އިޖުތިމާއި ސިއްހީ އިންޝުއަރެން ސްކީމާއި އިޖުތިމާއީ ރައްކާތެރިކަމުގެ އެހެނިހެން ޕްރޮގްރާމުތައް ހިންގާ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ ޑެޕިއުޓީ ސީއީއޯގެ މަގާމުގައި ހުރި ޝިއުނާ އަހުމަދު މަގާމުން ވަކިކޮށްފިއެވެ.
އެނގިފައިވާ ގޮތުގައި އޭނާ މަގާމުން ވަކިކުރުމަށް ފަހު ޑެޕިއުޓީ ސީއީއޯގެ މަގާމު ވަނީ އުވައިލާފައެވެ. ޝިއުނާ މަގާމުން ވަކިކުރި ސަބަބެއް ހާމަކޮށްފައިނުވެއެވެ.
ޝިއުނާ މަގާމުން ވަކި ކުރި ދަނޑިވަޅަކީ ރައީސް މުއިއްޒު އަޑީގައި ހުންނަވައިގެން އުފެއްދި ކަމަށް އަޑު އަރާފައިވާ އެމްއެމްޓީވީ އާއި އެންސްޕާއާ ދެމެދު ވެވުނު ފަސް އަހަރުގެ އެއްބަސްވުމެއްގެ ދަށުން މަހަކަށް 580،000ރ. ގެ ރޭޓުން ކުލީގެ ގޮތުގައި އެމްއެމްޓީވީ ހިންގަން އެންސްޕާ އިން ޚަރަދު ކުރާގޮތައް، ޖުމްލަ 34.8 މިލިއަން ރުފިޔާގެ އެއްބަސްވުމެއް ހެދިކަން ފަޅާއަރާފައިވާ ދަނޑިވަޅެކެވެ. މި އެއްބަސްވުމުގެ މައުލޫމާތު އާންމު ވުމުން ކުއްލި ގޮތަކަށް އެންސްޕާ އިން އެ އެއްބަސްވުން އުވާލި ކަމަށް ވަނީ ބުނެފައެވެ.
