނެތެވެ. ވައްކަންކުރުމާއި، އޮޅުވާލުމާއި ލިޔެކިޔުން ފޯޖްކުރުމާއި ދޮގު ހެދުން ފަދަ އެންމެހައި މުނާފިގު ކަމެއް ވަނީ އާންމުވެފަ އެވެ. މިއަދު ކޮރަޕްޝަންގެ ވަޅުގަނޑަކަށް ގައުމު ވެއްޓިފައިވާއިރު، މި ސަރުކާރުގެ ކޮންމެ ވެރިޔަކުވެސް ދައުލަތް ހިންގުމުގައި އެމީހެއްގެ އަމިއްލަ އެދުން އިސްކުރާ މަންޒަރު ފެންނަމުންދާކަމީ ހިތާމަކުރަންޖެހޭފަދަ ކަމެކެވެ.

މިއަދު ސަރުކާރުގެ ވެރިންގެ ތެރޭގައި ފައިސާއާއި މުދާ ހޯދުމުގައި ހަރާމެއް ހަލާލެއް ބަލާލުމެއްނެތެވެ. ހެޔޮކަންކަމަށް އަމުރުކޮށް ނުބައި ކަންކަން ނަހީކުރުމުގެ ރޫހެއްނެތެވެ. ތިމާގެ އަހާ ނުބައިކަމެއްގެ ތެެރެއަށް ވެއްޓިގެންދާއިރުވެސް، ހެޔޮބަހެއް ބުނެލުންވެސް އެއީ ދަށުދަރަޖައިގެ "ކަޓު" ކަމަކަށް މި ސަރުކާރުގެ ވެރިންނަށް ގަބޫލުކުރެވެން ފަށައިފަ އެވެ.

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު އަށް ވެސް މި ޖެހުނީ މިފަދަ ހާލެކެވެ. ވާނީ ވެސް އެހެން ތާ އެވެ. ކުޑަ ސޯބު އެބުރޭނީ ބޮޑު ސޯބު އެބުރޭ ހެނެވެ.

މިއަދު ފަޒުލްއަށް ކުރިމަތިވި އެންމެ ބޮޑު ސުވާލަކީ "ވަގު ގޯތީ"ގެ ލިއުން އޮތް ދެ މީހުންގެ ތެރޭގައި ހިމެނޭ އެކަކީ  އޭނާގެ އެއްބަނޑު އެއްބަފާ ބޭބެ ކަން އެނގިވަޑައިގަތުމުން ވެސް ފިޔަވަޅު ނާޅާ މިހާ ދުވަސް ވީ ކީއްވެގެންތޯ އެވެ.

ދެން ބޭބެ ގޯތި ހޯދަން ހުށައަޅައިގެން އެ އުޅެނީ ވަގު ލިއުންތަކެއްކަން އެނގިވަޑައިގެންނެވި ހިސާބުން ފަޒުލް ނުވަތަ ސަރުކާރުގެ ކުންފުނި އެޗްޑީސީން ފުލުހުންނަށް އެކަން ހުށަނޭޅުއްވީ ކީއްވެތޯ އެވެ.

މި ސުވާލު ތަކަށް ދޭނެ ޖަވާބެއް ފަޒުލް އަތަކު މިއަދަކު ނެތެވެ.

ސަބަބަކީ މާލޭ މީހުންނަށް ގޯތި ދޭން ހިންގި ބިންވެރިޔާ ސްކީމްގެ ލިސްޓުގައި ނަން ވެސް ނެތި، އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލްގެ އެއްބަނޑު އެއްބަފާ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނޭ ގޮތަކަށް، ލިސްޓުގައި ނެތް ބަޔަކަށް ހުޅުމާލެއިން ގޯއްޗެއް "ދިން" ކަމަށް ބުނާ މައްސަލައެއް އާންމުންނަށް ފެންމަތިވިއިރު، އެޗްޑީސީން ހިންގި ބިމުގެ ބޮޑު ވައްކަން ހިނގާފައިވަނީ މީގެ އެތައް މަހެއް ކުރިން ކަމާއި އެކަން އޮތީ ސަރުކާރުން ފަސްއަޅާ ފޮރުވާފަކަން ފަޅާ އެރުމެވެ.

ފޯޖުކޮށްފައިވާ ލިޔުންތަކެއް ބޭނުންކޮށްގެން ގޯތި ދޫކޮށްފައިވާ ކަމަށް ބުނެ ހެއްކާއިއެކު، ސޯޝަލް މީޑިއާގައި ފަޅާ އަރުވާލި ލިޔެކިޔުންތަކަށް ބަލާއިރު، ހުޅުމާލޭގެ 20821 އަދި 20768 ނަންބަރު ގޯތި ތަކަކީ ހައުސިންގ މިނިސްޓްރީން އެއްވެސް ފަރާތަކާ ހަވާލު ކޮށްފައި ނުވާ ގޯތި ތަކެއް ކަމަށް ހައުސިން މިނިސްޓްރީގެ 66 ނަންބަރު ސިޓީން 15 އޮގަސްޓް 2024 ގައި އެޗްޑީސީ އަށް އޮތީ އަންގާފަ އެވެ.

އުސޫލާ ހިލާފަށް ގޯތި ދިންކަން ހާމަވީ އެގޮތަށް ދޫކުރި ގޯތިތަކެއްގެ އިންފާރު ރޭނުމުގެ ހުއްދައަށް ހައުސިން މިނިސްޓްރީގައި އެޗްޑީސީން އެދުމުން، އެ މީހުންނަކީ ބިންވެރިޔާ ސްކީމްގެ ދަށުން ގޯތި ހޯދަން އެދުނު ބައެއް ނޫންކަން ހައުސިން މިނިސްޓްރީން އެންގުމުންނެވެ. އެކަމާ ގުޅޭ ލިޔުންތައް ވަނީ އާންމުވެފަ އެވެ.

އެޗްޑީސީ އަށް ހައުސިންގ މިނިސްޓްރީން ފޮނުވި 66 ނަންބަރު ސިޓީ އަކީ އެ ކޯޕަރޭޝަނުން 24 ޖުލައި 2024 ގައި ފޮނުވި ސިޓީ އަކަށް ޖަވާބު ދިނުމުގެ ގޮތުން ފޮނުވާފައިވާ ސިޓީއެކެވެ.

ސިޓީގެ ޖަވާބުގައި ހައުސިންގ މިނިސްޓްރީން ބުނެފައި އޮތީ، ސަރުކާރުން ކުރިއަށް ގެންދާ ގެދޮރުވެރިން ޕްރޮގްރާމްގެ ދަށުން މާލެ ސަރަހައްދަށް އަމާޒުކޮށް ކުރިއަށް ގެންދާ "ބިންވެރިޔާ" ގޯތި ލިބިފައިވާ ފަރާތްތަކުގެ ތެރެއިން ހަވާލާ ދެވުނު އެޗްޑީސީގެ ސިޓީގައި ބަޔާން ކޮށްފައިވާ ފަރާތްތަކަކީ އެ ސްކީމުން ގޯއްޗަށް އެދި އެޕްލިކޭޝަން ހުށަހަޅާފައިވާ ފަރާތްތަކެއް ނޫންކަން އެ ސްކީމްގެ ޑޭޓާބޭސް އިން ދައްކާ ކަމަށެވެ.

މި މައްސަލަ ސޯޝަލް މީޑިއާގައި ފެންމަތިވުމާ ގުޅިގެން ގިނަ ބަޔަކު އަންނަނީ މައްސަލަ ބެލުމަށް ގޮވާލަމުންނެވެ. އަދި ރޭ އެޗްޑީސީ އިމާރާތް ކައިރިއަށް އެއްވެ، ބައެއް މީހުން ވަނީ މުޒާހަރާކޮށް ނުރުހުން ފާޅުކޮށްފައި އެވެ.

ފަޒުލް ބޭބެއަށް ލިބޭ "ގޯތީގެ ވަށާފާރު ވެސް ރާނަން ފަށާފައިވާ" ވަގު ގޯތީގެ މައްސަލަ ވަރަށް ބޮޑަށް ހޫނުވެ، މުޅި ރާއްޖޭގެ ސަމާލުކަމަށް އެކަން އައުމުން ފަޒުލް ވަނީ ރޭ އެޗުޑީސީގައި ނޫސްވެރިންގެ ބައްދަލުވުމެއް ކުއްލި ގޮތަކަށް ބާއްވަވައިފަ އެވެ.

ނޫސްވެރިން ކުރި ގިނަ ސުވާލުތަކުން ރެކިވަޑައިގެން، ބޭބެގެ ދިފާއުގައި އެއް ތައްގަނޑަކަށް ޖަވާބެއްގެ ގޮތުގައި އޭނާ ވިދާޅުވީ "ޕްރޮސެސް" އޮންނަ ގޮތަކީ އެޗްޑީސީ އަށް އަންނަ ކޮންމެ ހިދުމަތަކީ އޭނާއަށް އެނގޭނެ މައުލޫމާތެއް ނޫން ކަމަށެވެ.

ނަމަވެސް މިދިޔަ ފަސް މަސް ތެރޭގައި "ވަގު ގޯތީގެ" މައްސަލަ ސިއްރު ކޮށްފައި ބޭއްވީ ކީއްވެތޯ އާއި އެއީ އަމިއްލަ ބޭބެގެ މައްސަލައަކަށް ވުމުން ތޯ ނޫސްވެރިން ސުވާލު ކުރި އެވެ. އަދި މި މައްސަލާގައި ފަޒުލްގެ ބޭބެ ވެސް ޝާމިލުވާތީ، އަމިއްލަ މަސްލަހަތު ހިމާޔަތްކުރަންތޯ ވެސް ބައެއް ނޫސްވެރިން ސުވާލުކުރި އެވެ.

ޖަވާބުގައި މުޅި މީހާ ރުޅިގަދަވެ ނޫސްވެރިން ކުށްވެރިކުރާ ރާގަކަށް ފަޒީލްއަށް ލިބިފައިވާ ކަމަށް ބުނާ ގޯއްޗާ ބެހޭ ގޮތުން ފަޒުލް ވިދާޅުވީ މި [މައްސަލައިގައި] ލޭގެ ގުޅުން ހިގާ ފަޒީލް ރަޝީދު ބޭބެއަށް ވުމަކީ އިއްތިފާގެއް ކަމަށެވެ. އަދި މިކަމުގައި އޭނާގެ އިޝޫއެެއް ނެތް ކަމަށެވެ.

ތެދެކެވެ. ހުޅުމާލެއިން ބޮޑު ބިމެއް ލިބުމަކީ އެއް ވެސް މީހަކަށް އިޝޫއެއް ނޫނެވެ. އިޝޫއަކީ ނުހައްގުން އޮޅުވާލުމާއި މަކަރާއި ހީލަތުން ވަގަށް ގޯއްޗެއް ލޭގެ ގުޅުމަށް ގުރުބާން ކޮށްލުމެވެ. ވަޒީފާގެ ނާޖާއިޒް ބާރުގެ ބޭނުން ކުރުމެވެ. ކޮންފްލިކްޓް އޮފް އިންޓްރެސްޓެއް އެކުލެވޭ "ގޯތި ވައްކަން" ފުލުހަށް ރިޕޯޓް ނުކުރުމެވެ.

ފަޒުލް، ނޫސްވެރިންގެ ބައްދަލުވުން ނިންމައިލި އިރު ވެސް ނޫސްވެރިން ދިޔައީ އެ މައްސަލާގައި ގިނަ ސުވާލުތަކެއް އަމާޒު ކުރަމުންނެވެ. ނަމަވެސް އިތުރަށް ސުވާލުތަކަށް ޖަވާބު ނުދެއްވައި ތަކުރާރުކޮށް ވިދާޅުވަމުން ގެންދެވީ "މިއީ އޭނާގެ އަމިއްލަ ލޭ ހިނގާ މީހަކާ ގުޅޭ މައްސަލައެއް ކަމަށެވެ.

ފަޒުލްގެ އެއްބަނޑު އެއްބަފާ ބޭބެ ފަޒީލް ހިމެނޭ ގޮތަށް ބަޔަކަށް ބިންވެރިޔާ ސްކީމްގެ ބޭރުން ހުޅުމާލެއިން ގޯތިތަކެއް ދޫކުރި މައްސަލައިގެ ތަހުގީގަށް ފުލުހުން ވަނީ އިއްޔެ ހަވީރު އެޗްޑީސީގެ މައި އޮފީހަށް ވަދެފައި އެވެ.

ފުލުހުންނަށް ވެސް ފެންނާން އޮތީ އެންމެ އެއްޗެކެވެ. އެއީ ފަޒުލް އާއި ފަޒީލްގެ ލޭގެ ގުޅުމުން ތިލަވި "ވަގު ގޯތީ"ގެ ބޮޑު ވައްކަމެވެ..!

އަދި އެއް ވާހަކަ އެވެ.

ބޭރުން މީހުން ގެނެސްގެން މިނިވަން ތަހުގީގެއް ކޮށްފިނަމަ މިކަމުގައި ވެސް އެންމެ ބޮޑު މާލީ މަންފާއެއް ލިބިފައި އޮންނާނީ ހަމަ ފަޒުލްގެ ބޮޑު ސޯބު "ކައްޒާބު" އަށެވެ. މި ހަގީގަތް ސާފުވާން ދާދި ގާތެވެ. ހާލަތާއި މަންޒަރު ބަދަލު އެބަވެ އެވެ...!