ގެދޮރުވެރިޔާ/ބިންވެރިޔާ ސްކީމާ ގުޅޭ ގޮތުން ޕްރޮސެކިއުޓާ ޖެނެރަލް އައްބާސް ޝަރީފްގެ އަމުރަކަށް ފުލުހުންނާއި އޭސީސީ ގުޅިގެން ހިންގާ ޖިނާއީ ތަހުގީގަށް މަގުފަހި ކުރުމަށްޓަކައި ކަމަށްބުނެ އެ ކުންފުނީގެ މުވައްޒަފަންތަކެއް ވަކިކޮށްފިއެވެ.
މައުލޫމާތު ލިބިފައިވާ ގޮތުގައި އެޗްޑީސީގައި ދުވަސްވީ އިސް މުވައްޒަފުންތަކެއްވެސް ހިމެނޭހެން ވަކިކޮށްފައިވަނީ 15 މުވައްޒަފެކެވެ.
ވަކިކުރި މުވައްޒަފުންގެ ތެރޭގައި ޗީފް ފައިނޭންޝަލް އޮފިސަރު އަބްދުﷲ ފާއިދާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހުމަދު ޔާމީން ވެސް ހިމެނޭއިރު ބައެއް މުވައްޒަފުން މިހާރު ސަސްޕެންޑްވެސް ކޮށްފައިވެއެވެ.
މައުލޫމާތު ލިބިފައިވާ ގޮތުގައި ހާތަނަށް ވަކިކުރި 15 މުވައްޒަފުންގެ ތެރެއިން އެންމެ މީހެއް ފިޔަވައި އެންމެންނަކީ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ވަރަށް ގާތް މީހުންނެވެ. އަދި އެ މީހުންގެ ސިޓީގައި އެޗްއާރު ޑިޕާޓުމަންޓުން ސޮއިކުރަން ދެކޮޅު ހެދުމުން ސިޓީތަކުގައި ސޮއިކޮށްފައިވަނީ ކުންފުނީ ބޯޑުގެ ޗެއަރމަން އަހުމަދު ނާސިފް (ޑީޑީ) ކަމަށް ވެސް މައުލޫމާތު ލިބިފައިވެއެވެ.
ބިންވެރިޔާ ސްކީމްގެ މައްސަލަތަކެއް މިދިޔަ ބުދަ ދުވަހު ފެންމަތިވީ، އެޗްޑީސީގެ މެނޭޖިން ޑިރެކްޓަރުކަމުން ރޭ އިސްތިއުފާ ދެއްވި ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ނަން އެ ސްކީމަށް ޝަރުތު ހަމަނުވާ ލިސްޓުގައި އޮއްވައި، ފަޒީލަށް ގޯތީގެ ރަޖިސްޓްރީއެއް ހަދައިދީފައި އޮތްކަން ފަޅާއެރުމުންނެވެ.
