ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ ސީއީއޯ ހީނާ ވަލީދު މަގާމު އިސްތިއުފާ ދިނުމަށް މިސް މީޑިޔާގައި ގޮވާލާ އަޑު ގަދަވެއްޖެއެވެ.

އެގޮތުން "ޕީޕަލް ޕަވާސް"ގެ ނަމުގައި އެކްސްގައި ހިންގާ އެކައުންޓެއްގައި ބުނެފައިވާ ގޮތުގައި ހީނާ ވަނީ މަގާމުގެ ބޭނުން ނަހަމަ ގޮތުގައި ހިފާ ރައްޔިތުންގެ ފައިސާއަށް ޚިޔާނާތްތެރިވެފައިވާ ކަމަށާ އަދި އެއީ ރައްޔިތުންނަށް ހަރާންކޯރުވުމުގެ ގޮތުގައި އެކަން އެ ޕޯސްޓުގައި ސިފަކޮށްފައިވެއެވެ.

މީގެ އިތުރުން ހީނާގެ އެފަދަ ބޮޑު މައްސަލައެއް ފެންމަތިވެ ހެއްކިތައް ހުރި އިރުވެސް ރައީސް މުހައްމަދު މުއިއްޒު އޭނާއާ މެދު ފިޔަވަޅެއް ނާޅުއްވައިގެން އުޅޭ ސަބަބާ މެދުވެސް އެ ޕޯސްޓުތަކުގައި ސުވާލު އުފައްދާފައިވެއެވެ.

ހަމައެހެންމެ ހީނާއަކީ ނަޒާހާތްތެރިކަން ގެއްލިފައިވާ މީހެއްކަމަށާ 30 މިލިއަން ރުފިޔާއަށް ވުރެ ގިނަ ފައިސާއާ ގުޅުން ހުރި ކޮރަޕްޝަންގެ މުއާމަލާތެއް ހިންގުމަށް ފަހުވެސް ހީނާ މަގާމުގައި ދެމި ހުރީ ކީއްވެތޯ ހޯމް މިނިސްޓަރު އަލީ އިހުސާން އިސްނަގައިގެން ތަހުގީގުކުރަން ޖެހޭ ކަމަށްވެސް ޕޯސްޓުގައި ބުނެފައިވެއެވެ.

ރައްޔިތުންގެ އިތުބާރު ގެއްލުމުން ރީތި ގޮތަކީ އިސްތިއުފާދީ ދުރަށް ދިއުން ކަމަށާ ހީނާއަކީ ދޮގުވެރިއެއްގެ ގޮތުގައިވެސް އެ ޕޯސްޓުގައި ސިފަކޮށްފައިވެއެވެ. އަދި ހީނާގެ ގޭދޮށަށް އެއްވެ އިހުތިޖާޖުކުރާނެކަމަށް ވެސް ބުނެފައިވެއެވެ.

ސަރުކާރުގެ ކުންފުނިތަކުގެ ތެރޭގައި ބޮޑެތި ވައްކަންތައް ކުރަމުން ގެންދާކަން ފަޅާއަރަމުން ދާ މި ދަނޑިވަޅުގައި ރައީސް މުހައްމަދު މުއިއްޒު ގެންދަވަނީ ކަން ދެއްކުމަށް ބައެއް ކަންކަން ކުރަމުން ކަމަށް ގިނަ ބަޔަކު ބުނަމުންދެއެވެ. ނަމަވެސް ހީނާ އާ މެދު ފިޔަވަޅެއް ނޭޅިގެން އުޅެނީ އެކަމަކީ ސީދާ ރައީސް މުއިއްޒުއާ ގުޅުން ހުރި ކަމަކަށް ވުމުން ކަމަށް ވެސް ގިނަ ބަޔަކު ތުހުމަތު ކުރެއެވެ.