ފެނަކަ ކޯޕަރޭޝަންގެ މެނޭޖިން ޑިރެކްޓަރުކަމުގެ މަގާމަށް މޭޖާ (ރިޓަޔާޑް) މުހައްމަދު ނަޖާހު އައްޔަންކޮށްފިއެވެ.

އެ މަގާމަށް ނަޖާހު އައްޔަނު ކޮށްފައިވާ ކަމަށް ޕްރައިވަޓައިޒޭޝަން ކޯޕަރޭޝަން ބޯޑު (ޕީސީބީ) އިން މިއަދު ވަނީ އިއުލާނު ކޮށްފައެވެ. ނަޖާހު އަކީ ސިފައިންގޭގައި 21 އަހަރު ދުވަހު ހިދުމަތް ކުރައްވާފައިވާ ބޭފުޅެކެވެ.

ނަޖާހު އެންމެ ފަހުން ހުންނެވީ، ހޯމް މިނިސްޓަރު އަލީ އިހުސާންގެ އާއިލީ ކުންފުނި ހެޕީ މާކެޓުގެ އެސިސްޓެންޓް ޖެނެރަލް މެނޭޖަރުގެ މަގާމުގައެވެ.

ފެނަކައިގެ ޑިރެކްޓަރުންގެ ބޯޑަށާއި އެމްޑީގެ މަގާމަށް ބޭފުޅަކު އައްޔަނު ކޮށްފައި ވަނީ، އެ މަގާމުގައި ހުންނެވި މުއާޒް މުހައްމަދު ރަޝީދު މިއަދު އިސްތިއުފާ ދެއްވުމާ ގުޅިގެންނެވެ. އޭނާ އިސްތިއުފާ ދެއްވާފައި ވަނީ ފެނަކަ އޮތް ހާލަތުން އަރައިގަތުމަށް މަސައްކަތް ކުރައްވަން އުނދަގޫ ކަމަށް ވިދާޅުވެއެވެ.

ފެނާއި ނަރުދަމާއާއި ކަރަންޓުގެ ޚިދުމަތްދޭ، ދައުލަތުގެ ހިއްސާ އޮންނަ ކުންފުނިތަކުގެ ތެރެއިން ފެނަކައަކީ ކޮރަޕްޝަނުގެ ގިނަ ތުހުމަތުތަކެއް އަމާޒުވެފައިވާ ކުންފުންޏެކެވެ. އެގޮތުން ކޮންޓްރެކްޓު ދިނުމުގައި އާއި މުވައްޒަފުން ނެގުމުގައި ކޮރަޕްޝަން ހިންގާފައިވާ ކަމުގެ ތުހުމަތުކޮށް، އޭސީސީއަށް ވެސް މައްސަލަތަކެއް ހުށަޙަޅައިފައިވެއެވެ.

މީގެ އިތުުރުން ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އަތޮޅުތެރޭގައި ޔުޓިލިޓީ ހިދުމަތް ދެމުން އަންނަ ފެނަކަ ކޯޕަރޭޝަންގެ ދަރަނި އިތުރުވެ، ކުންފުނީގެ މުވައްޒަފުންގެ އަދަދު ބޮޑުތަނުން މަތިވެ މާލީ މައްސަލަތަކެއްގެ ތެރެއަށް ވެއްޓިފައިވާ ކަމަށް ކުންފުނިން ބުނެ އެވެ. ސަޕްލަޔަރުންނަށް ދޭން ޖެހޭ ފައިސާގެ އަދަދު އެތައް ބިލިއަން ރުފިޔާއަކަށް އަރަ އެވެ.

އަދި އެ ކުންފުނީގެ މެނޭޖުމަންޓުތަކުން ކޮރަޕްޝަންގެ އަމަލުތައް ހިންގާފައިވާ ކަމަށް ތުހުމަތުކުރެވޭއިރު، މީގެ ސަބަބުން އެ ކުންފުނިން ފޯރުކޮށްދޭ ހިދުމަތަށް ވެސް ބުރޫއަރާފައިވެއެވެ.