ކުރީގެ ސަރުކާރުގެ ބިންވެރިޔާ ސްކީމްގެ ލިސްޓްގައި ނުހިމެނޭ ބޭބެއަށް ހުޅުމާލެއިން ގޯއްޗެއް ދިން ކަމަށް ތުހުމަތުކުރެވި، މިހާރު ސަސްޕެންޝަންގައި ހުންނެވި އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު އެ މަގާމުން އިސްތިއުފާ ދެއްވައިފި އެވެ.

ފަޒުލްގެ އިސްތިއުފާގެ ސިޓީ މިއަދު ވަނީ ރައީސް ޑރ. މުހައްމަދު މުއިއްޒުއަށް ފޮނުއްވައިފަ އެވެ.

އޭނާގެ ފޭސްބުކް ޕޭޖުގައި ފަޒުލް ވަނީ ރައީސް މުއިއްޒުއަށް އެޑްރެސްކޮށް ފޮނުވި އިސްތިއުފާގެ ސިޓީ އާންމުކޮށްފަ އެވެ. ސަރުކާރުގެ ހިއްސާ އޮންނަ ކުންފުނިތަކުގެ ބެލެނިވެރި އިދާރާ ކަމަށްވާ ޕްރައިވަޓައިޒޭޝަން ބޯޑުން ފަޒުލްގެ އިސްއިތުފާއާ ގުޅޭ މައުލޫމާތެއް މިހާތަނަށް ހާމަކޮށްފައި ނުވެ އެވެ.

އޭނާގެ މެނޭޖިން ޑިރެކްޓަރު ކަމުގައި އެޗްޑީސީން ނިންމާފައިވާ ހުރިހާ ނިންމުމަކީ ވެސް ކުންފުނީގެ ޕޮލިސީތަކުގެ އިމުގެ ތެރެއިން އެޗްޑީސީގެ މަސްލަހަތު އިސްކޮށްގެން ނިންމާފައިވާ ނިންމުންތަކެއް ކަމަށް ފަޒުލްގެ ސިޓީގައި ލިޔެފައިވެ އެވެ.

އޭނާ ވިދާޅުވީ، އޭނާ މަގާމަށް އައްޔަންކުރެއްވި ފަހުން ކުންފުނީގެ ފަރާތުން މިހާތަނަށް ކުރެއްްވި ހުރިހާ މުއާމަލާތެއް ކުރެއްވީ، ބޯޑުން ނިންމައި، ކުންފުނީގެ ޕޮލިސީތަކާއި އިންތަކުގެ ތެރެއިން ކުންފުނީގެ މަސްލަހަތު އިސްކުރައްވައިގެން ކަމަށެވެ.

ހަމައެއާއެކު ބިންވެރިޔާ ސްކީމާ ގުޅިގެން ކުރާ ތުހުމަތުތަކަކީ އެޗްޑީސީއާ އެއްވެސް ގުޅުމެއް ހުރި ކަމެއް ނޫންކަމަށް އޭނާ ވަނީ އެ ސިޓީގައި ވެސް ތަކުރާރުކުރައްވައިފަ އެވެ. އަދި އޭނާ އެދެނީ އެ ކަމުގެ ހަގީގަތް ވީ އެންމެ އަވަހަށް ރައްޔިތުންނަށް ހާމަވުމަށް ކަމަށް ވިދާޅުވި އެވެ.

ބިންވެރިޔާ ސްކީމުގެ ދަށުން ދޫކުރި ގޯތިތަކެއް ވަގަށް ވިއްކި މައްސަލަ ފުލުހުންނާއި އެންޓި ކޮރަޕްޝަން ކޮމިޝަން ގުޅިގެން ތަހުގީގު ކުރަމުން އަންނައިރު، މި މައްސަަލައިގައި އިއްޔެ ވަނީ އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދާއި އޭނާގެ ބޭބެ، އެމްޑަބްލިޔުއެސްސީގެ ޑީއެމްޑީ މުހައްމަދު ފަޒީލް ރަޝީދު ހިމެނޭ ގޮތަށް 20 މީހުންގެ ޕާސްޕޯޓު ހިފަހައްޓައިފަ އެވެ.

މި 20 މީހުންގެ ޕާސްޕޯޓު ހިފަހައްޓާފައި ވަނީ ވަކި މުއްދަތެއް ނެތް ގޮތަށެވެ.

ބިންވެރިޔާ ސްކީމުން ނުހައްގުން ގޯތި ދީފައިވާ ކަމުގެ ތުހުމަތުތަކެއް ފެންމަތިވީ، އެކަމާ ގުޅުންހުރި ލިޔެކިޔުންތަކެއް އާންމުވުމާ ގުޅިގެންނެވެ. އެގޮތުން ހުޅުމާލެ ބަލަހައްޓާ ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑީއެމްޑީ މުހައްމަދު ފަޒީލް ރަޝީދަށް ގޯއްޗެއް ދިނުމަށް ހަދައިފައިވާ އެއްބަސްވުމެއް ވެސް އާންމުވެފައިވެ އެވެ.