ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމުން މުއާޒު މުހައްމަދު ރަޝީދު އިސްތިއުފާ ދެއްވާ އާންމުކުރި ސިޓީގައި ރައީސް މުހައްމަދު މުއިއްޒަށާ ސަރުކާރަށް ބޮޑެތި ތުހުމަތުތަކެއް އަމާޒުކުރައްވައިފިއެވެ.

އެގޮތުން މުއާޒު އިސްތިއުފާ ދެއްވިކަން ކަށަވަރިކޮށް ދެއްވައި އިސްތިއުފާ ސިޓީ ސޯޝަލް މީޑިއާގައި ހިއްސާ ކުރައްވާފައިވެއެވެ.

މުއާޒުގެ ސިޓީގައި ވިދާޅުވެފައިވަނީ، ފެނަކަ މިހާރު އޮތް މާލީ ހާލަތުން ސަލާމަތް ކުރެވޭނެ މަގެއް ފެންނަން އޮތްކަމަށް އޭނާ ގަބޫލު ނުކުރައްވާ ކަމަށެވެ. އަދި އޭނާ ކުންފުންޏާ ހަވާލުވިއިރު ކުންފުނި އޮތީ 4.3 ބިލިއަން ރުފިޔާއިން ދަރާފައި ކަމަށް ވެސް އޭނާ ވިދާޅުވެފައިވެއެވެ.

މީގެ އިތުރުން ކުންފުންޏަށް ބޭނުންވާ ވަރަށްވުރެ އެތައް ގުނައެއް އިތުރަށް ވަޒީފާ ހަމަޖައްސަން ޖެހުމާއި، އަދި ކުންފުނި ރައިޓްސައިޒް ކުރުމަށް އެކަށީގެންވާ އެއްބާރުލުމެއް ގުޅުންހުރި އިދާރާތަކުން ނުލިބުންވެސް މުއާޒު އިސްތިއުފާދިން ސަބަބުތަަކުގެ ތެރޭގައި ސިޓީގައި ބަޔާންކޮށްފައިވެއެވެ.

އެ ކުންފުންޏަށް ދިމާވެފައިވާ މާލީ ގޮންޖެހުންތަކުން އަރައިގަތުމަށް ކުންފުނިން ތައްޔާރު ކޮށްފައިވާ ޕްލޭން ކަމާ ގުޅުންހުރި އިދާރާތަކާ ހިއްސާ ކުރި ނަމަވެސް، އެ ކަމަށް މިއަދާ ހަމައަށް އައިއިރު ވެސް އަލި މަގެއް ނުލިބޭ ކަމަށްވެސް މުއާޒުގެ ސިޓީގައި ތުހުމަތު ކުރައްވާފައިވެއެވެ.

ހަމައެހެންމެ ފާއިތުވި އޮކްޓޯބަރު އަދި ނޮވެމްބަރު މަހުގެ މުސާރަ މުވައްޒަފުންނަށް މަސް ފެށުނުއިރު ވެސް ޖަމާ ނުކޮށްދެވޭއިރު، އެއީ އެ ކުންފުނީގެ ތާރީހުގައި ހިނގާފައިވާ ކަމެއް ނޫންކަން މުއާޒް ފާހަގަ ކުރެއްވިއެވެ.

އެގޮތުން، މުއާޒް ވިދާޅުވީ ކުންފުންޏަށް ލިބޭ އާމްދަނީއަށްވުރެ ކުރަން ޖެހޭ ހަރަދު ބޮޑުވުމުން ދެމެހެއްޓިނިވި ގޮތެއްގައި ހިދުމަތް ފޯރުކޮށް ނުދެވޭ ހާލަތަކަށް ކުންފުނީގެ އޮޕަރޭޝަން ވެއްޓިފައިވާ ކަމަށެވެ.

މުއާޒުގެ މިފަދަ ތުހުމަތަކެއް ރައީސް މުއިއްޒަށާ ސަރުކާރަށް އަމާޒުކޮށްފައި މިވަނީ ދައުލަތުގެ ކުންފުނިތަކުގެ ތެރޭގައި ވައްކަމުގެ ބޮޑެތި ކަންކަން ރައީސް މުއިއްޒުގެ ބައިވެރިވުމާ އެކު ކުރިއަށްދާކަމުގެ އަޑު ގަދަވެފައިވާ ދަނޑިވަޅެއްގައެވެ.