މޯލްޑިވްސް ވޯޓާ އެންޑް ސެވެރޭޖު ކޮމްޕެނީ (އެމްޑަބްލިޔުއެސްސީ)ގެ ޑެޕއިޓީ މެނޭޖިން ޑިރެކްޓަރ މުހައްމަދު ފަޒީލު ރަޝީދު ވަނީ މަގާމުގެ ބޭނުން ނަހަ ގޮތުގައި ހިފާ ދައުލަތުގެ މުދާ އަމިއްލަ ބޭނުމަށް ބޭނުންކޮށްފައިކަމަށް މައުލޫމާތު ލިބިއްޖެއެވެ.

ފަޒީލުގެ މައްސަލައެއް ފުލުހުން ބަލަމުން ގެންދާތީ އޭނާ މިވަގުތު ހުރީ މަސްއޫލިއްޔަތުތަކުން އެކަހެރިކޮށްފައެވެ. ފަޒީލުގެ މައްސަލައެއް ފެންމަތިވެފައި މިވަނީ ނިމިދިޔަ ސަރުކާރުން ދޫކުރި ބިންތަކުން ބިން ލިބުނު ލިސްޓުގައި އޭނާގެ ނަން ނުވެސް ނެތް އިރުވެސް އޭނާއަށް ބިމެއް ލިބި ބިމުގައި ވަށާ ފާރުވެސް ރާނަން ފަށާފައިވަނިކޮށް، އެ ބިމަކީ، ފަޒީލުގެ ކޮއްކޮ އިބްރާޙިމު ފަޒުލް ރަޝީދުގެ އެމްޑީކަމުގެ ދަށުން ހިނގާ އެޗްޑީސީއިން ލިޔުންތަކެއް ފޯޖުކޮށްގެން ހޯދާފައިވާ ބިމެއް ކަމަށް ހާމަވާ ލިޔުންތަކެއް މީސް މީޑިޔާގައި ދައުރުވާން ފެށުމުންނެވެ.

މި އަޑުތައް ގަދަވެ ފުލުހުން މި މައްސަލަައިގައި ޖިނާއީ ތަހުގީގެއް ހިންގަމުންދާކަމަށް ހާމަކުރުމުންވެސް އެކަމުގައި ތުހުމަތު ކުރެވޭ މީހުންތައް މަގާމުން ދުރުނުކޮށް ތިއްބާ ރައްޔިތުންގެ ޕްރެޝަރ ބޮޑުވެ ވަނީ މިއަދު އެޗްޑީސީގެ ޗެއަރމަން ފިޔަވާ ބޯޑުގެ ހުރިހާ މެމްބަރުން ސަސްޕެންޑްކޮށްފައެވެ. އަދި ފަޒީލުވެސް އެމްޑަބްލިޔުއެސްސީގެ ޑީއެމްޑީގެ ހުރިހާ ޒިންމާއަކުން އެކަހެރިކޮށް މައްސަލަ ބަލާނިމެންދެން ސަސްޕެންޑްވެސް ކޮށްފައެވެ.

މި ވާހަކަތައް ތިލަވެފައިވަނިކޮށް، ނަން ހާމަނުކުރުމަށް އެދި އެމްޑަބްލިޔުއެސްސީގެ ވަރަށް ގިނަ ދުވަސްވީ މުވައްޒަފަކު "ތޭރަ އޮންލައިން"އަށް މައުލޫމާތު ދިން ގޮތުގައި ފަޒީލު ވަނީ އޭނާ އެ މަގާމަށް އައްޔަންކުރުމުން އޮފީހަށް ނުކުންނަ ކޮންމެ ދުވަހަކު ހެން ކުންފުނީގެ ޑިއުޓީ ސައިކަލްގައި އަމިއްލަ ބޭނުންތަކަށް މާލެ ތެރޭގައި ދުއްވަން ބޭނުންކޮށްފައި ކަމަށާ އޮފީސް ބޭނުމަށް ސައިކަލް ހޯދަން ބަލާއިރު ސައިކަލް ނެތުމުން ގުޅައިގެން އެތައް އިރެއް ފަހުން އައިސް ސައިލަް ހަވާލުކުރާ ކަމަށެވެ. މިކަން ސީނިއަރ މެނޭޖްމަންތޫގެ ސަމާލުކަމަށް އެތައް ފަހަރަކު ގެނައި ނަމަވެސް އެކަމާ މެދު އެއްވެސް ފިޔަވަޅެއް އަޅާފައި ނުވާކަމަށްވެސް އެމުވައްޒަފު ކިޔައިދީފައިވެއެވެ.

ފަޒީލުވަނީ ކުންފުނީގެ އެ ސައިކަލު އޭނާގެ ރައްޓެހިން ދުއްވަންވެސް ދީފައި ކަމަށާ އެއީ ގަވާއިދާ ޚިލާފުކަމެއް ކަން ވެސް އެމީހާ ފާހަގަކޮށްފައިވެއެވެ.

މަގާމުގެ ނުފޫޒުން ދައުލަތުގެ މުދާ ނަހަމަ ގޮތުގައި ފަޒީލު ބޭނުން ހިފާފައިވާކަން މި މިންވަރުން އެހެންކަމުން އެބަ ހާމަވެއެވެ.