އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލްގެ ކޮރަޕްޝަނުގެ ވާހަކަ ދައްކާތާ އަހަރެއްހައި ދުވަސްވެފައިވާއިރު، އެކަން ރައީސް މުއިއްޒަށް އެނގިވަޑައިނުގެން އޮތުމަކީ މުސްތަހީލު ކަމެއް ކަމަށް ރައީސް އަބްދުﷲ ޔާމީން ވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވީ، ބުރާސްފަތި ދުވަހުގެރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ބިންވެރިޔާ ސްކީމުގެ ދަށުން ގޯއްޗަކަށް އެދި ހުށަހެޅި މީހުންގެ ތެރޭގައި ފަޒުލްގެ ކޮއްކޮ ފަޒީލް ހިމެނެނު ނަމަވެސް އުސޫލުގެ ދަށުން އޭނާގެ ޝަރުތުހަމަނުވާ ކަމަށް އޮތީ ކަނޑައަޅާފައެވެ. އޭނާއަށް ގޯތި ނުލިބުނީ ސަރުކާރުން ކުރިން ހިންގި ބޯހިޔާވަހިކަމުގެ ސްކީމެއްގެ ދަށުން ބޯހިޔާވަހިކަމެއް ލިބިފައިވާ މީހަކަށް ވާތީއެވެ.

މީސް މީޑިއާގައި އާންމުވެފައި ހުރި ލިޔެކިޔުންތަކުން ދައްކާ ގޮތުގައި މި ގޮތަށް އެޗްޑީސީން ދިން ގޯތިތަކެއްގެ ވެރިފަރާތް ސާފުކުރަން ހައުސިން މިނިސްޓްރީއަށް ހުށަހެޅި އެވެ. މިނިސްޓްރީން ދިން ޖަވާބުގައި ބުނީ އެ ގޯތިތަކަކީ އެއްވެސް ބަޔަކާ އެ މިނިސްޓްރީން ހިންގި ސްކީމުގެ ދަށުން ހަވާލުކޮށްފައި ހުރި ގޯތިތަކެއް ނޫން ކަމަށެވެ.

އެ ތަހުގީގު ފެށިއިރު، މައްސަލަ ބޮޑުވެފައިވާ ގޯތީގެ ވަށާފާރު ހުރީ ރާނަން ފަށައިފަ އެވެ. ގާތްގަނޑަކަށް ހަތަރު ފޫޓެއްހާ އުސްމިނަށް ވަނީ ވަށައިގެން ފާރު ރާނައިފަ އެވެ. އެ މަސައްކަތް ކޮށްފައި ވަނީ ވަރަށް ފަހުންކަން އެނގެ އެވެ. ރޭނުމަށް ބޭނުންވާ ބައެއް ސާމާނު ވެސް ގޯތިތެރޭގައި އެބަހުއްޓެވެ.

ގޯތި ދޫކުރި މައްސަލައަށް އަލިއަޅުވައިލައްވައި ދެއްކެވި ވާހަކަފުޅުގައި ރައީސް ޔާމީން ވިދާޅުވީ މިހާރު ކުރިއަށްދާ ތަހުގީގަކީ ރައްޔިތުންގެ ލޮލުގައި އަޅުވާ އަނދުނެއް ކަމަށެވެ. މި މައްސަލައަކީ މިއަދަކު އިއްޔެއަކު ހިނގި ކަމެއް ނޫންކަން ފާހަގަކުރައްވަމުން ރައީސް ޔާމީން ވިދާޅުވީ މިއީ އެތައް ޒަމާނަކަށް ދިގުލައިގެން ގޮސްފައިވާކަމެއް ކަމަށާއި، އެކަން ހިނގަމުން އައިކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް އެނގިވަޑައިގަންނަވާނެ ކަމަށެވެ.

އެމަނިކުފާނު އިތުރަށް ވިދާޅުވީ ފަޒުލްގެ ކޮރަޕްޝަނުގެ ވާހަކަ ދައްކާތާ އަހަރެއްހައި ދުވަސްވެފައިވާއިރު، އެކަން ރައީސް މުއިއްޒަށް އެނގިވަޑައިނުގެން އޮތުމަކީ މުސްތަހީލު ކަމެއް ކަމަށެވެ. އަދި ރައީސްގެ އިތުރަށް ސަރުކާރުގެ ވަޒީރުންނާއި ރައްޔިތުންގެ މަޖިލީހުގެ މެންބަރުންނަށްވެސް މިކަންކަން އެނގޭނެ ކަމަށް ރައީސް ޔާމީން ވިދާޅުވި އެވެ.

ބިންވެރިޔާ ސްކީމްގައި ނުހިމެނޭ ބަޔަކަށް ގޯތިތަކެއް ދީފައިވާ މައްސަލާގެ ތަހުގީގަށް، މިހާރު މަގާމުން ސަސްޕެންޑް ކޮށްފައި ހުރީ އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދާއި އަދި ހައްގު ނޫން ގޯތި ލިބުނު އޭނާގެ ބޭބެ ފަޒީލް ރަޝީދު ހިމެނޭހެން މި މައްސަލާގައި ތުހުމަތު ކުރެވޭ 20 މީހެއްގެ ޕާސްޕޯޓް މިހާރު ވަނީ ހިފަހައްޓައިފަ އެވެ.

އެނގިފައިވާ ގޮތުގައި މި މައްސަލާގައި ފަޒުލް އާއި ފަޒީލްގެ އިތުރުން ޕާސްޕޯޓް ހިފެހެއްޓި މީހުންގެ ތެރޭގައި އެޗްޑީސީ އާއި ހައުސިން މިނިސްޓްރީގެ ބައެއް ވެރިން ހިމެނެ އެވެ.

ތަހުގީގެއް ނަމެއްގައި ފެށި ނަމަވެސް އަދި ފަޒުލްއާއި އެޗްޑީސީގެ ބައެއް ވެރިން ސަސްޕެންޑުކުރި ނަމަވެސް ފަޒުލްއާމެދު ރައީސް މުއިއްޒަށް ފިޔަވަޅެއް ނޭޅުއްވޭނެ ކަމުގައި ރައީސް ޔާމީން ވިދާޅުވި އެވެ. އަދި ފަޒުލްއަކީ ގުރުބާން ކަންބަޅިއެއްކަމުގައި ސިފަކުރައްވަމުން ރައީސް ޔާމީން ވިދާޅުވީ އެކަންބަޅި ގުރުބާން ނުކުރެވޭނެ ކަމަށެވެ.

ރައީސް ޔާމީނު އިތުރަށް ވިދާޅުވީ އިހުލާސްތެރި ހިތަކާއިގެން މިކަން ކުރަން ބޭނުންވި ނަމަ، މިކަން ބަލާފައި އޮންނާނީ މިއަށް ވުރެ މާކުރިން ކަމަށެވެ. އޭސީސީގެ ބަދަލުގައި މި މައްސަލަ ބަލަންވީ މިނިވަން ކޮމިޝަނަކުން ކަމަށާއި ނަމަވެސް މިކަން ކުރައްވަން ރައީސް މުއިއްޒަށް ކެރިވަޑައިނުގަންނަވާނެ ކަމަށްވެސް ރައީސް ޔާމީން ވިދާޅުވި އެވެ.

ރައީސް ޔާމީން މިފަދައިން ވިދާޅުވިއިރު ފަޒުލްއަށް ކުރެވޭ ކޮރަޕްޝަންގެ ތުހުމަތުތަކެއް މިދިޔަ ފެބްރުއަރީ މަހު އެޗްޑީސީގެ ޗެއާމަން ކަމަށް އައްޔަންކޮށް މިދިޔަ މެއި މަހު އެ މަގާމުން ވަކިކޮށްފައިވާ ޒުހޫރު، ރައީސް މުއިއްޒަށް ފޮނުއްވާފައިވާ ހަތް ސަފްހާގެ ސީޓީއެއް ވެސް މިހާރު ވަނީ އާންމުވެފައި އެވެ.

އެޗްޑީސީގެ ޗެއާމަންގެ ހައިސިއްޔަތުން އޭނާ ރައީސް މުއިއްޒު އަށް ފޮނުވި ސިޓީގައި ވަރަށް ތަފްސީލުކޮށް "ފަޒީލްގެ ވައްކަން" ވަނީ ތަފްސީލުކޮށް ދެއްވައިފަ އެވެ.

ޒުހޫރު ސިޓީގައި ވިދާޅުވީ އެޗްޑީސީގެ އެތެރެ އެހާ ގޯސްކޮށް ހިނގަމުންދިޔަ ކަންކަން ކުޑަ މިންވަރަކަށް ވެސް ރަނގަޅު ކުރެވޭތޯ މަސައްކަތް ކުރައްވާފައި ވާނެ ކަމަށާއި ނަމަވެސް، އޭގެ ބަދަލުގައި އޭނާގެ މަގާމު ގެއްލުނީ ކަމަށެވެ. މަގާމުން ވަކިކުރިއިރު އެއްވެސް ވަރަކަށް ކަން ހިނގާފައިވާ ގޮތާއި ވަމުންދާ ގޮތް ރައީސް އޮޅުން ފިލުއްވާފައި ދެއްވުމަށް ރައީސްގެ އެޕޮއިންޓްމަންޓަކަށް ވެސް އެދުނު ކަމަށާއި ނަމަވެސް، މަގާމުން ވަކިކުރިއިރު، އެ ފުރުސަތު ލިބިފައި ނުވާ ކަމަށް ވެސް އޭނާ ވިދާޅުވި އެވެ.

ރައީސްގެ ހާއްސަ އެދިވަޑައިގަތުމަކަށް އެޗްޑީސީގެ ޗެއާމަންކަމާ ހަވާލުވެވަޑައިގެންނެވި ޒުހޫރު މި އަހަރުގެ މޭ މަހު މަގާމުން ވަކިކުރި ފަހުން ރައީސަށް ފޮނުއްވި ސިޓީގައި ފަޒުލް އަށް ގިނަ ތުހުމަތުތަކެއް ކުރައްވައިފައިވެ އެވެ. ހައްގު ނޫން ފަރާތްތަކަށް ހުޅުމާލޭން ގޯތީގެ ހުއްދަ ދީފައިވާ ކަން އިއްޔެ ފެންމަތިވެގެން ދިޔައިރު، މި ހުރިހާ އިންޒާރެއް ޒުހޫރު އޮތީ ދެއްވައިފަ އެވެ.